ఉత్తరప్రదేశ్ (Uttar Pradesh) లో డ్రోన్ల కదలికలు ప్రజల్లో ఆందోళనకు దారి తీస్తున్నాయి. బులంద్షహర్ జిల్లాలోని జైలుపై ఒక డ్రోన్ ఎగురుతూ కనిపించడంతో భయాలు చెలరేగాయి. శుక్రవారం సాయంత్రం ఇది చోటుచేసుకోగా, డ్రోన్ (drone) కదలికలను చూపే వీడియో వేగంగా సోషల్ మీడియాలో వైరల్ అయింది. ఈ ఘటనపై స్పందించిన పోలీసులు తక్షణమే చర్యలు తీసుకుని, భూపేంద్ర సింగ్ అనే యువకుడిని అరెస్టు చేశారు.భూపేంద్ర సింగ్ (25) పై బీఎన్ఎస్క్ సెక్షన్ 223, 351(1), ఐటీ చట్టం, జైలు చట్టం, క్రిమినల్ లా (సవరణ) చట్టం కింద కేసులు నమోదు చేశారు. నిషేధిత ప్రాంతంలో అనుమతి లేకుండా డ్రోన్ ఎగరేయడం, ఫోటోగ్రఫీ చేయడం వంటి ఆరోపణలతో అతడిని అదుపులోకి తీసుకున్నారు. అధికారిక అనుమతి లేకుండా జైలుపై డ్రోన్ వాడటాన్ని పోలీసులు తీవ్రమైన నేరంగా పరిగణిస్తున్నారు.
బిజ్నోర్, మొరాదాబాద్ జిల్లాల్లో రాత్రివేళ వింత కాంతులు
బిజ్నోర్, మొరాదాబాద్, అమ్రోహా జిల్లాల్లో రాత్రి సమయాల్లో “వింత కాంతులు” కనిపిస్తున్నాయని గ్రామస్తులు చెబుతున్నారు. ఈ కాంతులు డ్రోన్లవేనని అనుమానించడంతో గ్రామాలు అప్రమత్తమయ్యాయి. కొంతమంది గ్రామస్తులు రాత్రిపూట టార్చిలైట్లు పట్టుకొని గస్తీ నిర్వహిస్తున్నారు.చాజ్లాట్ గ్రామంలో ఒక వ్యక్తి డ్రోన్ను చూసి వెంటనే ఆకాశంలోకి కాల్పులు జరిపాడు. అదే సమయంలో బుఖారీపూర్ గ్రామంలో డ్రోన్ కనిపించిన కొద్దిసేపటికే ఒక ఈ-రిక్షా బ్యాటరీ మాయమైంది. దీంతో డ్రోన్లు దొంగతనాలకు ఉపయోగపడుతున్నాయనే అనుమానం పెరుగుతోంది.
పోలీసుల అదనపు గస్తీలు – విచారణ కొనసాగుతోంది
బిజ్నోర్ ఎస్పీ సంజీవ్ వాజ్పేయీ మాట్లాడుతూ, రాత్రిపూట అదనంగా పోలీసు గస్తీలు పెంచామని తెలిపారు. గ్రామస్థులు సోషల్ మీడియాలో పోస్టు చేస్తున్న వీడియోలను విశ్లేషిస్తున్నామని చెప్పారు. “కొంతమంది వినోదం కోసమే డ్రోన్లు ఎగరేస్తుండవచ్చు” అని ఆయన అభిప్రాయపడ్డారు.జైలు ఘటన తప్ప ప్రస్తుతం డ్రోన్లను స్వాధీనం చేసుకున్నట్లు సమాచారం లేదు. అయినా గ్రామస్తులు ముప్పు ఉన్నట్టు భావించి పైకప్పులపై కాపలా కాస్తున్నారు. కొందరు టార్చిలైట్లు, రాళ్లు, కర్రలతో డ్రోన్లను తరిమివేయాలని ప్రయత్నిస్తున్నారు. పలు గ్రామాల్లో రాత్రంతా మిగిలి ఆకాశం వైపు కన్నేసే దృశ్యాలు కనిపిస్తున్నాయి.
డ్రోన్ల అసలైన ఉద్దేశం ఇంకా స్పష్టతలేనిది
ఇప్పటివరకు ఈ డ్రోన్ల వెనుక అసలైన ఉద్దేశం ఏంటన్నది స్పష్టత లేదు. పోలీసులు ఈ వ్యవహారాన్ని గంభీరంగా తీసుకొని దర్యాప్తు కొనసాగిస్తున్నారు. అయినప్పటికీ, ప్రజల్లో భయాందోళనలు మానట్లే లేవు. డ్రోన్ల కదలికలపై మరిన్ని వివరాలు వెలుగులోకి రావాల్సి ఉంది.
Read Also : Malaria vaccine India : భారతీయ పరిశోధన కీలక ముందడుగు : మలేరియా నివారణకు స్వదేశీ వ్యాక్సిన్
