గుండెపోటు చికిత్స (Heart attack treatment)లో నాలుగు దశాబ్దాలుగా విస్తృతంగా వాడుతున్న బీటా-బ్లాకర్ మందుల (Beta-blocker medications) పై తాజా అంతర్జాతీయ పరిశోధన ఆందోళన కలిగించే విషయాలను వెల్లడించింది. తీవ్రత తక్కువగా ఉండి, గుండె పనితీరు సాధారణంగా ఉన్న రోగులకు ఈ మందులు అదనపు ప్రయోజనం ఇవ్వకపోగా, కొందరు మహిళల్లో ప్రాణాలకు ముప్పు కలిగించే అవకాశం ఉందని ఈ అధ్యయనం స్పష్టం చేసింది.స్పెయిన్, ఇటలీ దేశాల్లోని 109 ఆసుపత్రులలో 8,505 మంది రోగులపై దాదాపు నాలుగేళ్ల పాటు ఈ అధ్యయనం నిర్వహించారు. పాల్గొన్నవారిని రెండు బృందాలుగా విభజించారు. ఒక గ్రూప్కి బీటా-బ్లాకర్లు ఇచ్చి, మరొక గ్రూప్కి ఇవ్వలేదు. అధ్యయనం ముగిసే సమయానికి రెండు బృందాల మధ్య మరణాల రేటు, మళ్లీ గుండెపోటు రావడం, గుండె వైఫల్యంతో ఆసుపత్రిలో చేరడం వంటి విషయాల్లో పెద్దగా తేడాలు కనిపించలేదు.
మహిళల్లోనే అధిక ప్రమాదం
ఉపవర్గాల వారీగా విశ్లేషించినప్పుడు ఆశ్చర్యకరమైన విషయం వెలుగులోకి వచ్చింది. బీటా-బ్లాకర్లు వాడిన మహిళల్లో, వాడని మహిళలతో పోలిస్తే మరణాల ముప్పు 2.7 శాతం ఎక్కువగా ఉన్నట్లు తేలింది. అదనంగా, గుండెపోటు లేదా గుండె వైఫల్యంతో ఆసుపత్రిలో చేరే ప్రమాదం కూడా మహిళలకే అధికంగా కనిపించింది. పురుషుల విషయంలో మాత్రం ఇలాంటి ప్రతికూల ఫలితాలు లేవని పరిశోధకులు పేర్కొన్నారు.ఈ ఫలితాలు గుండెపోటు చికిత్సలో కీలకమైన మార్పులకు దారితీయవచ్చని నిపుణులు చెబుతున్నారు. అధ్యయన ప్రధాన పరిశోధకుడు బోర్జా ఇబానెజ్ మాట్లాడుతూ, “ప్రస్తుతం సాధారణ గుండెపోటు వచ్చిన రోగుల్లో 80 శాతానికి పైగా బీటా-బ్లాకర్లతోనే డిశ్చార్జ్ అవుతున్నారు. ఈ ఫలితాలు చికిత్సా విధానంలో దశాబ్దాల తర్వాత వచ్చిన అతిపెద్ద పురోగతి” అని అన్నారు.
వైద్య మార్గదర్శకాలపై ప్రభావం
మౌంట్ సినాయ్ ఫస్టర్ హార్ట్ హాస్పిటల్ ప్రెసిడెంట్ వాలెంటిన్ ఫస్టర్ మాట్లాడుతూ, “ఈ అధ్యయనం ప్రపంచవ్యాప్తంగా ఉన్న వైద్య మార్గదర్శకాలను పునఃసమీక్షించేలా చేస్తుంది” అని అభిప్రాయపడ్డారు. ఇప్పటివరకు బీటా-బ్లాకర్ల వల్ల అలసట, గుండె స్పందన రేటు తగ్గడం, లైంగిక సమస్యలు వంటి దుష్ప్రభావాలు తెలిసినవే. కానీ మహిళలపై మరణ ముప్పు పెంచడం ఇదే మొదటిసారి గుర్తించడం గమనార్హమని అన్నారు.నిపుణుల అభిప్రాయం ప్రకారం, రోగుల ఆరోగ్య పరిస్థితి ఆధారంగా మందుల వాడకం మారవలసిన అవసరం ఉంది. అన్ని రోగులకు ఒకే విధంగా బీటా-బ్లాకర్లు ఇవ్వడం కన్నా, వ్యక్తిగత వైద్య చరిత్రను పరిగణనలోకి తీసుకుని నిర్ణయం తీసుకోవాలి. ముఖ్యంగా మహిళలకు ఈ మందులు ఇవ్వడంలో జాగ్రత్తలు అవసరమని వారు సూచిస్తున్నారు.మొత్తంగా, ఈ పరిశోధన ఫలితాలు గుండెపోటు చికిత్సలో కొత్త చర్చలకు దారితీయనున్నాయి. వైద్య ప్రపంచం ముందున్న ఈ సవాళ్లను దృష్టిలో ఉంచుకుని, రాబోయే రోజుల్లో చికిత్సా విధానాల్లో మార్పులు తప్పనిసరి కానున్నాయి.
Read Also :
