ఏపీ ఉపముఖ్యమంత్రి పవన్ కళ్యాణ్ తీసుకున్న చొరవ, సినిమా పరిశ్రమ పట్ల ఆయనకు ఉన్న విజన్ టాలీవుడ్లో కొత్త మార్పులకు శ్రీకారం చుడుతోంది. తాజాగా యువ హీరో నవీన్ పొలిశెట్టి తాను నటించిన ‘అనగనగా ఒక రాజు’ సినిమా షూటింగ్ విశేషాలను పంచుకుంటూ ఆసక్తికర వ్యాఖ్యలు చేశారు. గతంలో ఒక కార్యక్రమంలో పవన్ కళ్యాణ్ మాట్లాడుతూ.. ఆంధ్రప్రదేశ్లో సినిమా షూటింగ్స్ ఎక్కువగా జరగాలని, ఇక్కడి అందమైన లొకేషన్లను వాడుకోవాలని పిలుపునిచ్చారు. ఆ మాటలు తన హృదయాన్ని బలంగా తాకాయని, అందుకే తన సినిమా షూటింగ్లో మెజారిటీ భాగాన్ని ఉభయ గోదావరి జిల్లాల్లోనే ప్లాన్ చేశామని నవీన్ వెల్లడించారు.
Renu Desai : మీడియా ప్రతినిధిపై ఫైర్ ఎందుకు అవ్వాల్సి వచ్చిందో క్లారిటీ ఇచ్చిన రేణు దేశాయ్
ఆంధ్రప్రదేశ్ ప్రభుత్వం సినిమా చిత్రీకరణలకు కల్పిస్తున్న సౌకర్యాల పట్ల నవీన్ పొలిశెట్టి హర్షం వ్యక్తం చేశారు. గతంలో షూటింగ్ పర్మిషన్ల కోసం ఎదురయ్యే ఇబ్బందులు ఇప్పుడు లేవని, అధికారులు చాలా వేగంగా స్పందిస్తున్నారని ఆయన తెలిపారు. గోదావరి జిల్లాల్లో చిత్రీకరణ సాగుతున్న సమయంలో స్థానిక అధికారులు మరియు యంత్రాంగం పూర్తి స్థాయిలో సహకరించారని, ఎక్కడా ఎటువంటి ఆటంకాలు కలగకుండా ఈజీగా పర్మిషన్లు లభించాయని ఆయన పేర్కొన్నారు. ఈ సానుకూల వాతావరణం వల్ల భవిష్యత్తులో మరిన్ని భారీ చిత్రాలు ఏపీలో చిత్రీకరణ జరుపుకునే అవకాశం ఉందని ఆయన అభిప్రాయపడ్డారు.
సినిమా ప్రమోషన్లలో భాగంగా నిన్న రాజమండ్రిలో చిత్ర యూనిట్ సందడి చేసింది. హీరో నవీన్ పొలిశెట్టి మరియు కథానాయిక మీనాక్షీ చౌదరి అక్కడ అభిమానులను కలుసుకుని సందడి చేశారు. రాజమండ్రి పరిసర ప్రాంతాల్లోని ప్రకృతి సౌందర్యం తమ సినిమాకు అదనపు ఆకర్షణగా నిలుస్తుందని వారు ధీమా వ్యక్తం చేశారు. పవన్ కళ్యాణ్ వంటి నాయకులు సినిమా రంగానికి అండగా నిలవడం వల్ల చిత్ర పరిశ్రమలో కొత్త ఉత్సాహం నెలకొందని, ఏపీ పర్యాటక రంగం కూడా దీనివల్ల అభివృద్ధి చెందుతుందని సినీ విశ్లేషకులు భావిస్తున్నారు.
Read hindi news: hindi.vaartha.com
Epaper : epaper.vaartha.com
