అమెరికా(USA) పౌరసత్వం పొందాలనుకునే వారికి ఒక ముఖ్యమైన మార్పు. ఇకపై కేవలం నేర చరిత్ర లేకపోతే సరిపోదు, దరఖాస్తుదారుల ‘మంచి నైతిక ప్రవర్తన’ (గుడ్ మోరల్ క్యారెక్టర్)ను సమగ్రంగా అంచనా వేయాలని ప్రభుత్వం నిబంధనలు కఠినతరం చేసింది. దరఖాస్తుదారుడి మొత్తం ప్రవర్తన, సమాజంలో వారి జీవనశైలిని కూలంకషంగా పరిశీలించిన తర్వాతే పౌరసత్వ దరఖాస్తుపై నిర్ణయం తీసుకుంటారు.
అమెరికాలోని(USA) చట్టబద్ధమైన వలసల వ్యవహారాలను పర్యవేక్షించే యునైటెడ్ స్టేట్స్ సిటిజెన్షిప్ అండ్ ఇమ్మిగ్రేషన్ సర్వీసెస్ (United States Citizenship and Immigration Services) ఈ మేరకు గత శుక్రవారం ఒక విధాన మార్గదర్శకాన్ని జారీ చేసింది. పౌరసత్వం కేవలం దేశంలో నివసించే హక్కు మాత్రమే కాదని, సమాజంలో ఒక బాధ్యతాయుతమైన సభ్యుడిగా ఉండటం కూడా ముఖ్యమని యూఎస్సీఐఎస్ స్పష్టం చేసింది. “పౌరసత్వ దరఖాస్తు పరిశీలన అనేది దరఖాస్తుదారుడు తప్పులు చేయలేదని నిర్ధారించడం మాత్రమే కాదు… వారి ప్రవర్తన, సామాజిక నియమాల పట్ల వారి నిబద్ధత, సమాజానికి వారు చేసిన మంచి పనులను కూడా అంచనా వేయడం” అని ఆ ప్రకటనలో వివరించింది.
ఇకపై అధికారులు ‘సంపూర్ణ మదింపు’ (totality of circumstances) పద్ధతిని అమలు చేస్తారు. అంటే, దరఖాస్తుదారుడిలో ఉన్న సానుకూల, ప్రతికూల అంశాలను రెండింటినీ పరిగణనలోకి తీసుకొని తుది నిర్ణయం తీసుకుంటారు. ఈ పద్ధతిలో, నిలకడైన ఉద్యోగం, సకాలంలో పన్నులు చెల్లించడం, కుటుంబ బాధ్యతలను నిర్వర్తించడం, సమాజ సేవలో పాల్గొనడం వంటివి సానుకూల అంశాలుగా పరిగణించబడతాయి.
ఈ విషయాల్లోజాగ్రత్త లేకపోతే మీపై అనర్హత
అదే సమయంలో, పౌరసత్వానికి అర్హతను కోల్పోయే అంశాలపై మరింత లోతుగా దృష్టి సారిస్తారు. హత్య, తీవ్రమైన నేరాలు, హింస, మత స్వేచ్ఛను ఉల్లంఘించడం వంటివి పౌరసత్వానికి శాశ్వత నిషేధానికి దారితీస్తాయి. పదేపదే మద్యం సేవించి వాహనం నడపడం, పౌరసత్వం(citizenship) గురించి తప్పుడు సమాచారం ఇవ్వడం, చట్టవిరుద్ధంగా ఓటు వేయడం వంటివి షరతులతో కూడిన అనర్హతకు కారణమవుతాయి.
అయితే, కొన్ని కేసుల్లో దరఖాస్తుదారులు తమ ప్రవర్తనను సరిదిద్దుకున్నారని నిరూపించుకుంటే, దానిని పునరావాసానికి సూచనగా అధికారులు పరిగణిస్తారు. ఉదాహరణకు, పిల్లల పోషణకు సంబంధించిన బకాయిలు చెల్లించడం, పన్నుల సమస్యలను పరిష్కరించుకోవడం లేదా సమాజంలో గౌరవనీయమైన వ్యక్తుల నుంచి మంచి ప్రవర్తనకు సంబంధించిన ధృవీకరణ పొందడం వంటివి ఇందులో ఉంటాయి.
సాధారణంగా గ్రీన్ కార్డ్(green card) హోల్డర్లు మూడు లేదా ఐదేళ్ల తర్వాత పౌరసత్వం కోసం దరఖాస్తు చేసుకోవచ్చు. దీనికి ఇంగ్లీష్, సివిక్స్ పరీక్షలలో ఉత్తీర్ణతతో పాటు ‘మంచి నైతిక ప్రవర్తన’ను ప్రదర్శించడం తప్పనిసరి. ట్రంప్ పరిపాలనలో చట్టబద్ధమైన వలసలపై కఠినమైన వైఖరిని అవలంబిస్తున్న నేపథ్యంలో ఈ కొత్త మార్గదర్శకాలు మరింత ప్రాధాన్యతను సంతరించుకున్నాయి.
Read more: hindivaartha.com
Read Also:
