తెలంగాణలో ఫోన్ ట్యాపింగ్ కేసు చుట్టూ సాగుతున్న రాజకీయ పరిణామాలు ఇప్పుడు ‘మాటల యుద్ధానికి’ దారితీశాయి. సిట్ నోటీసులపై సిరిసిల్ల వేదికగా స్పందించిన బీఆర్ఎస్ వర్కింగ్ ప్రెసిడెంట్ కేటీఆర్, ముఖ్యమంత్రి రేవంత్ రెడ్డి లక్ష్యంగా ఘాటైన విమర్శలు చేశారు. ఫోన్ ట్యాపింగ్ కేసులో సిట్ (SIT) విచారణ సాగుతున్న తీరును కేటీఆర్ ఎద్దేవా చేశారు. ఈ విచారణ ఎప్పటికీ ముగియని ‘కార్తీకదీపం’ సీరియల్ లాగా మారిందని, ప్రజలను తప్పుదోవ పట్టించేందుకే దీన్ని సాగదీస్తున్నారని విమర్శించారు. ప్రస్తుత సిట్ వ్యవస్థ స్వతంత్రంగా పనిచేయడం లేదని, ముఖ్యమంత్రి రేవంత్ రెడ్డి “సిట్ అంటే కూర్చోవడం, స్టాండ్ అంటే నిలబడటం” (SIT means Sit, Stand) అన్నట్లుగా వ్యవహరిస్తోందని ఎద్దేవా చేశారు. ప్రభుత్వం తన రాజకీయ అవసరాల కోసం దర్యాప్తు సంస్థలను రిమోట్ కంట్రోల్తో నడిపిస్తోందని, అసలు విచారణ కంటే ప్రచారానికే ప్రాధాన్యత ఇస్తున్నారని ఆయన ఆరోపించారు.
Davos: సీఎం రేవంత్ను కలిసిన ఏపీ మంత్రి లోకేశ్
ఈ నోటీసుల వెనుక ‘డైవర్షన్ పాలిటిక్స్’ ఉందన్నది కేటీఆర్ ప్రధాన ఆరోపణ. ఎన్నికల సమయంలో కాంగ్రెస్ ఇచ్చిన హామీల అమలుపై ప్రజలు నిలదీస్తుంటే, ఆ చర్చను మళ్లించేందుకే ఈ ఫోన్ ట్యాపింగ్ అంశాన్ని తెరపైకి తెస్తున్నారని మండిపడ్డారు. ముఖ్యమంత్రి బామ్మర్దికి సంబంధించిన స్కామ్లు, మంత్రి పొంగులేటి శ్రీనివాస్ రెడ్డి కుమారుడిపై వస్తున్న భూకబ్జా ఆరోపణల గురించి ప్రభుత్వం ఎందుకు మౌనంగా ఉందని ప్రశ్నించారు. నిజంగా ప్రభుత్వానికి చిత్తశుద్ధి ఉంటే, తమ వారిపై వస్తున్న ఆరోపణలపై కూడా సిట్ వేసి విచారణ జరిపించే ధైర్యం ఉందా అని ఆయన సవాల్ విసిరారు.
సింగరేణి మరియు నైనీ కోల్ బ్లాక్ వ్యవహారంలో జరిగిన అక్రమాలను మాజీ మంత్రి హరీశ్ రావు బయటపెట్టినందుకే, ఆయనను టార్గెట్ చేసి నోటీసులు ఇచ్చారని కేటీఆర్ వాదించారు. ప్రభుత్వ లోపాలను ఎండగట్టినందుకు ప్రతిఫలంగానే విచారణల పేరుతో వేధిస్తున్నారని ఆరోపించారు. ఎన్ని నోటీసులు ఇచ్చినా, ఎన్ని గంటలు విచారించినా తాము భయపడబోమని, ప్రజల పక్షాన పోరాటం ఆపబోమని స్పష్టం చేశారు. కేటీఆర్ చేసిన ఈ వ్యాఖ్యలు ఇప్పుడు అధికార పక్షానికి మరియు ప్రతిపక్షానికి మధ్య ఉన్న రాజకీయ వైరాన్ని మరింత పెంచాయి, రాబోయే రోజుల్లో ఈ వివాదం ఏ మలుపు తిరుగుతుందోనని ఉత్కంఠ నెలకొంది.
Read hindi news: hindi.vaartha.com
Epaper : epaper.vaartha.com
