Mandakini : ఓటీటీలో మలయాళంలో విడుదలైన ‘మందాకిని’ ఇటీవల మలయాళ సినిమాల అనువాదాలకు తెలుగు ప్రేక్షకుల నుంచి విపరీతమైన స్పందన వస్తోంది. సహజమైన కథనంతో, వైవిధ్యమైన కథాంశాలతో ఆకట్టుకునే మలయాళ సినిమాలు, తెలుగు ప్రేక్షకులకు సరికొత్త అనుభూతిని అందిస్తున్నాయి. ఈ ట్రెండ్లోనే తాజాగా ఈటీవీ విన్ ఓటీటీలో ‘మందాకిని’ అనే మలయాళ సినిమా అందుబాటులోకి వచ్చింది.
బడ్జెట్ తక్కువ కలెక్షన్లు భారీ!
‘మందాకిని’ 2023లో మలయాళంలో థియేటర్లలో విడుదలై మంచి వసూళ్లను రాబట్టింది. కేవలం కోటి రూపాయల లోపు బడ్జెట్తో నిర్మించిన ఈ చిత్రం, 3 కోట్లకు పైగా గ్రాస్ కలెక్ట్ చేసింది. అనేక వేదికలపై మంచి ప్రదర్శన ఇచ్చిన ఈ సినిమా, ఇప్పుడు తెలుగులోనూ ఆకట్టుకునేందుకు సిద్ధంగా ఉంది.
కథలో ఏముంది?
ఈ కథలో అరోమల్ – అంబిలి అనే జంట పెళ్లి బంధంలోకి అడుగుపెడుతుంది. వారి తొలి రాత్రి కోసం సంప్రదాయంగా ఏర్పాట్లు జరుగుతాయి. కానీ, అరోమల్ స్నేహితులు సరదా కోసం అతనికి కూల్ డ్రింక్లో మద్యం కలిపి పంపిస్తారు. అనుకోకుండా ఆ డ్రింక్ అంబిలి తాగేయడంతో పరిస్థితి ఊహించని మలుపు తీసుకుంటుంది. మత్తులో, తన గత ప్రేమకథ గురించి అరోమల్ ముందు అంబిలి వెల్లడిస్తుంది. దాంతో వారి జీవితం ఏ విధంగా మారుతుందనేది ఆసక్తికరంగా చూపించారు.
నటీనటులు, సాంకేతిక బృందం
ఈ సినిమాలో అల్తాఫ్ సలీమ్, అనార్కలి మరిక్కర్ ప్రధాన పాత్రల్లో కనిపించనున్నారు. వినోద్ లీలా దర్శకత్వంలో రూపొందిన ఈ చిత్రం, హాస్యంతో పాటు భావోద్వేగాలను సమపాళ్లలో మేళవించింది. మలయాళ ప్రేక్షకుల మన్ననలు పొందిన ఈ సినిమా, ఇప్పుడు తెలుగులోనూ ప్రేక్షకుల అభిమానం పొందుతుందా? వేచిచూడాలి!
