ఆవనూనె ఆరోగ్యానికి మిత్రమా? శత్రువా?
భారతీయ వంటకాలలో సుగంధ ద్రవ్యాలు మరియు నూనెలు ప్రాధాన్యమైన స్థానం కలిగి ఉన్నాయి. వాటిలో ఆవనూనెను మన పెద్దలు తరతరాలుగా వంటలలో వినియోగిస్తూ వస్తున్నారు. దాని ఘాటైన వాసన, బలమైన రుచి వంటకు విశేషమైన ప్రత్యేకతను ఇస్తుంది. అయితే, ఎంతో మంది ఈ నూనెను ఆరోగ్యానికి మంచిదని నమ్ముతూ తరచుగా వాడుతుంటే, మరొకవైపు పాశ్చాత్య దేశాలు దీన్ని నిషేధించడం ఆశ్చర్యం కలిగించే విషయం. దీనిపై అధ్యయనాలు, నివేదికలు చెబుతున్న నిజాలు తెలుసుకోవడం ఇప్పుడు చాలా అవసరం.
అమెరికా సహా పలు దేశాల్లో నిషేధం ఎందుకు?
అమెరికా ఫుడ్ అండ్ డ్రగ్ అడ్మినిస్ట్రేషన్ ప్రకారం, ఆవనూనెలో “ఎరుసిక్ యాసిడ్” అనే కొవ్వు ఆమ్లం అధికంగా ఉంటుంది. ఇది మానవ ఆరోగ్యానికి హానికరమని వారు పేర్కొంటున్నారు. ఈ యాసిడ్ అధికంగా తీసుకోవడం వల్ల గుండె కండరాలలో కొవ్వు పేరుకుపోతుంది. దీన్ని వైద్యపరంగా “మైయోకార్డియల్ లిపిడోసిస్” అని పిలుస్తారు. ఇది గుండె పనితీరును దెబ్బతీయడమే కాకుండా, కాలేయానికి కూడా ప్రమాదం కలిగిస్తుంది. కాలేయం పెద్దవడమవలే కాకుండా, ఫ్యాటీ లివర్ వ్యాధికి దారి తీస్తుంది. ఇక, దీర్ఘకాలంగా ఎరుసిక్ యాసిడ్ను అధికంగా తీసుకోవడం వల్ల మెదడు కణాలు దెబ్బతినడం, జ్ఞాపకశక్తి లోపాలు, మానసిక ఆరోగ్య సమస్యలు వచ్చే అవకాశాలు కూడా ఉన్నాయి.
జీర్ణవ్యవస్థపై ప్రభావం, ఎదుగుదలపై ప్రమాదం
ఆవనూనెను అధిక మోతాదులో తీసుకున్నపుడు జీర్ణవ్యవస్థపై తీవ్ర ప్రభావం పడుతుంది. విరేచనాలు, వికారం, కడుపు నొప్పి వంటి సమస్యలు సంభవిస్తాయి. ముఖ్యంగా పిల్లల్లో, జంతువులపై చేసిన ప్రయోగాల్లో కనిపించినట్లు, ఎరుసిక్ యాసిడ్ తీసుకోవడం వల్ల శారీరక ఎదుగుదల మందగించడం, బరువు తగ్గడం వంటి ప్రభావాలు ఉంటాయని నిపుణులు హెచ్చరిస్తున్నారు. ఇది పిల్లల ఎదుగుదలపై నెగెటివ్ ఎఫెక్ట్ చూపుతుందన్న ఆందోళన పెరుగుతోంది.
పునరుత్పత్తి ఆరోగ్యంపై ప్రభావం, క్యాన్సర్ ప్రమాదం?
కొన్ని అధ్యయనాల ప్రకారం, ఎరుసిక్ యాసిడ్ పునరుత్పత్తి వ్యవస్థపై ప్రతికూల ప్రభావం చూపుతుందని సూచనలున్నాయి. మానవులపై తక్కువగా అధ్యయనాలున్నా, జంతువులపై జరిగిన పరిశోధనల్లో స్పష్టమైన ప్రభావాలు కనిపించాయి. దీర్ఘకాలికంగా దీనిని తీసుకోవడం వల్ల క్యాన్సర్ వచ్చే అవకాశం కూడా ఉందని అభిప్రాయాలున్నాయి. ఇంకా దీనిపై మరిన్ని పరిశోధనలు జరగాల్సిన అవసరం ఉన్నా, ఇప్పటికే కొన్నిచోట్ల ఇది నిషేధించబడింది అంటే, ప్రమాదం అనే విషయాన్ని ఖచ్చితంగా సూచిస్తుంది.
సమతుల్యతే మార్గం: సురక్షిత వాడకానికి సూచనలు
నిపుణుల సూచనల ప్రకారం, తక్కువ ఎరుసిక్ యాసిడ్ ఉన్న ప్రాసెస్డ్ ఆవనూనెను మాత్రమే ఉపయోగించాలి. ఎఫ్డిఏ అనుమతించిన కొన్ని బ్రాండ్లు తక్కువ యాసిడ్తో ప్రత్యేకంగా తయారవుతున్నాయి. ‘కెనోలా ఆయిల్’ అనే రూపంలో కనడా శాస్త్రవేత్తలు తక్కువ ఎరుసిక్ యాసిడ్ గల రేప్సీడ్ నూనె రకాన్ని అభివృద్ధి చేశారు. కెనోలా అంటే “కెనడియన్ ఆయిల్ లో లెస్ యాసిడ్” అనే అర్థం. ఇదే ఇప్పుడు పాశ్చాత్య దేశాల్లో ఎక్కువగా ఉపయోగిస్తున్న సురక్షిత వేరియంట్.
తగిన జాగ్రత్తలే ఆరోగ్యానికి రక్షణ
ఏ నూనె అయినా మితంగా వాడాలి. కొనుగోలు చేసే సమయంలో ఎప్పటికప్పుడు లేబుల్ చదవడం, పోషక విలువలపై దృష్టి పెట్టడం చాలా ముఖ్యం. అపరిచిత బ్రాండ్ల కంటే నమ్మకమైన, నాణ్యత గల కంపెనీల నూనెలను ఎంచుకోవడం ఆరోగ్యానికి మేలు చేస్తుంది. ముఖ్యంగా హార్ట్ డిసీజ్ ఉన్నవారు, థైరాయిడ్ సమస్యలు ఉన్నవారు, పిల్లలకు ఆహారం తయారుచేస్తున్నప్పుడు జాగ్రత్తగా ఉండాలి. ఏది అయినా మితంగా తీసుకుంటే అది ఔషధం, ఎక్కువగా తీసుకుంటే విషమే అవుతుంది.
READ ALSO: Chewing Gum: అదే పనిగా చూయింగ్ గమ్ నములుతున్నారా? అయితే తప్పక ఇది తెలుసుకోండి
