తెలంగాణను వణికిస్తున్న ఫోన్ ట్యాపింగ్ కేసులో బీఆర్ఎస్ నేత, మాజీ ఐపీఎస్ అధికారి ఆర్.ఎస్. ప్రవీణ్ కుమార్ చేసిన వ్యాఖ్యలు ఇప్పుడు కొత్త చర్చకు దారితీశాయి. ఫోన్ ట్యాపింగ్ అనేది నేరం కాదని, దేశ రక్షణ మరియు ప్రజల భద్రత కోసం ప్రభుత్వాలు ఫోన్లు, ఈమెయిల్స్ ట్యాప్ చేయడం సాధారణమేనని ఆయన సమర్థించుకొచ్చారు. గతంలో మన్మోహన్ సింగ్ ప్రధానిగా ఉన్నప్పుడు కూడా ఇదే విషయాన్ని చెప్పారని ఆయన గుర్తు చేశారు. అయితే, కేటీఆర్ విచారణకు హాజరవుతున్న తరుణంలో ఒక మాజీ పోలీసు అధికారి హోదాలో ఆయన ఈ విధమైన “జనరలైజేషన్” వాదనను తెరపైకి తీసుకురావడం వెనుక, రాబోయే చట్టపరమైన చిక్కుల నుండి తప్పించుకునే వ్యూహం ఉందని విశ్లేషకులు భావిస్తున్నారు.
Srinagar: భారీ వర్షం కారణంగా శ్రీనగర్ విమానాశ్రయంలో అన్ని విమానాలు రద్దు
ప్రవీణ్ కుమార్ వాదనలో కొంత నిజం ఉన్నప్పటికీ, చట్టం కల్పించిన ఈ వెసులుబాటు కేవలం జాతీయ భద్రతకు ముప్పు ఉన్నప్పుడు మాత్రమే వర్తిస్తుంది. కానీ, తెలంగాణలో జరిగిన ట్యాపింగ్ వ్యవహారం రాజకీయ అవసరాల కోసం, ప్రత్యర్థులపై నిఘా ఉంచడానికి మరియు పారిశ్రామికవేత్తలను బ్లాక్ మెయిల్ చేయడానికి వాడారనేది ప్రధాన ఆరోపణ. వ్యక్తిగత గోప్యతకు భంగం కలిగిస్తూ, రాజకీయ లబ్ధి కోసం అధికార యంత్రాంగాన్ని వాడుకోవడం అనేది రాజ్యాంగ విరుద్ధం మరియు తీవ్రమైన నేరం. చట్టం ప్రకారం అనుమతి లేకుండా లేదా తప్పుడు కారణాలతో ట్యాపింగ్ చేయడం శిక్షార్హమైన అంశమని, దీనిని సాధారణ పరిపాలనా ప్రక్రియగా చూపడం సాధ్యం కాదని న్యాయ నిపుణులు చెబుతున్నారు.
మరో ఆసక్తికరమైన విషయం ఏమిటంటే, గతంలో ఆర్.ఎస్. ప్రవీణ్ కుమార్ బీఎస్పీలో ఉన్నప్పుడు తన ఫోన్ ట్యాప్ చేస్తున్నారని స్వయంగా ఆరోపణలు చేశారు. అప్పట్లో దానిని నేరంగా పరిగణించిన ఆయన, ఇప్పుడు బీఆర్ఎస్ లో చేరాక అది నేరం కాదని చెప్పడం ఆయన ద్వంద్వ వైఖరిని సూచిస్తోందని విమర్శలు వస్తున్నాయి. రాష్ట్రంలో జరిగిన ట్యాపింగ్ కేవలం రాజకీయ నేతలకే పరిమితం కాకుండా, చివరికి సొంత కుటుంబ సభ్యులపై కూడా నిఘా పెట్టే స్థాయికి చేరిందనే ఆధారాలు దొరకడం పరిస్థితి తీవ్రతను తెలియజేస్తోంది. ఎన్ని వాదనలు చేసినా, చట్ట విరుద్ధంగా జరిగిన ఈ ట్యాపింగ్ వ్యవహారం నేరం కాకుండా పోదని, నిందితులు చట్టానికి సమాధానం చెప్పాల్సిందేనని ప్రజలు భావిస్తున్నారు.
Read hindi news: hindi.vaartha.com
Epaper : epaper.vaartha.com
