శీతాకాల సమావేశాల చివరి రోజున కూడా పార్లమెంటు వేదికపై ఉద్రిక్తతలు కొనసాగాయి. ఇండియా కూటమి ఎంపీలు విజయ్ చౌక్ వద్ద నిరసనకు దిగారు. అంబేడ్కర్ పై అమిత్ షా రాజ్యసభలో చేసిన వ్యాఖ్యలకు వ్యతిరేకంగా వారు ఆందోళన వ్యక్తం చేశారు. అంబేడ్కర్పై చేసిన వ్యాఖ్యలకు అమిత్ షా క్షమాపణ చెప్పాలని, ఆయన తన మంత్రి పదవికి రాజీనామా చేయాలని డిమాండ్ చేశారు.
ఈ నిరసనలో ఎంపీలు “అంబేడ్కర్కు గౌరవం – అసత్యాలకు చెంపదెబ్బ” అంటూ నినాదాలు చేశారు. పార్లమెంట్ మకర ద్వారం వద్ద నిరసనలకు అనుమతి నిరాకరించడంతో, విజయ్ చౌక్కు తరలిపోవడం గమనార్హం. ఇందుకు కారణం పార్లమెంట్ భవనం సమీపంలో నిరసనలకు స్పీకర్ ఓంబిర్లా నిషేధం విధించడం. సభలు సజావుగా నిర్వహించేందుకు ప్రయత్నించినప్పటికీ, విపక్ష సభ్యుల నిరసనల కారణంగా అది సాధ్యపడలేదు. మంత్రుల వ్యాఖ్యలు, వాటిపై కూటమి ఎంపీల ప్రతిస్పందనలతో పార్లమెంటు వేదిక పలు సందర్భాల్లో ఉద్రిక్తంగా మారింది. అంబేడ్కర్పై అనుచిత వ్యాఖ్యల పేరుతో ఈ నిరసనలు మరింత ఉధృతమయ్యాయి.
ఇండియా కూటమి ఎంపీలు అమిత్ షా వ్యాఖ్యలను తీవ్రంగా విమర్శిస్తూ, దేశంలో ఉన్న ప్రతి సామాజిక వర్గానికి గౌరవం కల్పించే విధానాన్ని అమలు చేయాలని డిమాండ్ చేస్తున్నారు. అంబేడ్కర్ ఆశయాలకు విరుద్ధంగా వ్యవహరించే నేతలు పదవిలో ఉండటం తగదని వారు స్పష్టం చేశారు. దీనికి తోడు, సభా కార్యకలాపాలు ప్రతిస్పందనల మధ్య తాత్కాలికంగా నిలిచిపోయాయి. పార్లమెంటు చివరి రోజున కూడా సమైక్యతను కాపాడడంలో విఫలమవ్వడం బాధాకరమని, ప్రభుత్వ నాయుకత్వం మరింత జాగ్రత్తగా ఉండాలని విపక్షాలు అభిప్రాయపడ్డాయి.
