టీమిండియా ప్రధాన కోచ్ గౌతమ్ గంభీర్ భారత క్రికెట్ జట్టు సీనియర్ ఆటగాళ్లు రోహిత్ శర్మ, విరాట్ కోహ్లీ టెస్ట్ ఫార్మాట్ నుంచి వైదొలగడంపై ఎట్టకేలకు స్పందించాడు. వారిద్దరి నిర్ణయాలను పూర్తిగా వ్యక్తిగతమైనవిగా అభివర్ణించిన గంభీర్(Gambhir), వాటిని ప్రతి ఒక్కరూ గౌరవించాలని సూచించాడు. జూన్ 20 నుంచి లీడ్స్లో ప్రారంభం కానున్న ఇంగ్లండ్ పర్యటన నేపథ్యంలో ఈ వ్యాఖ్యలు చేశాడు. ఆధునిక క్రికెట్లో భారత జట్టుకు ఎన్నో చిరస్మరణీయ విజయాలు అందించిన ఇద్దరు దిగ్గజాల నిష్క్రమణతో జట్టులో ఏర్పడిన లోటుపై గంభీర్ తన అభిప్రాయాలను పంచుకున్నాడు.సీఎన్ఎన్-న్యూస్18కి ఇచ్చిన ఓ ఇంటర్వ్యూలో గంభీర్ మాట్లాడుతూ, “ఆట ఎప్పుడు మొదలుపెట్టాలి, ఎప్పుడు ముగించాలనేది పూర్తిగా ఆటగాడి వ్యక్తిగత నిర్ణయం. ఈ విషయంలో కోచ్ అయినా, సెలక్టర్ అయినా, లేదా దేశంలో మరెవరైనా సరే, ఫలానా ఆటగాడు ఎప్పుడు రిటైర్ అవ్వాలో చెప్పే హక్కు ఎవరికీ లేదు. అది ఆటగాడి అంతర్గత భావన నుంచి రావాలి” అని స్పష్టం చేశాడు.
అనుభవం
ఈ నెల ఆరంభంలో రోహిత్ శర్మ, విరాట్ కోహ్లీ టెస్ట్ క్రికెట్కు వీడ్కోలు పలికిన సంగతి తెలిసిందే. దశాబ్దానికి పైగా భారత క్రికెట్లో కీలక పాత్ర పోషించిన వీరిద్దరి నిష్క్రమణ జట్టుపై ప్రభావం చూపుతుందని గంభీర్ అంగీకరించాడు. అయినప్పటికీ, ఈ పరిణామం యువ ఆటగాళ్లకు ఒక గొప్ప అవకాశమని నొక్కి చెప్పాడు. “కచ్చితంగా వారి అనుభవం లోటు తీర్చడం కష్టం. కానీ, ఆ బాధ్యతను స్వీకరించడానికి ఇతర ఆటగాళ్లు ఖచ్చితంగా ముందుకు వస్తారు. ఒకరు దూరమైతే, మరొకరికి దేశం కోసం ఏదైనా ప్రత్యేకంగా చేయడానికి అవకాశం లభిస్తుంది” అని గంభీర్ ఆశాభావం వ్యక్తం చేశాడు.
గైర్హాజరీ
జస్ప్రీత్ బుమ్రా(Jasprit Bumrah) వంటి కీలక బౌలర్ అందుబాటులో లేకపోయినా భారత జట్టు ఛాంపియన్స్ ట్రోఫీని గెలుచుకున్న విషయాన్ని గంభీర్ ఈ సందర్భంగా గుర్తు చేశాడు. సీనియర్ ఆటగాళ్ల గైర్హాజరీలో కూడా జట్టు విజయాలు సాధించగలదని ఇది నిరూపిస్తుందన్నాడు.కాగా, బీసీసీఐ రేపు శనివారం నాడు ఇంగ్లండ్ పర్యటనకు టెస్ట్ జట్టును, భారత నూతన టెస్ట్ కెప్టెన్ను ప్రకటించే అవకాశం ఉంది. ఈ సందర్భంగా గంభీర్, చీఫ్ సెలెక్టర్ అజిత్ అగార్కర్ మీడియా సమావేశంలో పాల్గొంటారని సమాచారం.
Read Also: YV Subbareddy: రక్షణ కల్పించాలంటూ టీజీ హైకోర్టును ఆశ్రయించిన వైవి సుబ్బారెెడ్డి భార్య
