తమిళ వెట్రి కజగం (TVK) పార్టీ తొలి మహానాడులో ప్రముఖ నటుడు మరియు ఆ పార్టీ అధినేత దళపతి విజయ్ రాజకీయాలపై కీలక వ్యాఖ్యలు చేశారు. రాజకీయాలు పాము లాంటివని పేర్కొంటూ, పార్టీ సభ్యులందరూ సమానమేనని విజ్ఞప్తి చేశారు. తాను రాజకీయాల్లో కొత్తవాడైనా ఎవరిపట్లా భయపడే ప్రసక్తి లేదని, ఇకపై తన దృష్టి రాజకీయాలపైనే ఎక్కువగా ఉంటుందని వెల్లడించారు.
తమిళనాడు రాజకీయాల్లో బీజేపీ మినహా, ఇతర పార్టీలు అన్నీ ఒకే విధంగా నడుస్తున్నట్లు అభిప్రాయపడినా, ప్రతి పార్టీకి తమదైన విధానం ఉందని విజయ్ వ్యాఖ్యానించారు. మహానాడులో విజయ్ తన పార్టీ భావజాలాన్ని ప్రకటిస్తూ, డీఎంకే బాటలోనే తాను కూడా పయనిస్తున్నట్లు సంకేతాలు ఇచ్చారు. “ఒకటే కులం, ఒకరే దేవుడు” అన్న నినాదం తన విధానమని స్పష్టం చేశారు.
ఈ మహానాడుకు తమిళనాడు నలుమూలల నుంచి లక్షలాది అభిమానులు తరలివచ్చారు. విజయ్ చేసిన ఈ బల ప్రదర్శన, ఆయన ప్రధాన పార్టీలకు గట్టిపోటీగా మారబోతున్నారనే సంకేతాన్ని పంపుతుందని రాజకీయ విశ్లేషకులు భావిస్తున్నారు.