భాగ్యనగర వాసుల రోజువారీ ప్రయాణ సమస్యలకు శాశ్వత పరిష్కారం చూపేందుకు తెలంగాణ ప్రభుత్వం సమగ్ర రవాణా ప్రణాళికను సిద్ధం చేసింది. నగరంలో ఒక ప్రాంతం నుంచి మరో ప్రాంతానికి వెళ్లే సమయంలో ఎదురయ్యే ట్రాఫిక్ ఆలస్యాలను తగ్గిస్తూ, అందుబాటు ధరలో ప్రయాణ సౌకర్యాలు కల్పించడమే ఈ ప్రణాళిక ప్రధాన ఉద్దేశ్యం. ఈ క్రమంలో మెట్రో రైలు, ఎంఎంటీఎస్, ఆర్టీసీ బస్సులను పరస్పరం అనుసంధానం చేస్తూ లాస్ట్ మైల్ కనెక్టివిటీని(Skywalks) బలోపేతం చేయాలని నిర్ణయించింది.
Read Also: Security Feature: వాట్సాప్లో కొత్త ఫీచర్
మెట్రో–ఎంఎంటీఎస్ మధ్య స్కైవాక్ల నిర్మాణం
ప్రస్తుతం మెట్రో స్టేషన్ నుంచి ఎంఎంటీఎస్ లేదా బస్సు స్టాప్కు చేరాలంటే ప్రయాణికులు రద్దీ రోడ్లను దాటాల్సి వస్తోంది. ఈ సమస్యకు చెక్ పెట్టేందుకు ముఖ్యమైన జంక్షన్లలో స్కైవాక్లను(Skywalks) నిర్మించనున్నారు. వీటి ద్వారా రోడ్డు మీదకు రాకుండానే ఒక రవాణా మాధ్యమం నుంచి మరొకదానికి నేరుగా చేరుకునే వీలు కలుగుతుంది.
కీలక ప్రాంతాల్లో కనెక్టివిటీ లోపం
యూనిఫైడ్ మెట్రోపాలిటన్ ట్రాన్స్పోర్ట్ అథారిటీ (UMTA) అధ్యయనం ప్రకారం సికింద్రాబాద్, బేగంపేట, నాంపల్లి, భరత్నగర్, మలక్పేట్, ఖైరతాబాద్ వంటి ప్రాంతాల్లో మెట్రో, ఎంఎంటీఎస్ స్టేషన్లు దగ్గరగా ఉన్నప్పటికీ సరైన అనుసంధానం లేదు. ఈ నేపథ్యంలో సికింద్రాబాద్ రైల్వే స్టేషన్, ఎంఎంటీఎస్, బస్సు టెర్మినల్స్ను కలుపుతూ ఆధునిక స్కైవాక్ల పనులు త్వరలో ప్రారంభం కానున్నాయి.
ఎంఎంటీఎస్ స్టేషన్ల వద్దకే బస్సు సౌకర్యం
హైదరాబాద్లో ఉన్న 51 ఎంఎంటీఎస్ స్టేషన్లలో కేవలం 21 స్టేషన్లకే సమీపంలో బస్సు స్టాప్లు ఉన్నాయి. మిగతా స్టేషన్లు దూరంగా ఉండటంతో ఎంఎంటీఎస్ వినియోగం తగ్గుతోంది. ఈ సమస్యను పరిష్కరించేందుకు ప్రభుత్వం రెండు కీలక నిర్ణయాలు తీసుకుంది.
- సాధ్యమైన ప్రాంతాల్లో బస్సు స్టాప్లను నేరుగా స్టేషన్ ప్రవేశద్వారాల వద్దకు మార్చడం
- బస్సు స్టాప్లు మార్చలేని చోట తక్కువ ధరతో బ్యాటరీ వాహనాల (EVs) సేవలు అందించడం
నగరంలో ప్రజా రవాణా వినియోగ గణాంకాలు
ప్రస్తుతం హైదరాబాద్లో రోజువారీ ప్రయాణికుల వినియోగం ఇలా ఉంది:
- ఆర్టీసీ బస్సులు: సుమారు 25 లక్షలు
- మెట్రో రైలు: దాదాపు 5 లక్షలు
- ఎంఎంటీఎస్: 40 వేల నుంచి 50 వేల మంది
- సొంత వాహనాలు: సుమారు 70 లక్షలు
భవిష్యత్ రవాణా విస్తరణ ప్రణాళికలు
రెండో దశ ఎంఎంటీఎస్ ప్రాజెక్టు పూర్తయితే మేడ్చల్, ఉందానగర్, శంకర్పల్లి వంటి శివారు ప్రాంతాలకు సేవలు విస్తరించనున్నాయి. అదే విధంగా మెట్రో రెండో దశ పూర్తయితే హైదరాబాద్ రవాణా వ్యవస్థ అంతర్జాతీయ ప్రమాణాలకు చేరనుంది. ట్రాఫిక్ లేని ప్రయాణంతో పాటు కాలుష్య నియంత్రణ కూడా ఈ ప్రణాళిక ప్రధాన లక్ష్యంగా ఉంది. ఈ అన్ని మార్పులతో పాటు ఒకే టికెట్తో బస్సు, మెట్రో, ఎంఎంటీఎస్లలో ప్రయాణించేలా కామన్ మొబిలిటీ కార్డ్ విధానాన్ని కూడా ప్రభుత్వం వేగవంతం చేస్తోంది. ఇది అమలులోకి వస్తే నగరవాసులకు ప్రయాణం మరింత సులభమవుతుంది.
Read hindi news: hindi.vaartha.com
Epaper: epaper.vaartha.com
Read Also:
