మహబూబాబాద్ జిల్లాలోని తొర్రూరు మున్సిపాలిటీ రాజకీయం ఒక్కసారిగా వేడెక్కింది. మున్సిపల్ చైర్మన్, వైస్ చైర్మన్ ఎన్నికల్లో కాంగ్రెస్ పార్టీ అనూహ్య విజయం సాధించడంతో, దశాబ్దాలుగా ఆ నియోజకవర్గంపై పట్టున్న మాజీ మంత్రి ఎర్రబెల్లి దయాకర్ రావు తీవ్ర భావోద్వేగానికి లోనయ్యారు. మున్సిపాలిటీలో బిఆర్ఎస్ పార్టీకి స్పష్టమైన మెజారిటీ ఉన్నప్పటికీ, కాంగ్రెస్ పార్టీ అధికార బలాన్ని ఉపయోగించి అక్రమంగా పదవులను దక్కించుకుందని ఆయన ఆరోపించారు. ఈ క్రమంలో మీడియా ముందు మాట్లాడుతూ ఎర్రబెల్లి కంటతడి పెట్టుకున్నారు. తమ కళ్లముందే ప్రజాస్వామ్యాన్ని ఖూనీ చేస్తున్నారని, మెజారిటీ సభ్యులు తమ వైపు ఉన్నా అధికార యంత్రాంగాన్ని అడ్డు పెట్టుకుని ఫలితాలను తారుమారు చేశారని ఆయన ఆవేదన వ్యక్తం చేశారు.
Pratyusha: కోర్టు తీర్పుపై స్పందించిన ప్రత్యూష తల్లి
ఎన్నికల ప్రక్రియ సాగిన తీరుపై ఎర్రబెల్లి తీవ్ర విమర్శలు గుప్పించారు. బిఆర్ఎస్ పార్టీకి చెందిన కౌన్సిలర్లను, కీలక నేతలను అక్రమంగా అరెస్టులు చేసి, వారిని భయభ్రాంతులకు గురిచేసి ఓటింగ్కు దూరం చేశారని ఆయన పేర్కొన్నారు. పోలీసుల పహారాలో ఎన్నికలు నిర్వహించడం ప్రజాస్వామ్యానికి గొడ్డలి పెట్టు అని దుయ్యబట్టారు. క్షేత్రస్థాయిలో రాత్రింబవళ్లు పార్టీ కోసం కష్టపడిన కార్యకర్తలకు, నాయకులకు తానేం సమాధానం చెప్పాలని ఆయన ఉద్వేగానికి లోనయ్యారు. ఈ గెలుపు నైతికమైనది కాదని, ప్రజలు గమనిస్తున్నారని ఆయన హెచ్చరించారు.
మరోవైపు, కాంగ్రెస్ పార్టీ ఈ విజయాన్ని తమ పాలనకు దక్కిన గౌరవంగా భావిస్తోంది. బిఆర్ఎస్ కౌన్సిలర్లు స్వచ్ఛందంగానే అభివృద్ధిని కాంక్షించి తమకు మద్దతు ఇచ్చారని కాంగ్రెస్ శ్రేణులు వాదిస్తున్నాయి. అయితే, తొర్రూరు వంటి కీలక ప్రాంతంలో ఎర్రబెల్లి వంటి బలమైన నేత కంటతడి పెట్టుకోవడం రాజకీయ వర్గాల్లో పెద్ద చర్చకు దారితీసింది. అధికారం మారిన తర్వాత స్థానిక సంస్థల్లో సమీకరణాలు ఎంత వేగంగా మారుతాయో ఈ సంఘటన నిరూపిస్తోందని విశ్లేషకులు అభిప్రాయపడుతున్నారు.
Read hindi news: hindi.vaartha.com
Read Also Epaper : epaper.vaartha.com
