‘బ్లైండ్ స్పాట్’ రివ్యూ: థ్రిల్లర్ జోనర్లో నవీన్ చంద్ర మరో ప్రయత్నం!
నవీన్ చంద్ర ఇటీవల కాలంలో థ్రిల్లర్ జానర్ చిత్రాలు, వెబ్ సిరీస్లతో ప్రేక్షకులను ఆకట్టుకుంటున్నారు. అలాంటి కోవలోనే రీసెంట్గా ఆయన చేసిన సినిమానే ‘బ్లైండ్ స్పాట్’(Blind Spot). రాకేశ్ వర్మ దర్శకత్వం వహించిన ఈ చిత్రం మే 9వ తేదీన థియేటర్లలో విడుదలైంది. అయితే, థియేటర్లలో పెద్దగా ఆడకపోయినా, ఇప్పుడు ఓటీటీ ప్లాట్ఫామ్లోకి ప్రవేశించి ప్రేక్షకుల దృష్టిని ఆకర్షిస్తోంది. ఈ నెల 13వ తేదీ నుంచి అమెజాన్ ప్రైమ్లో స్ట్రీమింగ్ అవుతున్న ఈ క్రైమ్ థ్రిల్లర్ కథాంశం ఏమిటి, ప్రేక్షకులను ఎంతవరకు ఆకట్టుకుంది అనే విషయాలను ఇప్పుడు విశ్లేషిద్దాం. ఒక ఇల్లు, ఒక హత్య, కొందరు అనుమానితులు – ఇలాంటి పరిమిత వాతావరణంలో సాగే ఈ కథ ప్రేక్షకులను ఎంతవరకు ఉత్కంఠకు గురిచేసిందో చూద్దాం. ఈ సినిమా చిన్న బడ్జెట్తో తెరకెక్కించినప్పటికీ, థ్రిల్లర్ అభిమానులను ఆకట్టుకునే ప్రయత్నం చేసింది.
కథాంశం: దివ్య హత్య – అనుమానితుల చుట్టూ అల్లుకున్న సస్పెన్స్
జైరామ్ (రవి వర్మ) ఓ బిజినెస్ మేన్. ఆయన భార్యనే దివ్య (రాశి సింగ్). జైరామ్ మొదటి భార్య సరస్వతి అనారోగ్య కారణంగా చనిపోతుంది. ఆమె కొడుకు వినోద్ మానసికంగా కాస్త దెబ్బతింటాడు. అలాంటి పరిస్థితుల్లోనే దివ్య ను పెళ్లి చేసుకుని జైరామ్ తన ఇంటికి తీసుకొస్తాడు. అయితే వాళ్ల కాపురం ఎక్కువ కాలం పాటు అన్యోన్యంగా సాగదు. తరచూ ఇద్దరూ గొడవపడుతూ ఉంటారు. ఆ ఇంట్లో పనిచేసే లక్ష్మితో జైరామ్ కి సంబంధం ఉందనే దివ్య అనుమానం కూడా అందుకు ఒక కారణం.
ఒక రోజున జైరామ్ బిజినెస్ పనిపై ముంబైకి బయల్దేరతాడు. ఆయన అలా వెళ్లగానే దివ్య ఉరేసుకుని చనిపోవడాన్ని లక్ష్మి చూస్తుంది. వెంటనే పోలీస్ స్టేషన్ కి కాల్ చేస్తుంది. కానిస్టేబుల్ రాంబాబును తీసుకుని, పోలీస్ ఆఫీసర్ విక్రమ్ (నవీన్ చంద్ర) అక్కడికి చేరుకుంటాడు. దివ్య ఒక అనాథ అనీ .. జైరామ్ కి మాత్రం ఆదిత్య (అలీ రెజా) అనే తమ్ముడు ఉన్నాడని తెలిసి అతనిని కూడా అక్కడికి పిలిపిస్తాడు. చనిపోయిన దివ్యపై జైరామ్ చాలా అసంతృప్తిగా ఉంటాడు. ఆమె విషయంలో లక్ష్మి చాలా అసహనంతో ఉందని విక్రమ్ గ్రహిస్తాడు. ఇక లక్ష్మి కూతురు మానస తొమ్మిదో తరగతి చదువుతూ ఉంటుంది. ఆమె కూడా దివ్యపై ద్వేషంతో ఉందని విక్రమ్ గమనిస్తాడు. ఇక తన తల్లిని కోల్పోయిన సరస్వతి కొడుకు వినోద్ కూడా దివ్య పట్ల కోపంతో ఉన్నాడని అర్థం చేసుకుంటాడు. వీళ్లలో దివ్యను హత్య చేసింది ఎవరు? నేరస్థులను విక్రమ్ ఎలా పట్టుకుంటాడు? అనేది కథ.
విశ్లేషణ: పరిమిత వాతావరణంలో థ్రిల్లింగ్ అనుభవం?
క్రైమ్ థ్రిల్లర్ కథలలో ఒక నేరం జరిగినప్పుడు, ఆ నేరం ఎందుకు జరిగింది, నేరస్థుడు ఎవరు, ఎలా పట్టుకుంటారు వంటి అంశాలు ప్రేక్షకులలో ఆసక్తిని రేకెత్తిస్తాయి. ‘బ్లైండ్ స్పాట్’ కథలో అలాంటి కుతూహలాన్ని రేకెత్తించే అంశాలు కొంతవరకు ఉన్నాయని చెప్పాలి. అయితే, కథ దాదాపుగా ఒకే ఇంట్లో జరగడం కొంత అసంతృప్తిని కలిగిస్తుంది. ఒక హత్య, కొంతమంది అనుమానితులు అన్నట్లుగానే ఈ కథ నడుస్తుంది. ఒక్కో పాత్రను అనుమానిస్తూ రాసుకున్న కారణాలు ఆసక్తికరంగానే అనిపిస్తాయి. ప్రేక్షకులను ఒక పాత్ర వైపు దృష్టి మళ్ళించి, చివర్లో మరో పాత్రను దోషిగా నిలబెట్టడం అనే పాత సూత్రాన్నే పాటించినా, ఆ ట్విస్ట్ మాత్రం బాగానే ఉందనిపిస్తుంది. ఆ ట్విస్ట్ వెనుక ఉన్న ఫ్లాష్బ్యాక్ కూడా నమ్మదగినదిగానే ఉంటుంది.
సాధారణంగా, ఒక హత్య జరిగితే, అక్కడ పోలీసుల హడావిడి, ఆధారాలు సేకరించేవారు, ఇతర టీమ్లు రంగంలోకి దిగడం వంటి ఒక వాతావరణం మనం చూస్తుంటాము. కానీ, ఈ సినిమాలో ఒక వైపు శవం, మరో వైపు కుటుంబ సభ్యులు, మధ్యలో ఇంటరాగేషన్ చేసే పోలీస్ ఆఫీసర్ – ఈ స్పాట్లో సగానికి పైగా కథను కానిచ్చేశారు. ఇక్కడే కొంత బోర్ అనిపిస్తుంది. దర్శకుడు ఎంచుకున్న లైన్ ఫర్వాలేదు, చివర్లో ఇచ్చిన ట్విస్ట్ కూడా బాగానే ఉంది. అయితే, కథ నాలుగు రకాలుగా, నాలుగు చోట్ల పరిగెత్తాలి. ఒకే లొకేషన్లో నిదానంగా సాగే కథను నింపాదిగా కూర్చుని చూడటం కొంచెం కష్టమైన పనే. ఈ సినిమా విషయంలో అలాంటి అనుభవమే ప్రేక్షకులకు ఎదురవుతుంది. ఫోటోగ్రఫీ, నేపథ్య సంగీతం, ఎడిటింగ్ గురించి మాట్లాడుకునే స్థాయి సన్నివేశాలు మనకు కనిపించవు. ఒక అరడజను పాత్రలతో, ఒక ఇంట్లోనే ప్లాన్ చేసిన సినిమా ఇది. 90 శాతం కథ ఇంట్లోనే నడుస్తుంది. చిన్న బడ్జెట్లో ఈ మాత్రం కంటెంట్ను ఇవ్వడాన్ని సరిపెట్టుకోవచ్చు. చివర్లో ట్విస్ట్ ఉంది, కాకపోతే అక్కడి వరకూ నడిచే కథ రొటీన్గానే అనిపిస్తుంది. బడ్జెట్ను, కథా పరిధిని ఇంకాస్త పెంచుకుని, మిగిలిన అంశాలు కూడా జోడిస్తే మరింత బెటర్ గా ఉండేదేమో.
Read also: Kamal: అభిమానుల గిఫ్ట్ కి ఆగ్రహం వ్యక్తం చేసిన కమల్ హాసన్
