తెలంగాణ మరియు ఆంధ్రప్రదేశ్ రాష్ట్రాల మధ్య నీటి పారుదల ప్రాజెక్టుల వివాదం మరోసారి ముదిరింది. ఆంధ్రప్రదేశ్ ప్రభుత్వం ప్రతిపాదించిన ‘నల్లమల సాగర్’ ప్రాజెక్టుకు సంబంధించిన సమగ్ర ప్రాజెక్టు నివేదిక (DPR) ప్రక్రియను వెంటనే నిలిపివేయాలని తెలంగాణ ప్రభుత్వం గట్టిగా డిమాండ్ చేస్తోంది. ఈ ప్రాజెక్టు నిర్మాణం వల్ల తెలంగాణ ప్రయోజనాలకు విఘాతం కలుగుతుందని భావిస్తున్న రాష్ట్ర ప్రభుత్వం, ఈ అంశంపై కేంద్ర జలశక్తి మంత్రిత్వ శాఖకు తెగేసి చెప్పింది. ఒకవేళ ఏపీ తన డీపీఆర్ ప్రక్రియను ఆపకపోతే, ఈ నెల 30న ఢిల్లీలో జరగనున్న అత్యున్నత స్థాయి కమిటీ సమావేశానికి తాము హాజరుకాబోమని తెలంగాణ ఇరిగేషన్ కార్యదర్శి రాహుల్ బొజ్జా స్పష్టం చేశారు.
Konaseema feast : కొత్త అల్లుడికి 1,574 రకాల వంటకాలతో భారీ విందు
కేంద్ర జలశక్తి శాఖకు రాసిన లేఖలో తెలంగాణ ప్రభుత్వం తన అసహనాన్ని వ్యక్తం చేసింది. ఆంధ్రప్రదేశ్ ప్రభుత్వం చేపడుతున్న అక్రమ ప్రాజెక్టుల విషయంలో తెలంగాణ ఎన్నిసార్లు విజ్ఞప్తి చేసినా, కేంద్రం సరైన రీతిలో స్పందించడం లేదని ఆక్షేపించింది. నల్లమల సాగర్ వంటి ప్రాజెక్టుల వల్ల కృష్ణా నదీ జలాల పంపిణీలో తమకు దక్కాల్సిన వాటాకు గండి పడుతుందని తెలంగాణ వాదిస్తోంది. తమ అభ్యంతరాలను పరిగణనలోకి తీసుకోకుండా చర్చలు జరపడంలో అర్థం లేదని, అందుకే కేంద్రం తన వైఖరిని మార్చుకోకపోతే తమ అధికారులు ఢిల్లీ భేటీకి వెళ్లరని ప్రభుత్వం స్పష్టమైన హెచ్చరికలు జారీ చేసింది.
ఈ వివాదం తెలుగు రాష్ట్రాల మధ్య జల జగడాన్ని మరింత తీవ్రతరం చేసేలా కనిపిస్తోంది. ఒకవైపు ఏపీ తన అవసరాల కోసం ప్రాజెక్టులను ముందుకు తీసుకెళ్లే ప్రయత్నం చేస్తుండగా, తెలంగాణ తన హక్కుల రక్షణ కోసం పోరాడుతోంది. కేంద్రం ఈ విషయంలో జోక్యం చేసుకుని, రెండు రాష్ట్రాల మధ్య సమన్వయం కుదిర్చకపోతే రానున్న రోజుల్లో ప్రాజెక్టుల నిర్మాణం మరియు నీటి కేటాయింపులపై మరింత ప్రతిష్టంభన ఏర్పడే అవకాశం ఉంది. జనవరి 30 భేటీకి ముందే కేంద్రం ఏ విధమైన నిర్ణయం తీసుకుంటుందనేది ఇప్పుడు ఇరు రాష్ట్రాల్లో ఆసక్తికరంగా మారింది.
Read hindi news: hindi.vaartha.com
Epaper : epaper.vaartha.com
