కేటీఆర్ విదేశీ పర్యటనలు ప్రారంభం: తెలంగాణ అభివృద్ధి గాథను ప్రపంచానికి వినిపించేందుకు సిద్ధం
భారత రాజకీయాల్లో ప్రముఖ యువ నేతగా గుర్తింపు పొందిన బీఆర్ఎస్ పార్టీ వర్కింగ్ ప్రెసిడెంట్ కల్వకుంట్ల తారక రామారావు (కేటీఆర్), యూకే మరియు అమెరికా పర్యటనకు బయలుదేరారు. ఈ పర్యటనలో భాగంగా కేటీఆర్ పలు కీలక అంతర్జాతీయ కార్యక్రమాల్లో పాల్గొననున్నారు. ముఖ్యంగా టెక్సాస్లోని డాలస్ నగరంలో జరగనున్న తెలంగాణ రాష్ట్ర ఆవిర్భావ దినోత్సవ వేడుకలు, బీఆర్ఎస్ రజతోత్సవాల వేళ, ప్రవాస భారతీయులతో కలిసి తెలంగాణ విజయగాధను ప్రపంచానికి పరిచయం చేయనున్నారు. కేటీఆర్ ఈ పర్యటన ద్వారా తెలంగాణలోని అభివృద్ధి మోడల్, నూతన ఆవిష్కరణలు, పరిశ్రమల దిశగా ముందుకు సాగుతున్న ప్రగతిని అంతర్జాతీయ వేదికలపై వివరించనున్నారు.
లండన్లో “ఇండియా వీక్ 2025” సదస్సు – తెలంగాణ మోడల్పై కేటీఆర్ కీలక ప్రసంగం
కేటీఆర్ తన పర్యటనలో భాగంగా మొదట యూకే వెళ్లనున్నారు. ఈ నెల 30న లండన్లో బ్రిడ్జ్ ఇండియా ఆధ్వర్యంలో జరిగే ప్రతిష్టాత్మక “ఇండియా వీక్ 2025” సదస్సులో ఆయన ప్రధాన ఉపన్యాసం చేయనున్నారు. ఈ సదస్సులో వివిధ దేశాలకు చెందిన రాజకీయ నాయకులు, పారిశ్రామికవేత్తలు, ఇతర ప్రముఖులు పాల్గొంటారు. ఈ వేదికపై కేటీఆర్, బీఆర్ఎస్ తొమ్మిదేళ్ల పాలనలో తెలంగాణ సాధించిన అభివృద్ధి, వినూత్న ఆవిష్కరణల గురించి వివరించనున్నారు. తెలంగాణ విజయ ప్రస్థానాన్ని, అభివృద్ధి నమూనాని అంతర్జాతీయ సమాజానికి తెలియజేయనున్నారు.
వార్విక్లో PDSL నాలెడ్జ్ సెంటర్ ప్రారంభం – ఆటోమోటివ్ రంగంలో తెలంగాణ ప్రతిభకు గుర్తింపు
లండన్ కార్యక్రమం అనంతరం అదే రోజు వార్విక్ నగరంలో కేటీఆర్ మొబిలిటీ టెక్నాలజీ రంగంలో తెలంగాణకు చెందిన ఆవిష్కరణలకు నిదర్శనంగా నిలిచిన ప్రాగ్మాటిక్ డిజైన్ సొల్యూషన్స్ లిమిటెడ్ (PDSL) నాలెడ్జ్ సెంటర్ను కేటీఆర్ ప్రారంభించనున్నారు. ఈ కేంద్రం మెక్లారెన్, ఆస్టన్ మార్టిన్, జాగ్వార్ ల్యాండ్ రోవర్ వంటి ప్రపంచ ప్రఖ్యాత ఆటోమోటివ్ సంస్థలకు పరిశోధన మరియు అభివృద్ధి (ఆర్ అండ్ డీ) సేవలను అందించనుంది. ఇందులో అత్యాధునిక నీర్ షోర్ హార్డ్వేర్-ఇన్-లూప్ (HIL) టెస్ట్ సెంటర్ కూడా ఉంది.
అమెరికాలో తెలంగాణ ఆవిర్భావ వేడుకలు – ప్రవాసులతో బంధం మరింత బలపడనుంది
యూకే పర్యటన ముగిసిన అనంతరం కేటీఆర్ అమెరికా పర్యటన ప్రారంభించనున్నారు. అక్కడ తెలంగాణ ఎన్ఆర్ఐ (NRI) లు నిర్వహించే పలు ముఖ్యమైన కార్యక్రమాలకు ఆయన హాజరవుతారు. జూన్ 1న టెక్సాస్ రాష్ట్రంలోని ఫ్రిస్కో నగరంలో ఉన్న కొమెరికా సెంటర్లో తెలంగాణ రాష్ట్ర ఆవిర్భావ దినోత్సవ వేడుకలు, బీఆర్ఎస్ పార్టీ 25 ఏళ్ల రజతోత్సవ వేడుకలు ఘనంగా జరగనున్నాయి. ఈ భారీ కార్యక్రమంలో తెలంగాణ ఉద్యమానికి మద్దతుగా నిలిచిన వేలాది మంది ప్రవాస భారతీయులు పాల్గొంటారని అంచనా.
డాలస్లో విద్యార్థులతో ముఖాముఖీ – యువతలో స్ఫూర్తి నింపనున్న కేటీఆర్
జూన్ 2న డాలస్లోని యూనివర్సిటీ ఆఫ్ టెక్సాస్ (యూటీ డాలస్)లో భారతీయ విద్యార్థులతో సమావేశం జరుగనుంది. ఈ సందర్భంగా కేటీఆర్, నూతన ఆవిష్కరణలు, స్టార్ట్అప్ కల్చర్, విద్యార్థుల భవిష్యత్ భూమిక వంటి అంశాలపై ప్రసంగించనున్నారు. యువతను ప్రేరేపించేలా, తెలివైన నాయకుడిగా ఆయన ఇచ్చే సందేశం విద్యార్థులలో చైతన్యం నింపనుంది.
బీఆర్ఎస్ మద్దతుదారులతో ఘన సహవాసం – ఎన్ఆర్ఐలు ఎదురుచూపుల్లో
కేటీఆర్తో పాటు మాజీ మంత్రి కొప్పుల ఈశ్వర్, రామగుండం మాజీ ఎమ్మెల్యే కోరుకంటి చందర్, రాష్ట్ర పోలీస్ హౌసింగ్ కార్పొరేషన్ మాజీ చైర్మన్ కోలేటి దామోదర్, పెద్దపల్లి జిల్లా మాజీ గ్రంథాలయ సంస్థ చైర్మన్ రఘువీర్ సింగ్ తదితరులు హైదరాబాద్ విమానాశ్రయం నుంచి బయల్దేరారు. కేటీఆర్ యూకే, యూఎస్ పర్యటన పట్ల అక్కడి ఎన్ఆర్ఐలు, వ్యాపారవేత్తలు ఎంతో ఆసక్తిగా ఎదురుచూస్తున్నారు.
Read also: Telangana: మరింత ఆలస్యం కానున్న తెలంగాణ మంత్రివర్గ విస్తరణ
