Fake Tea Powder : హైద్రాబాద్ లో నకిలీ టీ పౌడరు, సర్ఫ్‌ తయారు చేసే ముఠా అరెస్ట్

భాగ్యనగరంలో నకిలీ వస్తువుల తయారీ మరియు విక్రయాలకు పాల్పడుతున్న భారీ ముఠాను హైదరాబాద్ పోలీసులు రట్టు చేశారు. ప్రజల ఆరోగ్యం కంటే లాభమే పరమావధిగా భావిస్తూ, నిత్యవసర వస్తువులైన టీ పౌడర్ నుంచి బట్టల సోపుల వరకు అన్నింటినీ కల్తీ చేస్తున్న ఈ ముఠా ఉదంతం ఇప్పుడు నగరవాసులను ఆందోళనకు గురిచేస్తోంది.

రాజమండ్రిలో కల్తీ పాల ఘటన తర్వాత అప్రమత్తమైన హైదరాబాద్ సీసీఎస్ (CCS) మరియు స్థానిక పోలీసులు సంయుక్తంగా అఫ్జల్‌గంజ్, గోషామహల్ పరిసరాల్లో మెరుపు దాడులు నిర్వహించారు. ఈ సోదాల్లో కచ్చవా సురేందర్, హనుమాన్ రామ్, జైరాం రాబరీ అనే ముగ్గురు నిందితులను అరెస్ట్ చేశారు. వీరి వద్ద నుంచి భారీ ఎత్తున నకిలీ సరుకును స్వాధీనం చేసుకున్నారు. ఇందులో సుమారు 1,340 రెడ్ లేబుల్ ప్యాకెట్లు, 100 తాజ్ మహల్ ప్యాకెట్లు మరియు 75 కిలోల లూజ్ టీ పౌడర్‌తో పాటు వందలాది సంఖ్యలో వీల్, సర్ఫ్ ఎక్సెల్, టైడ్, ఏరియల్ వంటి బ్రాండెడ్ కంపెనీల నకిలీ ప్యాకెట్లు ఉన్నాయి. అంతేకాకుండా, సుమారు 3,600 నకిలీ గుడ్ నైట్ లిక్విడ్ బాటిళ్లను కూడా పోలీసులు స్వాధీనం చేసుకున్నారు.

Shadnagar Raikal Lake: హోలీ వేళ విషాదం.. ఈతకు వెళ్లి గురుకుల విద్యార్థి గల్లంతు

ఈ ముఠా యొక్క పనితీరు అత్యంత విస్మయానికి గురిచేస్తోంది. వీరు గుజరాత్‌లోని డీలర్ల నుంచి అత్యంత తక్కువ నాణ్యత కలిగిన ముడి పదార్థాలను, అలాగే అసలు కంపెనీలను తలపించే విధంగా ఉండే నకిలీ ప్యాకింగ్ కవర్లను అతి తక్కువ ధరకు కొనుగోలు చేస్తారు. వాటిని హైదరాబాద్‌కు తరలించి, ఇక్కడి స్థావరాల్లో ప్యాకింగ్ చేసి ప్రముఖ బ్రాండెడ్ వస్తువులుగా మార్చేస్తారు. ఇలా తయారైన నకిలీ సరుకును బేగంబజార్, అఫ్జల్‌గంజ్ వంటి హోల్‌సేల్ మార్కెట్లలోని వ్యాపారులకు విక్రయిస్తూ ప్రజలను మోసం చేస్తున్నారు. సామాన్యులు ప్యాకెట్ పైన ఉన్న లోగోను చూసి మోసపోతుండటంతో ఈ దందా విచ్చలవిడిగా సాగుతోంది.

నకిలీ టీ పౌడర్లలో రంగులు, హానికరమైన పొడులు కలపడం వల్ల కాలేయం, ఊపిరితిత్తులు దెబ్బతినే ప్రమాదం ఉందని వైద్యులు హెచ్చరిస్తున్నారు. అలాగే నకిలీ మస్కిటో లిక్విడ్లు వాడటం వల్ల శ్వాసకోశ ఇబ్బందులు తలెత్తుతాయి. పోలీసులు ఈ కేసులో మరో ఏడుగురి కోసం గాలింపు చర్యలు ముమ్మరం చేశారు. మార్కెట్‌లో వస్తువులను కొనుగోలు చేసేటప్పుడు ప్యాకింగ్ నాణ్యత, హోలోగ్రామ్ వంటివి గమనించాలని, అతి తక్కువ ధరకు వస్తున్నాయని నకిలీ వస్తువులను కొని ప్రాణాల మీదకు తెచ్చుకోవద్దని అధికారులు సూచిస్తున్నారు. కల్తీకి పాల్పడే వారిపై ఉక్కుపాదం మోపుతామని పోలీసులు స్పష్టం చేశారు.