ప్రపంచంలోనే అత్యంత ఎత్తైన రైల్వే వంతెనగా చీనాబ్ బ్రిడ్జ్కి (Chenab Bridge) గుర్తింపు లభించింది. ఇది సముద్ర మట్టానికి 359 మీటర్ల ఎత్తులో నిర్మించబడింది — ఇది ఐఫిల్ టవర్ కన్నా సుమారు 35 మీటర్ల ఎత్తు. ఈ వంతెన 1315 మీటర్ల పొడవుతో ఉంది మరియు ఇది 266 కిలోమీటర్ల వేగాన్ని తట్టుకోగలదు. ఇంతటి ఎత్తు, సాంకేతికతతో కూడిన నిర్మాణం భారతదేశ ఇంజినీరింగ్ సత్తా, సామర్థ్యాన్ని ప్రపంచానికి చూపింది. దీనిలో స్టీల్ మరియు సిమెంట్ కాంక్రీటు ఎక్కువగా వాడారు. ఇది కేవలం ఒక రవాణా వంతెన మాత్రమే కాక, దేశ సంయుక్తతను ప్రతిబింబించే చిహ్నంగా నిలుస్తోంది.
ప్రధాని మోదీ పర్యటనకు ప్రత్యేక ప్రాధాన్యత
ప్రధానమంత్రి నరేంద్ర మోదీ నేడు ప్రపంచంలోనే అత్యంత ఎత్తైన రైల్వే వంతెన అయిన చీనాబ్ రైల్వే వంతెనను ప్రారంభించారు. ఈ ఉదయం ఉధంపూర్లోని వైమానిక దళ కేంద్రానికి చేరుకున్న ప్రధాని మోదీ అక్కడి నుంచి చీనాబ్ వంతెన నిర్మించిన ప్రదేశానికి వెళ్లారు. అక్కడ ఈ ప్రతిష్ఠాత్మక వంతెనను అధికారికంగా ప్రారంభించి జాతికి అంకితం చేశారు. ఏప్రిల్లో 26 మంది ప్రాణాలను బలిగొన్న పహల్గామ్ ఉగ్రదాడికి ప్రతీకారంగా సరిహద్దు దాటి చేపట్టిన ‘ఆపరేషన్ సింధూర్’ తర్వాత ప్రధాని మోదీ జమ్మూకశ్మీర్లో పర్యటించడం ఇదే తొలిసారి కావడం గమనార్హం.
చీనాబ్ నదిపై నిర్మించిన ఈ వంతెన ఇంజనీరింగ్ అద్భుతంగా నిపుణులు అభివర్ణిస్తున్నారు. ఈ వంతెన ప్రారంభోత్సవం అనంతరం ప్రధాని మోదీ భారతదేశపు మొట్టమొదటి కేబుల్ ఆధారిత (కేబుల్-స్టేయిడ్) రైల్వే వంతెన అయిన అంజి వంతెనను కూడా ప్రారంభించనున్నారు. ఇది కూడా ఈ ప్రాంతంలో రవాణా సౌకర్యాలను మరింత మెరుగుపరుస్తుంది.
వందే భారత్ ఎక్స్ప్రెస్ – వేగవంతమైన సంయోగానికి అంకురార్పణ
అలాగే శ్రీ మాతా వైష్ణో దేవి కాట్రా, శ్రీనగర్ మధ్య రెండు కొత్త వందేభారత్ ఎక్స్ప్రెస్ రైళ్లను కూడా ప్రధాని జెండా ఊపి ప్రారంభించనున్నారు. ఈ రైళ్ల రాకతో, మొత్తం 272 కిలోమీటర్ల పొడవైన ఉధంపూర్-శ్రీనగర్-బారాముల్లా రైల్ లింక్ (యూఎస్బీఆర్ఎల్) ప్రాజెక్ట్ మార్గం పూర్తిగా అందుబాటులోకి వస్తుంది. ఈ పరిణామాలు జమ్మూకశ్మీర్ అభివృద్ధిలో కీలక పాత్ర పోషిస్తాయని, పర్యాటకాన్ని ప్రోత్సహిస్తాయని, అలాగే స్థానిక ఆర్థిక వ్యవస్థకు ఊతమిస్తాయని భావిస్తున్నారు. కాశ్మీర్ లోయకు అన్ని కాలాల్లోనూ నిరంతర రవాణా సౌకర్యం కల్పించాలనే దశాబ్దాల కల ఈ ప్రాజెక్టులతో సాకారమవుతోంది. ఈ రైల్ మార్గం ప్రారంభం ద్వారా కశ్మీర్ లోయలో సమర్థవంతమైన రవాణా, ఉద్యోగావకాశాలు, పర్యాటక అభివృద్ధి, స్థానిక వ్యవసాయం, వ్యాపార అభివృద్ధికి ప్రోత్సాహం వంటి అనేక ప్రయోజనాలు లభించనున్నాయి.
Read also: Tharoor: పాక్ తో చర్చలు ఉండవు : శశిథరూర్
