తెలంగాణలో స్థానిక సంస్థల ఎన్నికల ప్రక్రియకు పెద్ద షాక్ తగిలింది. రాష్ట్ర ఎన్నికల సంఘం (SEC) తాజాగా విడుదల చేసిన నోటిఫికేషన్ను తాత్కాలికంగా నిలిపివేస్తూ అధికారిక ప్రకటన విడుదల చేసింది. బీసీ రిజర్వేషన్లపై హైకోర్టు విధించిన స్టే ఆర్డర్ నేపథ్యంలో ఈ నిర్ణయం తీసుకున్నట్లు ఎస్ఈసీ ప్రకటించింది. బీసీ వర్గాలకు 42 శాతం రిజర్వేషన్లు కల్పిస్తూ ప్రభుత్వం ఇటీవల జి.ఓ. నంబర్ 9ను జారీ చేసింది. ఈ జి.ఓ ఆధారంగా ఎన్నికల షెడ్యూల్ రూపొందించి, ఇవాళ తొలి విడత స్థానిక సంస్థల ఎన్నికల నోటిఫికేషన్ ప్రకటించగా, కోర్టు జోక్యం చేసుకోవడంతో మొత్తం ప్రక్రియ నిలిచిపోయింది.
Telangana HC stays GO on 42% BC Quota : కాంగ్రెస్ క్యాడర్లో నిరాశ!
హైకోర్టు తన ఆదేశాల్లో బీసీ రిజర్వేషన్ల లెక్కలు, శాతం, మరియు రాజ్యాంగ పరిమితులపై సరైన పరిశీలన జరగలేదని స్పష్టం చేసింది. అందువల్ల జి.ఓ. 9 చెల్లుబాటు కాకపోవచ్చని ప్రాథమికంగా అభిప్రాయపడింది. కోర్టు ఈ విషయంపై తదుపరి విచారణ చేపట్టే వరకు ఎన్నికల ప్రక్రియను నిలిపివేయాలని ఆదేశించింది. దాంతో ఎస్ఈసీ వెంటనే స్పందించి, “హైకోర్టు ఆదేశాలను గౌరవిస్తూ నోటిఫికేషన్ను తాత్కాలికంగా రద్దు చేస్తున్నాం” అంటూ ఒక ప్రకటన విడుదల చేసింది. దీంతో గ్రామ పంచాయతీ, మండల, జడ్పీటీసీ ఎన్నికలకు సంబంధించిన ఎన్నికల కోడ్ కూడా స్వయంచాలకంగా రద్దయింది.
ప్రభుత్వం జారీ చేసిన జి.ఓ. 9ను ఆధారంగా చేసుకుని కాంగ్రెస్ పార్టీ స్థానిక ఎన్నికల అజెండాను నిర్మించింది. కానీ కోర్టు ఆదేశాలతో ఇప్పుడు ప్రభుత్వం రక్షణాత్మక స్థితిలోకి వెళ్లినట్లు కనిపిస్తోంది. బీసీ రిజర్వేషన్లను పెంచే తమ నిర్ణయం ప్రజల మేలు కోసం తీసుకున్నదని ప్రభుత్వం చెబుతుండగా, ప్రతిపక్షాలు మాత్రం దీన్ని రాజకీయ ప్రయోజనాల కోసం చేసిన ప్రయత్నమని విమర్శిస్తున్నాయి. హైకోర్టు తదుపరి విచారణలో ఏ విధమైన తీర్పు వస్తుందన్నదే ఇప్పుడు రాష్ట్ర రాజకీయాల్లో ప్రధాన ఆసక్తికర అంశంగా మారింది.
Read hindi news: https://hindi.vaartha.com
Epaper : https://epaper.vaartha.com/
