వరల్డ్ ఎకనామిక్ ఫోరం 2026కు దావోస్ రెడీ

సోమవారం నుంచి ప్రారంభం కానున్న వరల్డ్ ఎకనామిక్ ఫోరం (WEF) 2026 నేపథ్యంలో స్విట్జర్లాండ్‌లోని దావోస్ పట్టణం పూర్తిస్థాయి భద్రతా ఏర్పాట్లలోకి వెళ్లింది. ప్రపంచంలోనే అత్యంత ప్రతిష్ఠాత్మక ఆర్థిక సమావేశాల్లో ఒకటిగా భావించే ఈ ఫోరమ్ కోసం అధికారులు ముందస్తుగానే లాక్‌డౌన్ అమలు చేస్తున్నారు. రైలులో దావోస్‌కు చేరుతున్న సందర్శకులను స్విస్ సైన్యం ఏర్పాటు చేసిన విమాన నిరోధక ఫిరంగులు స్వాగతించాయి. ఇది దావోస్ ప్రతి సంవత్సరం WEF సమయంలో అమలు చేసే అత్యున్నత భద్రతా దశకు సంకేతమని స్విస్ మీడియా పేర్కొంది.దావోస్ సరస్సు సమీపంలో మంచులో చెక్కబడిన ఖాళీ హెలికాప్టర్ ల్యాండింగ్ ప్యాడ్ స్థానికులకు “రుహే వోర్ డెమ్ స్టర్మ్” (తుఫాను ముందు ప్రశాంతత)ను గుర్తు చేస్తోంది. పెద్దఎత్తున ప్రపంచ నేతల రాకకు ముందు పట్టణం నిశ్శబ్దంగా కనిపిస్తోంది.

ప్రపంచ నేతల రక్షణకు ఆధునిక ఆయుధాలు

1963లో ప్రవేశపెట్టిన ఓర్లికాన్ 35 మిల్లీమీటర్ల జంట విమాన నిరోధక ఫిరంగులు దావోస్ చుట్టూ మోహరించబడ్డాయి. ఇవి ప్రపంచ నాయకులు, కార్పొరేట్ దిగ్గజాలు, అంతర్జాతీయ ప్రతినిధుల భద్రత కోసం వినియోగించనున్నారు. దావోస్ ప్రధాన రహదారి అయిన ప్రొమెనేడ్ వెంబడి ఉన్న హోటళ్లు, దుకాణాలు, చర్చిలు తాత్కాలికంగా పునర్నిర్మించబడ్డాయి. అనేక దేశాలు, బహుళజాతి కంపెనీలు మొత్తం భవనాలనే అద్దెకు తీసుకొని తమ దేశాలు, బ్రాండ్లను ప్రదర్శించే వేదికలుగా మార్చాయి. ఈ ఏడాది WEFలో సౌదీ అరేబియా అత్యంత ఆకర్షణీయంగా నిలుస్తోంది. కాంగ్రెస్ సెంటర్ పక్కన ఉన్న మిగ్రోస్ భవనాన్ని పూర్తిగా బ్రాండ్ చేసి, సూపర్ మార్కెట్‌ను సౌదీ WEF పెవిలియన్‌గా మార్చింది. భారీ ఏర్పాట్లు ఉన్నప్పటికీ ఆదివారం రోజున దావోస్ వాతావరణం ప్రశాంతంగా ఉంది. మధ్యాహ్నం సమయంలో సైరన్లతో అగ్నిమాపక వాహనాలు ఒక హోటల్ వైపు దూసుకెళ్లడంతో కొంతసేపు ఉత్కంఠ నెలకొంది. అయితే అది అగ్ని ప్రమాద గుర్తింపు వ్యవస్థలో తలెత్తిన తప్పుడు అలారంగా అధికారులు నిర్ధారించారు. నిమిషాల్లోనే పరిస్థితి సాధారణమైంది.