బిగ్ స్క్రీన్పై సోసో.. ఓటీటీలో దుమ్మురేపుతున్న ‘బ్లైండ్ స్పాట్’!
కొన్ని సినిమాలు థియేటర్లలో పెద్దగా ఆడకపోయినా, ఓటీటీ ప్లాట్ఫామ్లలో మాత్రం ఊహించని విజయాన్ని సాధిస్తాయి. ముఖ్యంగా క్రైమ్, సస్పెన్స్, థ్రిల్లర్, హారర్ జానర్కు చెందిన సినిమాల విషయంలో ఇలాంటివి తరచుగా జరుగుతుంటాయి. సరిగ్గా ఇదే కోవలోకి వస్తుంది గత నెలలో థియేటర్లలో విడుదలైన ‘బ్లైండ్ స్పాట్’ (Blind Spot) అనే మర్డర్ మిస్టరీ చిత్రం. బిగ్ స్క్రీన్పై సగటు ప్రేక్షకులను అంతగా ఆకట్టుకోని ఈ టాలీవుడ్ క్రైమ్ థ్రిల్లర్ మూవీ, జూన్ 13న ఓటీటీలోకి అడుగుపెట్టిన తర్వాత అద్భుతమైన స్పందనను అందుకుంటోంది. ప్రస్తుతం అమెజాన్ ప్రైమ్ వీడియోలో (Amazon Prime Video)ఇండియా వ్యాప్తంగా టాప్-2లో ట్రెండ్ అవుతూ డిజిటల్ స్ట్రీమింగ్ ప్లాట్ఫామ్ పై దూసుకెళుతోంది. ఈ చిత్రం హైదరాబాద్ నేపథ్యంలో సాగే ఒక ఇంటెన్స్ క్రైమ్ థ్రిల్లర్. ఒక మర్డర్ ఇన్వెస్టిగేషన్ చుట్టూ కథనం నడుస్తుంది.
‘బ్లైండ్ స్పాట్’ – కథాంశం & ఆకట్టుకునే అంశాలు
‘బ్లైండ్ స్పాట్’ (Blind spot) సినిమాకు ఉన్న ప్రత్యేకత ఏమిటంటే, దీని నిడివి చాలా తక్కువగా ఉండటం. కేవలం 1 గంట 31 నిమిషాల రన్టైమ్ ఉన్నప్పటికీ, ఈ చిత్రం గ్రిప్పింగ్ స్క్రీన్ప్లే, మరియు దిమ్మతిరిగే ట్విస్టులతో ఆడియన్స్ను చివరి వరకు కుర్చీలకు కట్టిపడేస్తుంది. కథ విషయానికి వస్తే, జయరామ్ అనే వ్యాపారవేత్త, తన భార్య దివ్యతో తరచూ గొడవలు పడుతుంటాడు. ఒక రోజు వారి గొడవ తారాస్థాయికి చేరడంతో జయరామ్ తన భార్యపై చేయి చేసుకుంటాడు. అయితే, కొన్ని గంటల తర్వాత దివ్య తన బెడ్రూమ్లో ఉరికి వేలాడుతూ కనబడుతుంది. ఇది ఆత్మహత్య అని అందరూ భావిస్తారు. వెంటనే పనిమనిషి పోలీసులకు సమాచారం అందిస్తుంది. రంగంలోకి దిగిన ఒక పోలీస్ ఆఫీసర్ దివ్య మరణం ఆత్మహత్య కాదని అనుమానిస్తాడు. అతని నిశితమైన ఇన్వెస్టిగేషన్లో ఇది హత్య అని నిర్ధారణ అవుతుంది. దీంతో పోలీసులు జయరామ్, అతని సవతి పిల్లలు, పనిమనిషి, జయరామ్ సోదరుడైన ఎన్ఐఏ ఆఫీసర్ను విచారిస్తారు. విచారణలో అందరూ అనుమానితులుగానే కనిపిస్తారు. కానీ, దివ్య మరణానికి ఏ ఒక్కరూ కారణం కాదని తెలుస్తుంది. ఇదే సమయంలో, పనిమనిషికి, జయరామ్కు మధ్య ఎఫైర్ నడుస్తుందన్న విషయం పోలీసులకు తెలుస్తుంది. అయితే, దివ్య హత్యకు అదొక్కటే కారణం కాదని కూడా స్పష్టమవుతుంది. మరి ఆమె మరణానికి నిజమైన కారణం ఏమిటి? పోలీసులు ఈ కేసును ఎలా ఛేదిస్తారు? అసలు హంతకుడు ఎవరు? అన్నది తెలుసుకోవాలంటే ఈ సినిమా చూడాల్సిందే. క్లైమాక్స్ ట్విస్ట్ మాత్రం ప్రేక్షకులను ఊహించని షాక్కు గురి చేస్తుంది.
తారాగణం & ఓటీటీ స్ట్రీమింగ్ వివరాలు
రాకేష్ వర్మ దర్శకత్వం వహించిన ఈ ‘బ్లైండ్ స్పాట్’ చిత్రంలో నవీన్ చంద్ర, రాశి సింగ్, రవి వర్మ, అలీ రెజా, గాయత్రి భార్గవి తదితరులు ప్రధాన పాత్రల్లో అద్భుతంగా నటించారు. నవీన్ చంద్ర పోలీస్ ఆఫీసర్ పాత్రలో ఒదిగిపోయారు. నటీనటుల పర్ఫార్మెన్స్, గ్రిప్పింగ్ స్క్రీన్ప్లే సినిమాకు ప్రధాన బలంగా నిలిచాయి. ‘బ్లైండ్ స్పాట్’ సినిమా అమెజాన్ ప్రైమ్ వీడియోలో తెలుగుతో పాటు తమిళం, కన్నడ, మలయాళం, హిందీ భాషలలో స్ట్రీమింగ్ అవుతోంది. థియేటర్లలో మిస్ అయినవారు, మంచి క్రైమ్ థ్రిల్లర్ చూడాలనుకునేవారికి ‘బ్లైండ్ స్పాట్’ ఒక మంచి ఎంపిక అవుతుంది.
Read also: Sati Leelavati: ‘సతీ లీలావతి’ నుంచి ఫస్ట్ లుక్ రిలీజ్
