జమ్మూ కాశ్మీర్లోని పహల్గామ్ సమీపంలో ఇటీవల చోటుచేసుకున్న ఉగ్రదాడిలో అమాయక పౌరులు మరియు భద్రతా సిబ్బంది ప్రాణాలు కోల్పోయిన ఘటనతో దేశవ్యాప్తంగా తీవ్ర స్పందన నెలకొంది. దీనికి ప్రతిగా భారత సాయుధ బలగాలు చేపట్టిన ‘ఆపరేషన్ సిందూర్’ విజయవంతమైన నేపథ్యంలో భారత ప్రభుత్వం కీలక నిర్ణయం తీసుకుంది.
విమాన మార్గాల మూసివేతపై కేంద్రం కీలక నిర్ణయం
ఈ విజయానికి అనుసంధానంగా, పాక్కు వ్యతిరేకంగా రాజకీయ, వ్యూహాత్మక స్థాయిలో చర్యలు తీసుకుంటూ, భారత్ ప్రభుత్వం 25 అంతర్జాతీయ విమాన మార్గాలను మూసివేస్తున్నట్లు ప్రకటించింది. ఈ మార్గాలు భారత గగనతలం నుండి పాకిస్థాన్ గగనతలానికి వెళ్లే విమానాలకు సంబంధించి ఉండగా, ఇప్పటినుంచి వీటిని ఉపయోగించేందుకు ఇక అనుమతి ఉండదని అధికారులు స్పష్టం చేశారు. ఇది నిరవధిక ఆంక్షగా భావించబడుతోంది. ఈ చర్యతో అంతర్జాతీయ విమానయాన సంస్థలు ప్రత్యామ్నాయ మార్గాలను ఎంచుకోవాల్సిన పరిస్థితి ఏర్పడింది.
గత పరిణామాల నేపథ్యం
ఇది ఒక్కసారిగా తీసుకున్న నిర్ణయం కాదు. పహల్గామ్ ఉగ్రదాడి అనంతరం ఇరు దేశాల మధ్య ఉద్రిక్తతలు పెరిగాయి. ఏప్రిల్ 30న పాకిస్థానీ విమానయాన సంస్థలకు భారత గగనతలాన్ని మూసివేస్తున్నట్లు భారత్ ప్రకటించింది. దీనికి ముందు, పహల్గామ్ దాడి జరిగిన రెండు రోజుల తర్వాత ఏప్రిల్ 24న పాకిస్థాన్ తమ గగనతలంలో భారత విమానాల రాకపోకలను నిషేధించింది.
అంతర్జాతీయ ప్రభావాలు
తాజాగా భారత ప్రభుత్వం తీసుకున్న నిర్ణయంతో భారత గగనతలం దాటి పాకిస్థాన్ మీదుగా ప్రయాణించే విదేశీ విమానయాన సంస్థలు ఇప్పుడు సుదీర్ఘ మార్గాలను అనుసరించాల్సి వస్తుంది. సుమారు 25 విమాన మార్గాలను నిరవధికంగా నిలిపివేసినట్లు అధికారులు తెలిపారు. భారత్ నుంచి బయలుదేరిన తర్వాత పాకిస్థాన్ గగనతలాన్ని పూర్తిగా తప్పించే ప్రత్యామ్నాయ మార్గాలను రూపొందించుకోవాలని అంతర్జాతీయ విమానయాన సంస్థలకు సూచించినట్లు పేర్కొన్నారు. సాధారణంగా ఏ దేశ గగనతలాన్ని ఉపయోగించుకున్నా ఆ దేశ పౌర విమానయాన అథారిటీకి విమానయాన సంస్థలు ఓవర్ఫ్లైట్ రుసుము చెల్లించాల్సి ఉంటుంది. భారత్లో ఎయిర్పోర్ట్స్ అథారిటీ ఆఫ్ ఇండియా (ఏఏఐ) దేశ గగనతలం, దాని ప్రక్కనే ఉన్న సముద్ర ప్రాంతాలలో ఎయిర్ ట్రాఫిక్ మేనేజ్మెంట్ సర్వీసెస్ (ఏటీఎంఎస్)ను నిర్వహిస్తుంది.
ఫ్లైట్ రద్దులపై గణాంకాలు
తాజా పరిణామాల నేపథ్యంలో యునైటెడ్ ఎయిర్లైన్స్, కొరియన్ ఎయిర్ వంటి పలు అంతర్జాతీయ విమానయాన సంస్థలు పాకిస్థాన్ గగనతలానికి సమీపంలోని తమ విమానాలను దారి మళ్లించడం లేదా రద్దు చేయడం చేశాయి. ఇరు దేశాల్లోనూ దేశీయ విమాన ప్రయాణాలపై కూడా ప్రభావం పడింది. ‘ఫ్లైట్రాడార్ 24’ ద్వారా రాయిటర్స్ సేకరించిన డేటా ప్రకారం బుధవారం ఉదయం 10:30 సమయానికి భారతదేశంలో షెడ్యూల్ చేసిన విమానాలలో సుమారు 3 శాతం, పాకిస్థాన్లో 17 శాతం రద్దయ్యాయి.
Read also: Operation Sindhur: ‘ఆపరేషన్ సిందూర్’ పై అంతర్జాతీయ మీడియా స్పందన
