హైదరాబాద్ నగర రాజకీయ వాతావరణాన్ని వేడెక్కిస్తూ జూబ్లీహిల్స్ ఉప ఎన్నికలకు(Jubilee Hills By-Polls) నోటిఫికేషన్ విడుదలైంది. సిట్టింగ్ ఎమ్మెల్యే మాగంటి గోపీనాథ్ మరణంతో ఈ ఖాళీ స్థానం కోసం ఉప ఎన్నికలు తప్పనిసరయ్యాయి. ఎన్నికల కమిషన్ షెడ్యూల్ ప్రకారం నామినేషన్ ప్రక్రియ అక్టోబర్ 13 నుండి ప్రారంభమై 21 వరకు కొనసాగనుంది. అభ్యర్థులు షేక్పేట్ ఎమ్మార్వో కార్యాలయంలో తమ నామినేషన్లు దాఖలు చేయవచ్చు. ఉపసంహరణకు తుది గడువు అక్టోబర్ 24గా నిర్ణయించారు. నవంబర్ 11న పోలింగ్ జరగగా, 14న కౌంటింగ్ పూర్తిచేసి విజేతను ప్రకటిస్తారు. ఈ ఎన్నికలు రాష్ట్ర రాజకీయ సమీకరణాలపై ప్రత్యక్ష ప్రభావం చూపే అవకాశం ఉండటంతో అన్ని పార్టీలు ఈ సారి జూబ్లీహిల్స్ ఫలితంపై కన్నేశారు.
Telugu News: Sajjanar: హైదరాబాద్లో సేఫ్ రైడ్ ఛాలెంజ్ ప్రారంభం
ఎన్నికల కమిషన్ ఈసారి అభ్యర్థులకు సంప్రదాయ ఆఫ్లైన్ విధానం తో పాటు ఆన్లైన్ ద్వారా కూడా నామినేషన్ దాఖలు చేసే సదుపాయం కల్పించింది. అభ్యర్థులు https://encore.eci.gov.in వెబ్సైట్ ద్వారా డిజిటల్ నామినేషన్ సమర్పించవచ్చు. తర్వాత ఆ నామినేషన్కు సంబంధించిన క్యూఆర్ కోడ్తో ఉన్న హార్డ్ కాపీని ఎన్నికల అధికారికి అందజేయాలి. ఫారం 2బీ (నామినేషన్ ఫారం) మరియు ఫారం 26 (ఎన్నికల అఫిడవిట్)తో పాటు ఇతర అవసరమైన పత్రాలు సమర్పించడం తప్పనిసరి. రాజ్యాంగంలోని ఆర్టికల్ 173(బీ) ప్రకారం అభ్యర్థికి కనీసం 25 ఏళ్లు నిండాలి. రాష్ట్రంలోని ఏదైనా నియోజకవర్గంలో ఓటరుగా పేరు ఉండాలి. అదే రిజర్వ్డ్ నియోజకవర్గం అయితే అభ్యర్థి సంబంధిత సామాజిక వర్గానికి చెందినవారని నిర్ధారించే కుల ధ్రువీకరణ పత్రం సమర్పించాలి. జనరల్ సీట్లలో అన్ని వర్గాల అభ్యర్థులు పోటీ చేయవచ్చని ప్రజాప్రాతినిధ్య చట్టంలోని నిబంధనలు స్పష్టం చేస్తున్నాయి.
ఈ ఉప ఎన్నికల్లో ప్రధాన పార్టీల వ్యూహాలు ఇప్పటికే స్పష్టమయ్యాయి. కాంగ్రెస్ పార్టీ గతంలో జూబ్లీహిల్స్ నుంచి పోటీ చేసిన అనుభవజ్ఞుడు నవీన్ యాదవ్కు టికెట్ ఇచ్చింది. స్థానిక బీసీ వర్గాల మద్దతు తమవైపు ఉందని కాంగ్రెస్ ధీమాగా ఉంది. మరోవైపు బీఆర్ఎస్ మాత్రం సిట్టింగ్ ఎమ్మెల్యే గోపీనాథ్ కుటుంబానికి ప్రాధాన్యత ఇస్తూ ఆయన భార్య సునీతను అభ్యర్థిగా నిలబెట్టింది. సానుభూతి తరంగం తమకు అనుకూలంగా మారుతుందని ఆ పార్టీ విశ్వసిస్తోంది. అయితే బీజేపీ ఇంకా అభ్యర్థిని ప్రకటించకపోవడం రాజకీయంగా ఆసక్తికర అంశంగా మారింది. ఈ మూడు పార్టీల మధ్య జరిగే ఈ పోరు కేవలం ఓటర్ల నమ్మకాన్ని మాత్రమే కాదు, హైదరాబాద్ నగర రాజకీయ దిశను కూడా నిర్ణయించగలదని విశ్లేషకులు భావిస్తున్నారు.
Read hindi news: https://hindi.vaartha.com
Epaper : https://epaper.vaartha.com/
