ఇప్పటి జీవన శైలిలో ప్లాస్టిక్ను మానవులు విపరీతంగా వినియోగిస్తున్నాం. తినే ఆహారం నుంచి, దుస్తులు, ప్యాకింగ్, ఫర్నిచర్, గృహోపకరణాలు, ఇంటి చెత్త సంచులు, ప్రతి చిన్న విషయానికి ప్లాస్టిక్ అతి సర్వసాధారణ పదార్థమైపోయింది. అయితే మనం వాడి పారేసిన ఈ ప్లాస్టిక్ మన చుట్టూ ఉన్న జీవులకు నిశ్శబ్ద మృత్యువు తెస్తోందనే విషయాన్ని ఎంతమందికి తెలుసు? ముఖ్యంగా నగరాలు, పట్టణాల్లో తిన్న తర్వాత ప్లాస్టిక్ కవర్లతో సహా ఆహారాన్ని రోడ్లపై పడేస్తున్న అలవాటు వల్ల మూగజీవాలైన ఆవులు, కుక్కలు, మేకలు ప్లాస్టిక్ను తినేస్తున్నాయి. ఈ విషయంలో ఆవులు మరింతగా నష్టపోతున్నాయి.
ప్లాస్టిక్ తినడం వల్ల ఆవులకు కలిగే ప్రమాదాలు
జీర్ణవ్యవస్థపై ప్రభావం:
ప్లాస్టిక్ ఒక నాన్-బయోడిగ్రేడబుల్ పదార్థం. ఇది కడుపులో జీర్ణం కాకుండా చాలా కాలం ఉంటుంది. ఆవుల కడుపులోకి వెళ్ళిన ప్లాస్టిక్ కాలక్రమేణా పేరుకుపోతుంది. దీని వల్ల అవి సాధారణ ఆహారాన్ని తినలేకపోతాయి. ఆకలితో అలసిపోతాయి.
ఆహార లోపాలు మరియు పీడాకలలు:
ప్లాస్టిక్ తిన్న ఆవులకు పోషకాల కొరతలు వస్తాయి. మేత తినడం తగ్గిపోవడంతో రక్తహీనత, శరీర బలహీనత ఏర్పడుతుంది. కొన్ని సందర్భాల్లో వాటికి కడుపులో నొప్పులు వస్తాయి, కానీ అవి బయటకు చెప్పలేవు. చివరికి అవి చచ్చిపోతాయి. మనుషుల, ఆవులకు తిన్న పదార్థాన్ని వాంతి చేయగల శక్తి ఉండదు. అందుకే ఏది పడ్డా అది కడుపులోనే ఉంటుంది. ప్లాస్టిక్ తిన్నా, లోహ ముక్కలు తిన్నా అవి అదే ఉండిపోతాయి.
మృత్యువుకు దారి:
ఎన్నో కేసుల్లో ఆవులు మృతిచెందిన తర్వాత శవ పరీక్షలో వారి కడుపులో భారీ మొత్తంలో ప్లాస్టిక్ సంచులు, నైలాన్ ప్యాకెట్లు, ఇనుప ముక్కలు కనిపించాయి. ఇవి నేరుగా వారి మరణానికి కారణమయ్యాయి.
పర్యావరణ పరంగా కూడా ప్లాస్టిక్ ముప్పు
ప్లాస్టిక్ కేవలం పశువులకు మాత్రమే కాదు, మానవులు, వృక్షాలు, నేల, నీటి వనరులకూ ప్రమాదమే. ఇవి మట్టిలో కలవడానికి దాదాపు 500 సంవత్సరాలు పడుతుంది. అప్పటివరకు ఈ ప్లాస్టిక్ తరం తరాల జీవులకు ముప్పుగా మారుతుంది. నేల గుణాన్ని తగ్గిస్తుంది. నీటిలోకి వెళ్లి చేపల ప్రాణాల్ని బలిగొంటుంది. ఆ చేపలు మళ్ళీ మనమే తింటాం — అలా మళ్లీ మన ఆరోగ్యానికే నష్టమవుతుంది. మన దేశంలో చాలా ప్రాంతాల్లో ఇప్పటికీ చెత్తను శాస్త్రీయంగా వేరు చేయడం జరగడం లేదు. “వెస్ట్ మేనేజ్మెంట్” అనే మాటను పట్టించుకోకపోవడం వల్ల, ప్లాస్టిక్ కవర్లలో వేసిన ఆహారాన్ని రోడ్లపై పడేస్తున్నారు. మూగజీవాలు వాటిని ఆహారంగా భావించి తింటున్నాయి. ఇదే పరిస్థితి మారకుండా ఉంటే, ప్రతిరోజూ మనమూ ఒక పశువును చంపుతున్నట్టే అవుతుంది.
ప్లాస్టిక్ వాడకాన్ని తగ్గించాలి
ఈ సమస్యకు పరిష్కారం ఉందా? పునర్వినియోగ పదార్థాలు వాడాలి- స్టీల్, గాజు, చెక్క బుట్టలు, పేపర్ బాగులు వాడే అలవాటు పెంచాలి.
వెస్ట్ మేనేజ్మెంట్ పాటించాలి: ప్లాస్టిక్ను వేరు చేసి, పునర్వినియోగానికి పంపే విధానాన్ని ప్రభుత్వం, ప్రజలు పాటించాలి.
పశువులకు ఆహారం విసిరేప్పుడు జాగ్రత్త: ప్లాస్టిక్లో ఆహారం పెట్టి పారేయడం మానేయాలి.
చట్టాల అమలు కఠినంగా ఉండాలి: ప్లాస్టిక్ వేస్ట్ రోడ్లపై పడేసే వారిపై జరిమానాలు విధించాలి.
పశుపాలకులకు అవగాహన కల్పించాలి: ఆవులు రోడ్లపై తిరగకుండా కాపాడే చర్యలు తీసుకోవాలి. ప్లాస్టిక్ వాడకంలో మార్పు మన నుంచే మొదలవాలి. మన చిన్న మార్పు ఒక పశువు ప్రాణాన్ని కాపాడుతుంది.
Read also: walking: వాకింగ్ యోగాతో అందం,ఆరోగ్యం
