శ్రీశైల మల్లికార్జున స్వామి (Srisailam Temple) భక్తులకు దేవస్థానం శుభవార్త అందించింది. సుమారు ఏడాది కాలంగా నిలిచిపోయిన ఉచిత స్పర్శ దర్శనాలను నిన్నటి నుంచి పునరుద్ధరించింది. నిన్న ఉదయం ఆలయ అధికారుల పర్యవేక్షణలో ఈ సేవను తిరిగి ప్రారంభించడంతో భక్తులు ఆనందం వ్యక్తం చేస్తున్నారు.
ఏడాది విరామం తర్వాత భక్తులకు శుభవార్త
ఈ ఉచిత స్పర్శ దర్శనం కోసం అధికారులు కొత్తగా టోకెన్ విధానాన్ని ప్రవేశపెట్టారు. శ్రీశైలం(Srisailam Temple)లో ఏర్పాటు చేసిన ప్రత్యేక కౌంటర్ల ద్వారా ఈ టోకెన్లను ఆఫ్లైన్లో జారీ చేస్తారు. టోకెన్ పొందాలనుకునే భక్తులు తమ పేరు, ఆధార్ కార్డు, ఫోన్ నంబర్ వివరాలను నమోదు చేయాల్సి ఉంటుంది. దర్శనానికి వెళ్లే ముందు ఈ టోకెన్లను స్కాన్ చేశాకే లోపలికి అనుమతిస్తామని ఆలయ అధికారులు స్పష్టం చేశారు. ఈ విధానం ద్వారా భక్తుల రద్దీని నియంత్రించడం సులభమవుతుందని భావిస్తున్నారు.
వారానికి నాలుగు రోజులు మాత్రమే
గతంలో అమలులో ఉన్న విధానాన్నే పాటిస్తూ వారంలో నాలుగు రోజుల పాటు ఈ సేవను అందుబాటులో ఉంచనున్నారు. ప్రతి మంగళ, బుధ, గురు, శుక్రవారాల్లో మధ్యాహ్నం 1:45 గంటల నుంచి 3:45 గంటల మధ్య భక్తులను స్పర్శ దర్శనానికి అనుమతిస్తారని ఆలయ కార్యనిర్వహణాధికారి (ఈఓ) (EO) శ్రీనివాసరావు వెల్లడించారు.
భక్తుల స్పందన: అనుభూతి మరిచిపోలేనిది
భక్తుల చిరకాల కోరిక మేరకు, ప్రతి ఒక్కరూ శ్రీ మల్లికార్జున స్వామి (Srisailam Temple) వారిని స్వయంగా స్పృశించి, ఆధ్యాత్మిక అనుభూతిని పొందేందుకే ఈ నిర్ణయం తీసుకున్నట్లు ఈఓ వివరించారు. ఏడాది విరామం తర్వాత ఈ సేవలు పునఃప్రారంభం కావడంతో స్వామివారిని నేరుగా తాకి మొక్కులు చెల్లించుకునేందుకు భక్తులు ఆసక్తి చూపుతున్నారు. టోకెన్ వ్యవస్థ ద్వారా రద్దీని నియంత్రించడమే కాకుండా, భద్రతా పరంగా కూడా కంట్రోల్డ్ యాక్సెస్ ఉండేలా చర్యలు తీసుకుంటున్నారు.
Read Also: Dalai lama: ప్రముఖ ఆధ్యాత్మిక నాయకుడిపై సమగ్ర గ్రంథం
