అమెరికా అధ్యక్షుడు డొనాల్డ్ ట్రంప్ (Donald Trump) భారత దిగుమతులపై విధించిన 50 శాతం భారీ సుంకాలకు వ్యతిరేకంగా అమెరికా చట్టసభలో నిరసన గళం వినిపించింది. ఈ సుంకాలను వెంటనే రద్దు చేయాలని కోరుతూ ముగ్గురు కాంగ్రెస్ సభ్యులు డెబోరా రాస్, మార్క్ వీసే, రాజా కృష్ణమూర్తి నిన్న ప్రతినిధుల సభలో ఒక తీర్మానాన్ని ప్రవేశపెట్టారు.
Read also : Trump Tariffs:భారత్ టారిఫ్లపై ట్రంప్కు అమెరికాలోనే వ్యతిరేకత
ఆగస్టు 27, 2025న అంతర్జాతీయ అత్యవసర ఆర్థిక అధికారాల చట్టం (IEEPA) కింద భారత్పై అదనంగా విధించిన 25 శాతం సుంకాలతో కలిపి, మొత్తం పన్నులు 50 శాతానికి చేరిన విషయం తెలిసిందే. ఈ నిర్ణయం చట్టవిరుద్ధమని, ఇది అమెరికా కార్మికులకు, వినియోగదారులకు మరియు ఇరు దేశాల ద్వైపాక్షిక సంబంధాలకు తీవ్ర విఘాతం కలిగిస్తుందని వారు ఆందోళన వ్యక్తం చేశారు.
అమెరికా ఆర్థిక వ్యవస్థపై తీవ్ర ప్రభావం
ఈ సందర్భంగా కాంగ్రెస్ సభ్యురాలు డెబోరా రాస్ మాట్లాడుతూ, భారతీయ కంపెనీలు తమ రాష్ట్రమైన నార్త్ కరోలినాలో బిలియన్ డాలర్లకు పైగా పెట్టుబడులు పెట్టాయని, తద్వారా వేలాది ఉద్యోగాలను సృష్టించాయని గుర్తుచేశారు. అయితే ట్రంప్ విధించిన ఈ టారిఫ్లు తమ రాష్ట్ర ఆర్థిక వ్యవస్థను దెబ్బతీస్తున్నాయని ఆమె ఆవేదన వ్యక్తం చేశారు.
మరో సభ్యుడు మార్క్ వీసే స్పందిస్తూ, భారత్ తమకు అత్యంత కీలకమైన భాగస్వామి అని పేర్కొన్నారు. ఇప్పటికే అధిక ధరలతో సతమతమవుతున్న సామాన్య ప్రజలపై ఈ చట్టవిరుద్ధ సుంకాలు మరింత భారాన్ని మోపుతున్నాయని ఆయన విశ్లేషించారు.
సరఫరా గొలుసులకు ముప్పు: రాజా కృష్ణమూర్తి
భారత సంతతికి చెందిన కాంగ్రెస్ సభ్యుడు రాజా కృష్ణమూర్తి ఈ సుంకాల వల్ల అమెరికా ప్రయోజనాలకు లాభం కంటే నష్టమే ఎక్కువ జరుగుతుందని హెచ్చరించారు. ఇవి సరఫరా గొలుసులను దెబ్బతీయడంతో పాటు కార్మికులకు నష్టం కలిగిస్తాయని, అంతిమంగా వినియోగదారులపై ధరల భారం పడుతుందని వివరించారు.
ఈ సుంకాలను రద్దు చేయడం ద్వారానే అమెరికా మరియు భారత్ మధ్య ఆర్థిక, భద్రతా సహకారాన్ని తిరిగి బలోపేతం చేసుకోవచ్చని ఆయన సూచించారు.
రష్యా చమురు కొనుగోలు వివాదం మరియు నేపథ్యం
రష్యా నుంచి భారత్ చమురు కొనుగోలును కొనసాగిస్తోందన్న కారణంతో అధ్యక్షుడు ట్రంప్ ఆగస్టులో భారత్పై దశలవారీగా ఈ సుంకాలను విధించారు. అయితే ట్రంప్ ఏకపక్ష వాణిజ్య విధానాలను డెమొక్రాట్లు తీవ్రంగా వ్యతిరేకిస్తున్నారు.
ఇందులో భాగంగానే గత అక్టోబర్లో కూడా ఈ ముగ్గురు సభ్యులతో పాటు మరో 19 మంది కాంగ్రెస్ సభ్యులు ట్రంప్కు లేఖ రాసి, టారిఫ్ విధానాలను మార్చుకోవాలని కోరారు. ఇప్పుడు ఏకంగా తీర్మానం ప్రవేశపెట్టి ఒత్తిడి పెంచుతున్నారు.
Read hindi news: hindi.vaartha.com
Epaper : epaper.vaartha.com
Read also :
