ఫాదర్స్ డే విషాదం: పిల్లల ప్రాణాలను కాపాడేందుకు తండ్రి (Father) ప్రాణత్యాగం
ఫాదర్స్ డే రోజున ఓ తండ్రి(Father) తన పిల్లల కోసం చేసిన త్యాగం ఇప్పుడు ప్రపంచవ్యాప్తంగా ప్రజలను కంటతడి పెట్టిస్తోంది. ఈ ఉదంతం జూన్ 15న అమెరికాలోని ఫ్లోరిడా రాష్ట్రంలోని ఫోర్ట్ లాడర్డేల్ బీచ్లో చోటుచేసుకుంది. 33 ఏళ్ల ఆంట్వోన్ విల్సన్ అనే యువ తండ్రి, తన ఇద్దరు పిల్లలను సముద్రపు అలల నుండి కాపాడే క్రమంలో ప్రాణాలను కోల్పోయాడు. ఈ ఘటన ఫాదర్స్ డే రోజే జరగడం మరింత హృదయవిదారకంగా మారింది.
ఆ రోజు ఆదివారం కావడంతో విల్సన్ తన పిల్లలతో కలిసి బీచ్కు వెళ్లి ఆనందంగా గడుపుతున్నాడు. పిల్లలు సముద్రంలో ఈత కొడుతుండగా ఒక్కసారిగా నీటిలో మునిగిపోతుండడం గమనించిన విల్సన్, వారిని కాపాడేందుకు ఒక్క క్షణం ఆలోచించకుండా సముద్రంలోకి దూకాడు. సాయంత్రం 7:20 ప్రాంతంలో బీ ఓషన్ రిసార్ట్ సమీపంలోని సముద్రంలో జరిగిన ఈ ప్రమాదాన్ని చూసిన స్థానికులు 911కు ఫోన్ చేసి సమాచారం ఇచ్చారు. ఆ సమయంలో ఓషన్ లైఫ్గార్డులు విధుల్లో లేకపోయినప్పటికీ, ఫోర్ట్ లాడర్డేల్ ఫైర్ రెస్క్యూ విభాగానికి చెందిన లెఫ్టినెంట్లు వెంటనే సంఘటనా స్థలానికి చేరుకున్నారు.
సముద్రంలో ప్రమాదం – తండ్రి వెంటనే స్పందన
ఫైర్ రెస్క్యూ బెటాలియన్ చీఫ్ డేనియల్ మోరన్ వివరించిన మేరకు – “లైఫ్ గార్డులు రాగానే, విల్సన్ తన కుమార్తెను నీటిపై తేలియాడేలా పట్టుకొని ఉండటాన్ని గమనించాం. ఆయన ప్రయత్నం లేకపోతే ఆ పాపను కాపాడటం కష్టం అయేది.” అదే సమయంలో సమీపంలో ఉన్న ఎస్లామ్ సాద్ అనే వ్యక్తి కూడా సహాయార్థం సముద్రంలోకి దూకి, చిన్నారులను ఒడ్డుకు చేర్చే ప్రయత్నం చేశాడు. ఆయన తెలిపిన ప్రకారం, రెస్క్యూ బృందం వస్తుండగానే తాను ఆ చిన్నారిని ఒడ్డుకు తీసుకువచ్చే ప్రయత్నం చేస్తున్నానని చెప్పారు.
పిల్లలు సురక్షితంగా బయటపడినప్పటికీ, విల్సన్ మాత్రం తిరిగి పైకి రాలేదు. రెస్క్యూ బృందం గాలింపు చర్యలు చేపట్టి కొద్దిసేపటికే ఆయనను సముద్ర అడుగున గుర్తించింది. వెంటనే ఒడ్డుకు తీసుకొచ్చి ప్రథమ చికిత్స అందించారు. అనంతరం ఆసుపత్రికి తరలించినా, చికిత్స ఫలించక విల్సన్ మరణించినట్లు వైద్యులు ధృవీకరించారు. ఈ విషాద ఘటన స్థానికులను మాత్రమే కాదు, సోషల్ మీడియా వేదికగా ప్రపంచవ్యాప్తంగా అనేకమందిని కలచివేసింది. “తన ప్రాణాలకంటే పిల్లల ప్రాణాలే ముఖ్యం” అనే తండ్రి ప్రేమకు నిలువెత్తు సాక్ష్యంగా నిలిచింది ఈ సంఘటన.
తల్లి తండ్రుల గొప్పతనాన్ని చాటిన ఘటన
ఈ సంఘటన మనకు తల్లి తండ్రుల పాత్ర ఎంత గొప్పదో గుర్తుచేస్తోంది. వారి త్యాగాలను గుర్తించి గౌరవించడమే నిజమైన ఫాదర్స్ డే, మదర్స్ డే. పిల్లల భద్రతకు తండ్రులు, తల్లులు ఎంతటి సాహసానికి వెళ్ళగలరో ఈ సంఘటన మరలా రుజువు చేసింది.
