“నాకు చైనా అధ్యక్షుడు షీ జిన్పింగ్ అంటే చాలా గౌరవం ఉంది. చైనా పట్ల కూడా గౌరవం ఉంది. అయితే వాళ్లు దాన్ని అవకాశంగా తీసుకుంటున్నారు” అని ట్రంప్ తన ప్రసంగంలో అన్నారు. అమెరికన్ ఉత్పత్తులకు వాణిజ్యపరమైన ఆటంకాలు సృష్టిస్తున్న దేశాలు, ప్రాంతాల జాబితాను చూపుతూ ట్రంప్ ” మీరు ఇక్కడ చూస్తే.. చైనా, అమెరికన్ వస్తువుల మీద 67 శాతం పన్నులతో తొలి వరుసలో ఉంది. అందులో కరెన్సీ అక్రమాలు, వాణిజ్య అక్రమాలు కూడా ఉన్నాయి” అని చెప్పారు. “మేం కూడా వాళ్ల కు కొంచెం రాయితీ ఇస్తూ 34 శాతం పరస్పర సుంకాన్ని విధిస్తున్నాం. సూటిగా చెప్పాలంటే, మీరు సుంకాలు విధిస్తే, మేం కూడా అదే చేస్తాం. అయితే మనం విధించే సుంకాలు కాస్త తక్కువ. సుంకాల విధింపుపై చైనా వాణిజ్య శాఖ తక్షణం స్పందించింది. ఇది “ఏకపక్ష బెదిరింపు చర్య” అని ప్రకటించింది. తమ హక్కులు, ప్రయోజనాలు కాపాడుకునేందుకు పటిష్టమైన చర్యలు చేపడతామని” తెలిపింది. డోనల్డ్ ట్రంప్ ‘‘రెండు దేశాల వాణిజ్యాన్ని చాలా తేలికగా దెబ్బకు దెబ్బ లాంటి ఆటగా మార్చారని” చైనా అధికారిక వార్తా సంస్థ జిన్హువా ఆరోపించింది. బీజింగ్ ఆందోళనకు సరైన కారణాలు ఉన్నాయని నిపుణులు భావిస్తున్నారు.
తాజా ప్రకటనతో 20శాతం పెరుగుతాయి
అమెరికా ఇప్పటికే చైనా ఉత్పత్తుల మీద భారీగా సుంకాలు విధిస్తోంది. ట్రంప్ తాజా ప్రకటనతో ఈ సుంకాలు ఇప్పుడు 20శాతం పెరుగుతాయి. మరొకటి, ట్రంప్ తొలిసారి అధ్యక్షుడైనప్పుడు చైనా మీద విధించిన సుంకాల వల్ల ఆ దేశం తన సరఫరా వ్యవస్థను విస్తరించింది. అయితే ఇప్పుడు అగ్నేయాసియా దేశాలైన కాంబోడియా, వియత్నాం, లావోస్ లాంటి ఆగ్నేయాసియా దేశాల మీద భారీగా సుంకాలు విధించడం ద్వారా అలాంటి అవకాశాలను లేకుండా చేసింది. ట్రంప్ భారీగా సుంకాలు విధించిన 10 దేశాల్లో ఐదు ఆసియా దేశాలే ఉన్నాయి.
