తెలంగాణ ప్రభుత్వం ఈ దసరా (Dasara) పండుగ సందర్భంగా రాష్ట్రంలోని స్వయం సహాయక సంఘాల (SHG) మహిళలకు ఉచితంగా చీరలు అందించేందుకు సిద్ధమవుతోంది. గతంలో రద్దు చేసిన బతుకమ్మ చీరల స్కీమ్ స్థానంలో కొత్తగా ఈ చీరల పంపిణీ పథకాన్ని ప్రారంభించనున్నారు. ప్రతి ఏడాది రెండేసి చీరలు అందించాలన్న ఉద్దేశంతో ప్రభుత్వం ముందుకెళ్లింది. ఈ స్కీమ్ కోసం ఇప్పటికే రూ. 318 కోట్లు కేటాయించారు. ఇప్పటికే 1.25 కోట్ల చీరల తయారీ పూర్తవగా, మరో 40 లక్షల చీరల తయారీ పనులు వేగంగా కొనసాగుతున్నాయి.
చేనేత కార్మికులకు ఉపాధి – నాణ్యతకు ప్రాధాన్యం
ఈ పథకం అమలుతో రాష్ట్రంలోని అనేక చేనేత కార్మికులకు (Handloom Workers) ఉపాధి లభిస్తోంది. గతంలో కేవలం సిరిసిల్ల ప్రాంతానికి పరిమితమై ఉన్న చీరల తయారీ ఇప్పుడు కరీంనగర్, జగిత్యాల, పెద్దపల్లి, మంచిర్యాల, హనుమకొండ జిల్లాలకు విస్తరించింది. మొత్తం 11 ప్రాంతాలకు ఆర్డర్లు ఇచ్చారు. దాంతో 10 వేల మందికి ఉపాధి కలిగింది. ఒక్కో కార్మికుడికి నెలకు సుమారు రూ. 25 వేలు వేతనం అందుతోంది. చేనేత, జౌళి శాఖ కమిషనర్ శైలజారామయ్య నిపుణులతో చర్చించి డిజైన్లు రూపొందించి, సీఎం రేవంత్ రెడ్డి ఆమోదం పొందినట్లు తెలిపారు.
చీరల పంపిణీకి సమాయత్తం – దసరా నాటికి అందుబాటులోకి
60 ఏళ్ల లోపు ఉన్న మహిళలకు 6 మీటర్ల చీరలు, 60 ఏళ్లు పైబడిన వారికి 9.5 మీటర్ల చీరలు ఇవ్వనున్నారు. గ్రామీణ ప్రాంతాల్లో 48 లక్షల SHG మహిళలు, పట్టణాల్లో 17 లక్షల మంది లబ్దిదారులున్నారు. సెప్టెంబర్ చివరి నాటికి అన్ని చీరలు సిద్ధమవుతాయని అధికారులు తెలిపారు. నాణ్యతపై ప్రత్యేక దృష్టి సారించి, పనులను నిరంతరం పర్యవేక్షిస్తున్నారు. 131 పరస్పర సహాయ సంఘాలు, 56 చిన్న పరిశ్రమల యూనిట్లు ఈ కార్యక్రమంలో భాగంగా ఉన్నాయంటే, మహిళల అభివృద్ధికి ప్రభుత్వం తీసుకుంటున్న చర్యలు అభినందనీయం.
Read Also : Drug Racket : హైదరాబాద్ పబ్లలో మరోసారి డ్రగ్స్ కలకలం
