Velugumatla Victims: ఖమ్మం వెలుగుమట్ల బాధితుల పక్షాన భారత్ రాష్ట్ర సమితి (BRS) చేసిన సుదీర్ఘ పోరాటం ఎట్టకేలకు ఒక కొలిక్కి వచ్చింది. ఇళ్లు కోల్పోయిన వారందరికీ అక్కడే స్థలాలు ఇచ్చే వరకు అండగా ఉంటామని బీఆర్ఎస్ వర్కింగ్ ప్రెసిడెంట్ కేటీఆర్ ఇచ్చిన హామీ మేరకు, గత 15 రోజులుగా ఆ పార్టీ నేతలు బాధితులకు భోజన వసతి కల్పిస్తూ నిరసనలు కొనసాగించారు. ప్రతిపక్షాల నుంచి ఒత్తిడి పెరగడంతో ప్రభుత్వం స్పందించి, బాధితులకు పట్టాలు ఇచ్చేందుకు చర్యలు చేపట్టింది. ప్రస్తుతం ఖమ్మం కలెక్టరేట్లో రెవెన్యూ అధికారులు అర్హులైన వారిని గుర్తించి టోకెన్లు జారీ చేస్తున్నారు.
311 మందికి పట్టాల పంపిణీ.. మిగిలిన బాధితుల ఆందోళన
ప్రభుత్వ లెక్కల ప్రకారం ప్రాథమికంగా 311 మందిని బాధితులుగా గుర్తించి, వారికి భూదాన్ భూముల్లో ఒక్కొక్కరికి 75 గజాల చొప్పున ఇళ్ల పట్టాలు ఇచ్చేందుకు అధికారులు సన్నాహాలు చేస్తున్నారు. బుధవారం ముగ్గురు మంత్రుల చేతుల మీదుగా ఈ పట్టాల పంపిణీ కార్యక్రమం జరగనుంది. అయితే, అధికారులు సుమారు 700 ఇళ్లను కూల్చివేసి, కేవలం 300 మందినే బాధితులుగా చూపడంపై తీవ్ర విమర్శలు వ్యక్తమవుతున్నాయి. తమ పేర్లు జాబితాలో లేకపోవడంతో మిగిలిన బాధితులు ఆందోళనతో కలెక్టరేట్కు చేరుకుంటున్నారు. ఇళ్లు కోల్పోయిన ప్రతి ఒక్కరికీ న్యాయం జరిగే వరకు తమ పోరాటం ఆగదని బీఆర్ఎస్ నేతలు స్పష్టం చేస్తున్నారు.
Read hindi news: hindi.vaartha.com
Epaper : epaper.vaartha.com
Read Also :
