తెలంగాణ రాజకీయాల్లో ఫోన్ ట్యాపింగ్ వ్యవహారం మరోసారి తీవ్ర దుమారం రేపుతోంది. బీఆర్ఎస్ (BRS) నేత, మాజీ ఐపీఎస్ అధికారి ఆర్.ఎస్. ప్రవీణ్ కుమార్ మరియు ఐపీఎస్ అధికారి వి.సి. సజ్జనార్ మధ్య మాటల యుద్ధం ముదిరి పాకాన పడింది. మీడియా సమావేశంలో ప్రవీణ్ కుమార్ సంచలన ఆరోపణలు చేశారు. సజ్జనార్పై గతంలోనే 7 ఫోన్ ట్యాపింగ్ కేసులు ఉన్నాయని, అటువంటి వ్యక్తిని ట్యాపింగ్ కేసు విచారణకు సంబంధించిన సిట్ (SIT) చీఫ్గా లేదా కీలక బాధ్యతల్లో ఎలా నియమిస్తారని ఆయన ప్రశ్నించారు. నిందితుడి స్థానంలో ఉండాల్సిన వ్యక్తే విచారణ అధికారిగా ఎలా ఉంటారని ఆయన ధ్వజమెత్తారు.
Phone Tapping : వారందరి ఫోన్లు ట్యాప్ అవుతున్నాయని కొత్త అనుమానాలు బయటపెట్టిన కేటీఆర్
ప్రవీణ్ కుమార్ చేసిన ఈ ఆరోపణలపై సజ్జనార్ అత్యంత వేగంగా స్పందించారు. తనపై చేసిన ఆరోపణలు నిరాధారమైనవని కొట్టిపారేస్తూ, ప్రవీణ్ కుమార్కు లీగల్ నోటీసులు జారీ చేశారు. తన ప్రతిష్ఠకు భంగం కలిగించేలా మాట్లాడినందుకు గాను, ఆ ఆరోపణలకు సంబంధించిన పక్కా ఆధారాలను సమర్పించాలని డిమాండ్ చేశారు. కేవలం రాజకీయ ప్రయోజనాల కోసమే ఇటువంటి వ్యాఖ్యలు చేస్తున్నారని ఆయన ఆగ్రహం వ్యక్తం చేశారు. కేవలం రెండు రోజుల సమయం ఇస్తున్నామని, ఈలోపు ఆధారాలు చూపకుంటే చట్టపరమైన క్రిమినల్ చర్యలు తీసుకుంటామని నోటీసుల్లో స్పష్టం చేశారు.
ఈ పరిణామం ఇప్పుడు రాష్ట్రవ్యాప్తంగా చర్చనీయాంశమైంది. ఒకప్పుడు సహచర అధికారులుగా ఉన్న ఇద్దరు ఐపీఎస్ స్థాయి వ్యక్తులు ఇప్పుడు ప్రత్యర్థులుగా మారి కోర్టు నోటీసుల వరకు వెళ్లడం గమనార్హం. ఫోన్ ట్యాపింగ్ కేసులో ఇప్పటికే పలువురు ఉన్నతాధికారులు జైలులో ఉండగా, ఇప్పుడు నేరుగా సిట్ బాధ్యతలపైనే ఆరోపణలు రావడం ఈ విచారణను మరిన్ని మలుపులు తిప్పేలా కనిపిస్తోంది. రాబోయే 48 గంటల్లో ఆర్.ఎస్. ప్రవీణ్ కుమార్ తన దగ్గర ఉన్న ఆధారాలను బయటపెడతారా లేక సజ్జనార్ న్యాయపోరాటం దిశగా అడుగులు వేస్తారా అన్నది ఆసక్తికరంగా మారింది.
Read hindi news: hindi.vaartha.com
Epaper : epaper.vaartha.com
