మరో మహమ్మారి ముప్పు? హెచ్కేయూ5 వైరస్ పై శాస్త్రవేత్తల హెచ్చరిక
ప్రపంచాన్ని గతంలోనే పలుమార్లు వణికించిన కరోనా Virus కుటుంబానికి చెందిన మరో ప్రమాదకర Virus మానవాళిని ముంచే అవకాశం ఉందని శాస్త్రవేత్తలు హెచ్చరిస్తున్నారు.
ప్రాణాంతకమైన మిడిల్ ఈస్ట్ రెస్పిరేటరీ సిండ్రోమ్ (మెర్స్-కోవ్)కు సన్నిహిత సంబంధం కలిగిన గబ్బిలాల వైరస్లు, ముఖ్యంగా ‘హెచ్కేయూ5’ అనే ఉపరకం మానవ కణాలను ముప్పతీసే స్థాయికి చేరుకుంటున్నట్లు తాజా అధ్యయనంలో వెల్లడైంది.
చైనాలోని గబ్బిలాల్లో తొలిసారిగా గుర్తించిన ఈ వైరస్లు జంతువుల నుండి మనుషులకు వ్యాపించే (spillover) సామర్థ్యం కలిగి ఉండడం శాస్త్రవేత్తలను తీవ్ర ఆందోళనకు గురిచేస్తోంది.
హెచ్కేయూ5పై అత్యంత కీలక అధ్యయనం
ఈ వైరస్పై విస్తృతంగా పరిశోధనలు వాషింగ్టన్ స్టేట్ యూనివర్సిటీ (WSU) నేతృత్వంలో, కాలిఫోర్నియా ఇనిస్టిట్యూట్ ఆఫ్ టెక్నాలజీ మరియు యూనివర్సిటీ ఆఫ్ నార్త్ కరోలినా వంటి ప్రముఖ విద్యాసంస్థల సహకారంతో నిర్వహించారు.
ఈ అధ్యయనం వివరాలు ప్రఖ్యాత విజ్ఞాన పత్రిక ‘నేచర్ కమ్యూనికేషన్స్’ లో ప్రచురితమయ్యాయి. ఇందులో మెర్బెకోవైరస్లలో హెచ్కేయూ5 ఉపరకం ప్రత్యేక స్థానం పొందింది.
మెర్స్ వైరస్ ఇదే వైరస్ కుటుంబానికి చెందడంతో దీనిపై మరింత శ్రద్ధ అవసరమవుతుంది. మెర్స్ వల్ల 34% వరకు మరణాలు సంభవించడం గమనార్హం.
మానవులకు సోకే ముప్పు ఎంత ప్రమాదకరం?
చాలా మెర్బెకోవైరస్లు మానవులకు నేరుగా సోకే అవకాశం తక్కువగా ఉన్నప్పటికీ, హెచ్కేయూ5 అని పిలిచే ఒక నిర్దిష్ట సమూహం మాత్రం ఆందోళనకరమైన రీతిలో మానవులకు వ్యాపించే సామర్థ్యాన్ని చూపుతోందని అధ్యయనం పేర్కొంది.
డబ్ల్యూఎస్యూ కాలేజ్ ఆఫ్ వెటర్నరీ మెడిసిన్కు చెందిన వైరాలజిస్ట్ మైఖేల్ లెట్కో మాట్లాడుతూ “మెర్బెకోవైరస్లు, ముఖ్యంగా హెచ్కేయూ5 వైరస్లపై ఇప్పటివరకు పెద్దగా దృష్టి సారించలేదు.
కానీ మా అధ్యయనం ఈ వైరస్లు కణాలను ఎలా ప్రభావితం చేస్తాయో చూపిస్తుంది. హెచ్కేయూ5 వైరస్లు మానవులకు సోకడానికి చాలా దగ్గరలో ఉన్నాయని కూడా మేము కనుగొన్నాం” అని వివరించారు.
ఏసీఈ2 గ్రాహకాన్ని లక్ష్యంగా చేసుకున్న హెచ్కేయూ5
వైరస్ స్పైక్ ప్రోటీన్లోని గ్రాహకాన్ని బంధించే భాగాన్ని మాత్రమే కలిగి ఉండేలా రూపొందించిన వైరస్ వంటి కణాలను ఉపయోగించి, హెచ్కేయూ5 వైరస్లు ఇప్పటికే ఏసీఈ2 గ్రాహకాన్ని ఉపయోగించగలవని పరిశోధకులు ప్రయోగపూర్వకంగా నిరూపించారు.
కొవిడ్-19కు కారణమైన సార్స్-కోవ్-2 వైరస్ కూడా ఇదే ఏసీఈ2 గ్రాహకాన్ని ఉపయోగించుకుంటుంది.
అయితే, ప్రస్తుతానికి హెచ్కేయూ5 వైరస్లు గబ్బిలాల ఏసీఈ2 గ్రాహకానికి మరింత సమర్థవంతంగా అతుక్కుంటున్నాయని, మానవ కణాలను సమర్థవంతంగా ప్రభావితం చేయలేకపోతున్నాయని తేలింది.
అయినప్పటికీ, ఈ పరిస్థితి ఎప్పుడైనా మారవచ్చని శాస్త్రవేత్తలు హెచ్చరిస్తున్నారు.
మింక్స్ ద్వారా మధ్యంతర దశలో మానవులకు వ్యాప్తి?
హెచ్కేయూ5 వైరస్ను తొలుత జపనీస్ హౌస్ గబ్బిలాల్లో (Pipistrellus abramus) గుర్తించారు. అయితే ఇటీవలే వెలుగులోకి వచ్చిన సమాచారం ప్రకారం, ఈ వైరస్ కొన్ని మింక్స్ వంటి మధ్యంతర జీవుల్లోనూ వ్యాప్తి చెందుతుందని సూచిస్తున్నాయి.
ఇది మానవులకు సోకే దిశగా కీలకమైన అడుగు కావచ్చని నిపుణులు హెచ్చరిస్తున్నారు.
ఈ వైరస్ మనుషుల్లోకి ప్రవేశించినట్లు ఇప్పటి వరకు ఎటువంటి ఆధారాలు లేకపోయినా, తగిన నిఘా లేకపోతే భవిష్యత్తులో పెద్ద ముప్పుగా మారే ప్రమాదం ఉందని శాస్త్రవేత్తలు అంటున్నారు.
కృత్రిమ మేధ ఆధారిత నమూనాలు – వేగవంతమైన అధ్యయనం
ఈ వైరస్ స్పైక్ ప్రోటీన్, ఏసీఈ2 గ్రాహకంతో పరమాణు స్థాయిలో ఎలా సంకర్షణ చెందుతుందో అనుకరించడానికి పరిశోధక బృందం ఆల్ఫాఫోల్డ్ 3 వంటి కృత్రిమ మేధ (ఏఐ) సాధనాలను కూడా ఉపయోగించింది.
సంప్రదాయ ప్రయోగశాల పద్ధతుల ద్వారా పొందిన ఫలితాలతో ఏఐ నమూనాలు సరిపోలాయి. కానీ చాలా తక్కువ సమయంలోనే ఇది సాధ్యమైంది.
వైరస్ ఎలా పరిణామం చెందుతుందో, రోగనిరోధక శక్తిని ఎలా తప్పించుకుంటుందో అర్థం చేసుకునే ప్రక్రియను ఇది గణనీయంగా వేగవంతం చేసిందని శాస్త్రవేత్తలు పేర్కొన్నారు.
ఈ పరిశోధన భవిష్యత్తు మహమ్మారులను ఎదుర్కోవడానికి అవసరమైన వ్యూహాలను రూపొందించడంలో కీలక పాత్ర పోషిస్తుందని ఆశిస్తున్నారు.
Read also: Ela Fitzpayne : ఇంగ్లాండ్లో 700 ఏళ్ల నాటి మతగురువు హత్య కేసు ఛేదన
