క్యాన్సర్ చికిత్స రంగంలో హైదరాబాద్కు చెందిన శాస్త్రవేత్తలు మరో కీలక మైలురాయిని సాధించారు. చర్మ క్యాన్సర్గా గుర్తించబడే మెలనోమాను దుష్ప్రభావాలు లేకుండా, అత్యంత ప్రభావవంతంగా నియంత్రించే కొత్త చికిత్సా విధానాన్ని వారు అభివృద్ధి చేశారు. ఈ వినూత్న పరిశోధనను ఐఐటీ హైదరాబాద్(IIT Hyderabad) మరియు సీఎస్ఐఆర్–ఇండియన్ ఇన్స్టిట్యూట్ ఆఫ్ కెమికల్ టెక్నాలజీ (CSIR-IICT)కు చెందిన శాస్త్రవేత్తలు సంయుక్తంగా నిర్వహించారు.
Read Also: Gardening: ఆరోగ్యానికి మేలు చేసే మైక్రోగ్రీన్స్ను ఇలా పెంచండి
ఫొటోథర్మల్ థెరపీ ద్వారా చికిత్స
ఈ ఆధునిక చికిత్సలో బంగారు పూత కలిగిన కాల్షియం పెరాక్సైడ్ నానో కణాలు (CPAu-NPs) ప్రధాన పాత్ర పోషిస్తాయి. శరీరంలోకి ప్రవేశించిన వెంటనే ఈ నానో కణాలు నేరుగా క్యాన్సర్ కణాలను లక్ష్యంగా చేసుకుని వాటికి అతుక్కుంటాయి. అనంతరం ఫొటోథర్మల్ థెరపీ (PTT) ద్వారా క్యాన్సర్ ప్రభావిత ప్రాంతంపై ప్రత్యేక కాంతిని ప్రసరింపజేస్తారు. దీని వల్ల నానో కణాల్లోని బంగారం వేడెక్కి అధిక ఉష్ణాన్ని ఉత్పత్తి చేసి క్యాన్సర్ కణాలను నాశనం చేస్తుంది.
అదే సమయంలో, కాల్షియం పెరాక్సైడ్ నుంచి విడుదలయ్యే ఆక్సిజన్ క్యాన్సర్ కణాలపై ద్వంద్వ ప్రభావాన్ని చూపుతూ వాటి వ్యాప్తిని అడ్డుకుంటుంది. ఈ విధానం వల్ల ఆరోగ్యమైన కణాలకు కనీస స్థాయిలో కూడా నష్టం కలగదని పరిశోధకులు వెల్లడించారు. సాంప్రదాయ కెమోథెరపీ లేదా క్లిష్టమైన శస్త్రచికిత్సలు అవసరం లేకుండానే ఈ పద్ధతి క్యాన్సర్ నియంత్రణలో కీలకంగా మారనుందని వారు తెలిపారు.
ఫంగల్ ఇన్ఫెక్షన్లపై అదనపు రక్షణ
ఇంకా, క్యాన్సర్ రోగుల్లో సాధారణంగా తగ్గిపోయే రోగనిరోధక శక్తి కారణంగా కలిగే ఫంగల్ ఇన్ఫెక్షన్లను కూడా ఈ నానో కణాలు సమర్థంగా ఎదుర్కొంటాయని పరిశోధనలో తేలింది. ఐఐటీ హైదరాబాద్ బయోమెడికల్ ఇంజినీరింగ్ విభాగానికి చెందిన డాక్టర్ అరవింద్ కుమార్ రంగన్ నేతృత్వంలో ఈ అధ్యయనం జరిగింది. ఎలుకలపై నిర్వహించిన ప్రయోగాల్లో క్యాన్సర్ కణితుల పరిమాణం గణనీయంగా తగ్గినట్లు శాస్త్రవేత్తలు గుర్తించారు. ఈ పరిశోధన ఫలితాలు అంతర్జాతీయ స్థాయిలో గుర్తింపు పొందిన ‘కమ్యూనికేషన్స్ కెమిస్ట్రీ’ అనే ప్రతిష్ఠాత్మక సైన్స్ జర్నల్లో ప్రచురితమయ్యాయి.
Read hindi news: hindi.vaartha.com
Epaper: epaper.vaartha.com
Read Also:
