జమ్మూ కాశ్మీర్లోని పవిత్ర అమర్నాథ్ యాత్ర (Amarnath Yatra) ఈ నెల 3వ తేదీన ప్రారంభమై అత్యంత భక్తిశ్రద్ధలతో కొనసాగుతోంది. కేవలం మొదటి 6 రోజుల్లోనే లక్షకు పైగా భక్తులు మంచుతో ఏర్పడే శివలింగాన్ని దర్శించుకున్నారు. ఈ విషయాన్ని జమ్మూ కాశ్మీర్ లెఫ్టినెంట్ గవర్నర్ మనోజ్ సిన్హా స్వయంగా ట్విటర్ వేదికగా తెలిపారు. మంచు గుహలో శివ దర్శనం కోసం భక్తులు దేశం నలుమూలల నుంచి తరలివస్తున్నారు.
38 రోజులపాటు మాత్రమే యాత్ర
గతేడాది అమర్నాథ్ యాత్ర 52 రోజులపాటు సాగింది. కానీ ఈసారి మాత్రం 38 రోజులపాటు మాత్రమే నిర్వహించనున్నారు. నిఘా, వాతావరణ పరిస్థితులు, భద్రతా ఏర్పాట్ల నేపథ్యంలో ఈ నిర్ణయం తీసుకున్నట్లు అధికారులు పేర్కొంటున్నారు. అయినా భక్తుల్లో ఉత్సాహం ఏమాత్రం తగ్గలేదు. ప్రతీరోజూ వేలాదిగా భక్తులు యాత్రలో పాల్గొంటున్నారు.
భద్రత, సౌకర్యాల మధ్య యాత్ర సజావుగా
యాత్ర రెండు ప్రధాన మార్గాల్లో – పహల్గాం మరియు బాల్టల్ ద్వారా సజావుగా కొనసాగుతోంది. భక్తుల భద్రత కోసం భారీ భద్రతా బలగాలు, వైద్య బృందాలు, సహాయక సిబ్బందిని అధికారులు నియమించారు. ఈసారి యాత్రలో మొత్తం 5 లక్షల మంది భక్తులు పాల్గొంటారని అమర్నాథ్ ఆలయ బోర్డు అంచనా వేస్తోంది. ఆధ్యాత్మికత, ప్రకృతి వైభవం మేళవించిన అమర్నాథ్ యాత్ర భక్తులకు జీవితానుభూతిని అందిస్తున్నదిగా వారు పేర్కొన్నారు.
Read Also : Simhadri Appanna : నేడు సింహాద్రి అప్పన్న గిరి ప్రదక్షిణ
