Ai job loss warning : కృత్రిమ మేధస్సు (AI) వేగంగా అభివృద్ధి చెందుతున్న నేపథ్యంలో రాబోయే 12 నుంచి 18 నెలల్లో లక్షలాది వైట్ కాలర్ ఉద్యోగాలు ప్రమాదంలో పడే అవకాశం ఉందని అమెరికా వ్యాపారవేత్త, మాజీ అధ్యక్ష అభ్యర్థి ఆండ్రూ యాంగ్ హెచ్చరించారు. ఏఐ టూల్స్ కొన్ని నిమిషాల్లో పూర్తి చేసే పనులకు గతంలో నిపుణులకు గంటలు లేదా రోజులు పట్టేదని, ఈ మార్పు ఉద్యోగ వ్యవస్థలో భారీ మార్పులకు దారితీస్తుందని ఆయన తెలిపారు.
యాంగ్ విశ్లేషణ ప్రకారం కాల్ సెంటర్ ఉద్యోగులు, మార్కెటింగ్ నిపుణులు, కోడర్లు, డేటా అనలిస్టులు చేసే అనేక పనులను ఏఐ సులభంగా నిర్వహిస్తోంది. కేవలం డేటాను విశ్లేషించి నివేదికలు తయారు చేసే సీనియర్ స్థాయి ఉద్యోగాల అవసరం కూడా తగ్గే అవకాశం ఉందని ఆయన పేర్కొన్నారు. ఒక సంస్థ ఖర్చులు తగ్గించుకోవడానికి ఏఐను ఉపయోగించి ఉద్యోగులను తగ్గిస్తే, పోటీలో నిలబడటానికి ఇతర సంస్థలు కూడా అదే దారిని అనుసరించాల్సి వస్తుందని ఆయన విశ్లేషించారు.
Read Also: Manik Gupta: తేనెటీగల దాడిలో అంపైర్ మృతి
ఈ ధోరణి కొనసాగితే అమెరికాలోని దాదాపు 7 కోట్ల వైట్ కాలర్ ఉద్యోగాల్లో 20% నుంచి 50% వరకు రాబోయే సంవత్సరాల్లో తగ్గే ప్రమాదం ఉందని యాంగ్ హెచ్చరించారు. ఉద్యోగాల కోత వల్ల ప్రజల కొనుగోలు శక్తి తగ్గి, రియల్ ఎస్టేట్ మరియు స్థానిక ఆర్థిక వ్యవస్థలపై ప్రతికూల ప్రభావం పడే అవకాశం ఉందని చెప్పారు.
ఈ పరిస్థితికి పరిష్కారంగా యూనివర్సల్ బేసిక్ ఇన్కమ్ (UBI) అమలు చేయాలని, ఏఐ కంపెనీలపై అదనపు పన్నులు విధించి ఆ నిధులతో ఉపాధి కోల్పోయిన వారికి శిక్షణ ఇవ్వాలని ఆయన సూచించారు. ఇదిలా ఉండగా, అమెజాన్, గూగుల్, మైక్రోసాఫ్ట్ వంటి టెక్ దిగ్గజాలు ఇప్పటికే ఏఐ ఆధారిత ఆటోమేషన్ పెంచుతూ ఉద్యోగాల కోతలు ప్రారంభించడం ఈ మార్పులకు సంకేతంగా భావిస్తున్నారు.
Read hindi news: hindi.vaartha.com
Read Also Epaper : epaper.vaartha.com
Read Also:
