విశాఖ స్టీల్ ప్లాంట్ లో ఈరోజు ఉదయం భారీ అగ్నిప్రమాదం సంభవించింది. విశాఖ స్టీల్ ప్లాంట్ (వీఎస్పీ) పరిధిలోని స్టీల్ మెల్టింగ్ షాప్-2 (SMS-2) విభాగంలో అకస్మాత్తుగా మంటలు చెలరేగి తీవ్ర అలజడి సృష్టించాయి. సాధారణ కార్యకలాపాలు సాగుతుండగా ఒక్కసారిగా దట్టమైన పొగలు ఎగిసిపడటం, జ్వాలలు వేగంగా వ్యాపించడం వర్కర్లను, అధికారులను ఆశ్చర్యానికి గురి చేసింది. ప్రమాద తీవ్రత కారణంగా మంటలు ప్లాంట్ లోపలికి వ్యాపించే అవకాశం ఉండటంతో అక్కడ ఉన్న సిబ్బంది అప్రమత్తమయ్యారు.
ప్లాంట్ వర్గాల సమాచారం ప్రకారం, (SMS-2) లోని ఒక పైప్లైన్ దెబ్బతినడంతో ఆయిల్ లీకై మంటలు వ్యాపించాయి. పైప్ లైన్లో ఏర్పడిన లీకేజీ కారణంగా ఆయిల్ బయటకు రావడంతో మంటలు వేగంగా వ్యాపించాయి. మంటలు చుట్టుపక్కల విస్తరించడంతో వాతావరణం పొగచూరుతో నిండిపోయింది. ఆ సమయంలో అక్కడ పనిచేస్తున్న కార్మికులు పెద్ద ఎత్తున బయటికెగబడతూ తమ ప్రాణాలను కాపాడుకున్నారు. ఈ ఘటనలో ఎలాంటి ప్రాణ నష్టం జరగకపోవడంతో అంతా ఊపిరి పీల్చుకున్నారు.
ఫైర్ సిబ్బంది సమయస్ఫూర్తితో మంటల అదుపు
అగ్నిప్రమాదాన్ని గమనించిన సిబ్బంది వెంటనే ఫైర్ అండ్ సేఫ్టీ (Fire and Safety) విభాగానికి సమాచారం అందించడంతో స్టీల్ ప్లాంట్కు చెందిన అగ్నిమాపక దళాలు ఘటనా స్థలానికి తొందరగా చేరుకున్నాయి. వారితో పాటు రెస్క్యూ టీమ్లు కూడా సంఘటన స్థలాన్ని అతి తక్కువ సమయంలో చేరుకుని మంటలను అదుపు చేసేందుకు కృషి మొదలుపెట్టారు. గంటలపాటు శ్రమించి వారు మంటలను పూర్తిగా అదుపులోకి తీసుకువచ్చారు. ఫైర్ బ్రిగేడ్ సిబ్బంది చూపిన సమయస్ఫూర్తి వల్లే భారీ ప్రాణ నష్టం నివారించగలిగినట్లు అధికారులు వెల్లడించారు.
ప్రాథమికంగా భారీ ఆస్తి నష్టం అంచనా
ఈ ప్రమాదం కారణంగా భారీగా యంత్రాలు, పైప్లైన్లు, ఇతర పరికరాలు ధ్వంసమయ్యాయి. మంటల ప్రభావంతో ఆ ప్రాంతంలో ఉన్న రా మెటీరియల్తో పాటు, కీలకమైన ఇన్ఫ్రాస్ట్రక్చర్ తీవ్రంగా దెబ్బతిన్నట్లు సమాచారం. మొత్తం నష్టం విలువ ఎంతో స్పష్టంగా తెలియాల్సి ఉన్నా, ప్రాథమిక అంచనాల ప్రకారం లక్షల రూపాయల మేరకు ఆస్తి నష్టం జరిగినట్లు భావిస్తున్నారు. ఈ ప్రమాదం నేపథ్యంలో ప్లాంట్ అధికారులు సమగ్రంగా విచారణ చేపట్టే అవకాశముంది. ప్రమాదానికి గల కారణాలను పూర్తిగా గుర్తించి భవిష్యత్తులో ఇలాంటి ఘటనలు మరల తలెత్తకుండా జాగ్రత్తలు తీసుకోనున్నట్లు ప్లాంట్ వర్గాలు పేర్కొంటున్నాయి.
ఉద్యోగుల భద్రతపై మరింత శ్రద్ధ అవసరం
ఈ తరహా ప్రమాదాలు విశాఖ స్టీల్ ప్లాంట్ వంటి భారీ పరిశ్రమలలో భద్రత ప్రమాణాలపై పలు ప్రశ్నలు వేస్తున్నాయి. ఇలాంటి చోట్ల చిన్న పొరపాట్లు పెద్ద ప్రమాదాలకు దారితీసే అవకాశమున్నందున, ప్రతి విభాగంలో భద్రతా నిబంధనలను కచ్చితంగా పాటించాల్సిన అవసరం కనిపిస్తోంది. ఇప్పటికైనా యాజమాన్యం భద్రతా చర్యలను మరింత పటిష్టం చేయడం అత్యవసరంగా మారింది.
Read also: Kodali Nani: కొడాలి నానిపై లుకౌట్ నోటీసులు
