నల్గొండ జిల్లాలో జరుగుతున్న మున్సిపల్ ఎన్నికల ఫలితాల్లో అధికార కాంగ్రెస్ పార్టీ తన పట్టును నిరూపించుకుంది. కౌంటింగ్ ప్రారంభమైన తొలి గంటల నుండే జిల్లాలోని పలు పురపాలక సంఘాల్లో హస్తం పార్టీ అభ్యర్థులు స్పష్టమైన ఆధిక్యాన్ని కనబరిచారు.
నల్గొండ జిల్లాలోని నందికొండ మున్సిపాలిటీలో కాంగ్రెస్ పార్టీ ఏకపక్ష విజయాన్ని నమోదు చేసింది. ఇక్కడ మొత్తం 12 వార్డులకు గాను ఏకంగా 11 స్థానాలను కాంగ్రెస్ కైవసం చేసుకుని రికార్డు సృష్టించింది. ప్రతిపక్ష బిఆర్ఎస్ (BRS) కేవలం ఒకే ఒక్క స్థానంతో సరిపెట్టుకోవాల్సి వచ్చింది. సాగర్ ఉపఎన్నికల నాటి నుండే ఇక్కడ బలంగా ఉన్న కాంగ్రెస్, ఇప్పుడు మున్సిపల్ పీఠాన్ని దక్కించుకోవడంతో ఆ పార్టీ శ్రేణుల్లో సంబరాలు మిన్నంటాయి. ఓటర్లు అభివృద్ధికి పట్టం కట్టారని, అందుకే ఈ స్థాయి మెజారిటీ వచ్చిందని స్థానిక నేతలు హర్షం వ్యక్తం చేస్తున్నారు.
Telangana vote counting : తెలంగాణ ఫలితాలు, ఎవరి జైత్రయాత్ర?
సీనియర్ నేత జానారెడ్డి ఇలాకాగా పేరొందిన హాలియా మున్సిపాలిటీలోనూ కాంగ్రెస్ తన ఆధిపత్యాన్ని చాటుకుంది. ఇక్కడ ఉన్న 12 వార్డుల్లో 10 చోట్ల కాంగ్రెస్ అభ్యర్థులు జయభేరి మోగించగా, బిఆర్ఎస్ కేవలం 2 వార్డులకే పరిమితమైంది. దీంతో హాలియా మున్సిపల్ పీఠంపై కాంగ్రెస్ జెండా ఎగరడం ఖాయమైంది. అదేవిధంగా చండూరు మున్సిపాలిటీని సైతం కాంగ్రెస్ పార్టీ కైవసం చేసుకుంది. మునుగోడు నియోజకవర్గ పరిధిలోకి వచ్చే చండూరులో గెలుపు కాంగ్రెస్కు రాజకీయంగా కీలకమైన మైలేజీని ఇచ్చింది. జిల్లాలోని ముఖ్యమైన మున్సిపాలిటీలన్నీ ఒకే పార్టీ ఖాతాలోకి వెళ్లడం విశేషం.
నల్గొండ జిల్లా ఎప్పుడూ కాంగ్రెస్కు కంచుకోటగా ఉంటూ వస్తోంది, తాజా ఫలితాలు ఆ నమ్మకాన్ని మరోసారి నిజం చేశాయి. బిఆర్ఎస్ కంచుకోటలను బద్దలు కొడుతూ కాంగ్రెస్ అభ్యర్థులు సాధించిన ఈ విజయం, రాబోయే రోజుల్లో జిల్లా రాజకీయాల్లో కీలక మార్పులకు సంకేతంగా కనిపిస్తోంది. గెలిచిన అభ్యర్థులు ఈ నెల 16న ప్రమాణస్వీకారం చేయనుండటంతో, మున్సిపల్ చైర్మన్ల ఎంపికపై ఇప్పుడు అందరి దృష్టి నిలిచింది. ఫలితాల వెల్లడితో నల్గొండ జిల్లా వ్యాప్తంగా కాంగ్రెస్ కార్యకర్తలు బాణసంచా కాల్చి, విజయోత్సవ ర్యాలీలతో సందడి చేస్తున్నారు.
Read hindi news: hindi.vaartha.com
Read Also Epaper : epaper.vaartha.com
