పవర్ స్టార్ పవన్ కల్యాణ్ (Pawan Kalyan) నటించిన పాన్-ఇండియా చిత్రం ‘హరి హర వీరమల్లు (Hari Hara Veeramallu): పార్ట్ 1 – స్వార్డ్ వర్సెస్ స్పిరిట్’ ప్రీ రిలీజ్ ఈవెంట్ సోమవారం హైదరాబాద్ శిల్పకళా వేదికలో ఘనంగా జరిగింది. జూలై 24న థియేటర్లలో విడుదల కానున్న ఈ సినిమా వేడుకకు పవన్ కల్యాణ్ తన భార్య అన్నా లెజినోవాతో కలిసి హాజరవ్వడం అభిమానుల్లో ఉత్సాహాన్ని రెట్టింపు చేసింది.ఈ ఈవెంట్కు కర్ణాటక అటవీశాఖ మంత్రి ఈశ్వర్ ఖండ్రేతో పాటు టాలీవుడ్ దిగ్గజాలు రాజమౌళి, త్రివిక్రమ్ శ్రీనివాస్ వంటి దర్శకులు హాజరయ్యారు. అభిమానులు వేలాదిగా వచ్చి వేడుకను విజయవంతం చేశారు. భారీ భద్రత మధ్య ప్రాంగణానికి పాస్ ఉన్నవారికే ప్రవేశం కల్పించగా, ఇతరులకు ఈ కార్యక్రమాన్ని ఆన్లైన్లో వీక్షించే అవకాశం ఇవ్వడం విశేషం.
చిత్రంలో పవన్ పాత్రకు ప్రత్యేక ఆకర్షణ
ఈ సినిమాలో పవన్ కల్యాణ్ 17వ శతాబ్దపు మొఘల్ సామ్రాజ్యంలో వీరమల్లు అనే యోధుడిగా కనిపించనున్నారు. ధర్మం కోసం పోరాడే అతని కథే ఈ చిత్రానికి హృదయం. బాబీ దేఓల్ ఔరంగజేబ్ పాత్రలో, నిధి అగర్వాల్ హీరోయిన్గా నటిస్తున్నారు. నర్గీస్ ఫాఖ్రీ, నోరా ఫతేహి, సత్యరాజ్, సునీల్, అనసూయ, వెన్నెల కిశోర్, పూజిత పొన్నాడలు కీలక పాత్రల్లో కనిపించనున్నారు.ఈ సినిమాకు క్రిష్ జాగర్లమూడి, జ్యోతి కృష్ణ సంయుక్తంగా దర్శకత్వం వహించారు. ఏఎం రత్నం సమర్పణలో మెగా సూర్య ప్రొడక్షన్స్ బ్యానర్పై ఏ.దయాకర్ రావు నిర్మించారు. సినిమాటోగ్రఫీకి మనోజ్ పరమహంస, జ్ఞానశేఖర్ వీఎస్ పనిచేశారు. ఆస్కార్ అవార్డు గ్రహీత ఎంఎం కీరవాణి సంగీతం అందించారు.
యాక్షన్ సీన్, క్లైమాక్స్ స్పెషల్ అట్రాక్షన్
డైరెక్టర్ జ్యోతి కృష్ణ మాటల్లో, పవన్ కల్యాణ్ స్వయంగా డిజైన్ చేసిన ఓ యాక్షన్ సీన్ ఈ సినిమాకి హైలైట్ కానుంది. కీరవాణి ఆ సన్నివేశానికి 10 రోజులపాటు నేపథ్య సంగీతాన్ని అందించారు. క్లైమాక్స్ సీన్ షూటింగ్కు ఏకంగా 57 రోజుల సమయం తీసుకున్నట్టు చిత్రబృందం వెల్లడించింది.కోవిడ్, పవన్ రాజకీయ బాధ్యతల వల్ల వాయిదా పడుతూ వచ్చిన ఈ చిత్రం చివరకు విడుదలకు సిద్ధమైంది. తెలుగు, తమిళం, మలయాళం, కన్నడ, హిందీ భాషల్లో ఈ సినిమా విడుదల కానుంది. ఆంధ్రప్రదేశ్, తెలంగాణ థియేట్రికల్ రైట్స్ రూ.150 కోట్లకు అమ్ముడయ్యాయని సమాచారం. ఓటీటీ హక్కులు అమెజాన్ ప్రైమ్ వీడియో సొంతం చేసుకున్నట్లు తెలుస్తోంది.
విజువల్ ట్రీట్కు సిద్ధమవుతున్న ఫ్యాన్స్
సినిమా రన్టైమ్ 2 గంటల 42 నిమిషాలు. సెన్సార్ బోర్డునుంచి యూ/ఏ సర్టిఫికేట్ పొందింది. ఈ చిత్రం పవన్ అభిమానులకు ఒక విజువల్ ఫీస్ట్గా నిలవనుందని విశ్లేషకులు చెబుతున్నారు. బాక్సాఫీస్ వద్ద రికార్డులు బ్రేక్ చేసే అవకాశాలున్నాయని అంచనాలు వేస్తున్నారు.
Read Also : Betting Apps Promotion : రానా, దేవరకొండ, ప్రకాశ్ రాజ్, మంచు లక్ష్మిలకు ఈడీ నోటీసులు!
