తెలంగాణ (Telangana) రాష్ట్రంలో ఇటీవల జరిగిన మంత్రివర్గ విస్తరణ (Cabinet expansion) ఆశించిన వారిలో అనేకమందికి నిరాశను మిగిల్చింది. ముఖ్యంగా సీనియర్ నేతలు పదవుల ఆశలో ఉన్నప్పటికీ, సీఎమ్ రేవంత్ రెడ్డి తొలిసారి ఎమ్మెల్యేలుగా గెలిచిన అడ్డూరి లక్ష్మణ్, వాకాటి శ్రీహరి, మరియు మాజీ ఎంపీ వివేక్ వెంకటస్వామిని మంత్రులుగా నియమించారు. దీనితో చాలామంది సీనియర్ నేతల్లో అసంతృప్తి మొదలైంది.
మల్రెడ్డి అసంతృప్తి – సొంత గళంతో స్పందన
ఈ నేపథ్యంలో అసంతృప్తి వ్యక్తం చేసిన నేతల్లో ఒకరు ఇబ్రహీంపట్నం నియోజకవర్గ ఎమ్మెల్యే మల్రెడ్డి రంగారెడ్డి (Malreddy Rangareddy). ఆయన మీడియాతో మాట్లాడుతూ, తాము పదేళ్లు బీఆర్ఎస్తో పోరాడామని, కాంగ్రెస్ను కాపాడింది తామేనని చెప్పుకొచ్చారు. పార్టీ లైన్లోనే ఉంటానని పేర్కొన్నారు. పది ఉమ్మడి జిల్లాలకు మంత్రి పదవులు ఇవ్వాలని ఆయన డిమాండ్ చేశారు.
తమ మొరను అధిష్ఠానం వినలేదని ఆవేదన వ్యక్తం చేశారు. పార్టీలో కొత్తవారికి పదవులు ఇస్తే కార్యకర్తలు బాధపడతారని, పార్టీకి ఇబ్బందికర పరిస్థితి వస్తుందని అన్నారు. కొన్ని జిల్లాలకే రెండు, మూడు మంత్రి పదవులు ఇస్తున్నారని తెలిపారు. హైదరాబాద్, రంగారెడ్డి జిల్లాలకు గతంలో ఆరుగురు మంత్రులు ఉండేవారని గుర్తు చేశారు. తమ బాధను అధిష్ఠానానికి చెప్పే అవకాశం పీసీసీ చీఫ్ ఇవ్వాలని కోరారు.
సామాజిక న్యాయం పేరుతో అవమానం?
తనకు సామాజికవర్గమే అడ్డు వస్తే పార్టీ కోసం పదవిని త్యాగం చేస్తానని పేర్కొన్నారు. కానీ ఈ విషయం ఓ సారి అధిష్ఠానం బహిరంగంగా స్పష్టత ఇవ్వాలి అని చెప్పారు.
మల్రెడ్డి రాజకీయ ప్రస్థానం
మల్రెడ్డి రాజకీయ ప్రస్థానం చూస్తే 1981లో తెలుగుదేశం పార్టీ ద్వారా రాజకీయాల్లోకి వచ్చారు. 1981లో తోరూర్ సర్పంచ్గా గెలిచిన ఆయన 1986లో హైదరాబాద్ డీసీసీబీ డైరెక్టర్గా పని చేశారు. 1994లో మలక్పేట నియోజకవర్గం నుంచి టీడీపీ అభ్యర్థిగా పోటీ చేసి తొలిసారిగా ఎమ్మెల్యే అయ్యారు. 1999 ఎన్నికల్లో టీడీపీ పొత్తులో భాగంగా తన సిట్టింగ్ స్థానాన్ని బీజేపీకి కేటాయించడంతో ఆయన టీడీపీకి రాజీనామా చేసి కాంగ్రెస్ పార్టీలో చేరారు.
ఆ తర్వాత కాంగ్రెస్ పార్టీ నుంచి 2004లో అదే నియోజకవర్గం నుంచి పోటీ చేసి కాంగ్రెస్ అభ్యర్థిగా గెలిచారు. 2009 ఎన్నికల్లో ఇబ్రహీంపట్నం నియోజకవర్గం నుంచి, 2014 ఎన్నికల్లో మహేశ్వరం నియోజకవర్గం నుంచి కాంగ్రెస్ పార్టీ అభ్యర్థిగా పోటీ చేసి ఓడిపోయారు.
2018 ఎన్నికల్లో కాంగ్రెస్ పార్టీ టికెట్ ఇవ్వకపోవడంతో బీఎస్పీ నుండి పోటీ చేసి స్వల్ప ఓట్ల తేడాతో బీఆర్ఎస్ అభ్యర్థిపై ఓటమి చెందారు. ఆ తర్వాత మళ్లీ కాంగ్రెస్ పార్టీలో చేరగా, 2023 ఎన్నికల్లో ఇబ్రహీంపట్నం నుంచి ఎమ్మెల్యేగా గెలిచారు.
Read also: CM Revanth : నేడు ఢిల్లీకి సీఎం రేవంత్
‘Kaleswaram’ Investigation : నేడు ‘కాళేశ్వరం’ విచారణకు హరీశ్ రావు
