Aleppo clashes : సిరియాలోని అలెప్పో నగరంలో పరిస్థితి ఉద్రిక్తంగా మారింది. సిరియా సైన్యం మరియు కుర్దిష్ నేతృత్వంలోని సిరియన్ డెమోక్రటిక్ ఫోర్సెస్ (SDF) మధ్య ఘర్షణలు తీవ్రరూపం దాల్చడంతో వేలాది మంది ప్రజలు తమ ఇళ్లను విడిచి పారిపోతున్నారు. అలెప్పోలోని రెండు కుర్దిష్ ప్రాంతాలను సైన్యం “క్లోజ్డ్ మిలిటరీ జోన్లు”గా ప్రకటించడంతో పరిస్థితి మరింత ఉద్రిక్తమైంది.
సిరియా సామాజిక వ్యవహారాల శాఖ తెలిపిన వివరాల ప్రకారం, ఈ ఘర్షణల కారణంగా ఇప్పటివరకు 45 వేల మందికి పైగా ప్రజలు నిర్వాసితులయ్యారు. ఎక్కువ మంది వాయవ్య దిశలో ఉన్న ఆఫ్రిన్ ప్రాంతం వైపు తరలిపోతున్నారు. సైన్యం ఏర్పాటు చేసిన మానవతా మార్గాల ద్వారా ప్రజలు కాలినడకన బయటకు వెళ్తుండగా, కొందరిని బస్సుల ద్వారా సురక్షిత ప్రాంతాలకు తరలించారు.
“యుద్ధాల నుంచి తప్పించుకునేందుకే మేము ఇళ్లను (Aleppo clashes) వదిలేశాం. ఇక ఎక్కడికి వెళ్లాలో కూడా తెలియడం లేదు. పద్నాలుగు ఏళ్లుగా యుద్ధం చూస్తున్నాం. ఇక చాలన్న భావన కలుగుతోంది,” అని తన కుమారుడిని మోస్తూ వెళ్తున్న 38 ఏళ్ల అహ్మద్ వాపోయాడు.
మరో నిర్వాసితుడు అమ్మార్ రాజీ మాట్లాడుతూ, “నా కుటుంబంలో ఆరుగురు పిల్లలు ఉన్నారు. పరిస్థితులు చాలా కఠినంగా ఉండటంతో తప్పనిసరిగా బయటకు రావాల్సి వచ్చింది. మళ్లీ ఎప్పుడు ఇంటికి చేరగలమో తెలియడం లేదు,” అని ఆందోళన వ్యక్తం చేశాడు.
మంగళవారం ప్రారంభమైన ఈ ఘర్షణల్లో ఇప్పటివరకు తొమ్మిది మంది మృతి చెందినట్లు అధికార వర్గాలు వెల్లడించాయి. మార్చిలో కుదిరిన ఒప్పందం ప్రకారం SDF దళాలను సిరియా ప్రభుత్వ వ్యవస్థలో విలీనం చేయాల్సి ఉన్నప్పటికీ, ఆ చర్చలు విఫలమవడంతో ఈ హింస చెలరేగినట్లు తెలుస్తోంది.
అలెప్పోలోని షేక్ మక్సూద్, అష్రఫీయా ప్రాంతాల్లో ఉన్న SDF స్థావరాలను చట్టబద్ధమైన సైనిక లక్ష్యాలుగా పరిగణిస్తామని సిరియా సైన్యం ప్రకటించింది. మధ్యాహ్నం 3 గంటల నుంచి ఆ ప్రాంతాలను పూర్తిగా మూసివేసిన సైనిక జోన్లుగా ప్రకటించి, పౌరులు వెంటనే బయటకు వెళ్లాలని హెచ్చరించింది.
ఈ పరిస్థితుల నేపథ్యంలో అలెప్పోలో పాఠశాలలు, యూనివర్సిటీలు, ప్రభుత్వ కార్యాలయాలు మూసివేయబడ్డాయి. అలాగే విమానాశ్రయం నుంచి రాకపోకలను కూడా తాత్కాలికంగా నిలిపివేశారు. నగరమంతా భయం, ఆందోళన వాతావరణం నెలకొంది.
Read hindi news:hindi.vaartha.com
Epaper: epaper.vaartha.com
Read also:
