అన్నం మీద నెయ్యి వేస్తే వచ్చే రుచి అందరికీ తెలిసినదే. చిన్న పిల్లల నుంచి వృద్ధుల వరకు నెయ్యిని ఇష్టపడతారు. అయితే మధుమేహం (డయాబెటిస్) ఉన్నవాళ్లు నెయ్యిని తినొచ్చా? తింటే ఏమైనా సమస్యలు వస్తాయా? అనే సందేహం చాలా మందిలో ఉంది. దీనిపై శాస్త్రీయంగా, పోషక దృక్కోణంలో పరిశీలించాల్సిన అవసరం ఉంది.
నెయ్యి యొక్క పోషక విలువలు:
నెయ్యి అనేది శుద్ధమైనది. దీనిలో ప్రధానంగా కొవ్వులు ఉంటాయి. ముఖ్యంగా బ్యూటిరిక్ యాసిడ్ ఇది శరీరంలో పోషణను మెరుగుపరిచే సహజమైన కొవ్వు ఆమ్లం. ఇది ఇన్సులిన్ కు శరీర స్పందనను మెరుగుపరచగలదు. విటమిన్ A, D, E, K వీటిని “fat-soluble vitamins” అంటారు. శరీర అభివృద్ధి, దృష్టి, చర్మ ఆరోగ్యం, ఎముకల బలానికి ఇవి అవసరం. ఒమెగా-3 కొవ్వు ఆమ్లాలు ఇవి శరీరానికి అవసరమైన ఆరోగ్యకరమైన కొవ్వులు. గుండె ఆరోగ్యానికి మేలు చేస్తాయి.
నెయ్యి & ఇన్సులిన్ సున్నితత – మధుమేహంపై ప్రభావం
మధుమేహంలో ప్రధానంగా సమస్య ఏంటి అంటే – శరీరం తగినన్ని ఇన్సులిన్ను ఉత్పత్తి చేయకపోవడం లేదా ఉన్న ఇన్సులిన్ సరిగా పనిచేయకపోవడం. నెయ్యిలో ఉండే పోషకాలు, ముఖ్యంగా బ్యూటిరిక్ యాసిడ్, శరీరంలోని ఇన్సులిన్ సున్నితతను మెరుగుపరచగలదు. దీని వల్ల శరీరం తినే ఆహారాన్ని సరిగ్గా శోషించగలదు, రక్తంలో చక్కెర స్థాయులు అదుపులో ఉండగలవు. మనం తినే ఆహారాలు రక్తంలో చక్కెర స్థాయిని ఎంత వేగంగా పెంచుతాయో తెలిపే సూచికే గ్లైసెమిక్ ఇండెక్స్ నెయ్యిని అన్నం లేదా చపాతీ వంటి అధిక GI గల ఆహారాలతో కలిపి తింటే, ఆ ఆహారాల GI తక్కువ అవుతుంది. అంటే రక్తంలో చక్కెర స్థాయి మెల్లగా పెరుగుతుంది. ఇది మధుమేహ నియంత్రణకు ఉపయోగపడుతుంది.
మధుమేహం ఉన్నవారు నెయ్యి తినవచ్చా?
రోజూ ఒకటి రెండు స్పూన్ల వరకు నెయ్యిని అన్నం, రొట్టెలపై వేసుకుని తినడం వల్ల సమస్య లేదు. ఉదయం పూట తీసుకుంటే మంచిదిగా భావిస్తారు, ఎందుకంటే శరీరానికి శక్తి అందుతుంది. అయితే అధికంగా తినడం మాత్రం మానుకోవాలి. నెయ్యి సాధారణంగా ఆరోగ్యకరమైన కొవ్వుగా గుర్తింపు పొందినప్పటికీ, ప్రతి ఒక్కరికీ ఇది మితంగా ఉండాలి. ఇప్పటికే గుండె జబ్బులు, కొలెస్ట్రాల్ అధికంగా ఉండటం, లేదా అధిక బరువు వంటి సమస్యలున్నవారు నెయ్యిని తక్కువగా తీసుకోవడం మంచిది. నెయ్యిలో ఉన్న కొవ్వు శరీర బరువును పెంచే అవకాశమూ ఉంది. ఇది మధుమేహాన్ని నియంత్రించకుండా, మరింత ప్రమాదకర స్థాయికి తీసుకెళ్లవచ్చు. మధుమేహం ఉన్నవారు నెయ్యిని పూర్తిగా మానేయాల్సిన అవసరం లేదు. కానీ మోతాదు తగ్గించాలి. తక్కువ పరిమాణంలో తీసుకుంటే మంచి ఫలితం ఉంటుంది. ఆరోగ్యంగా ఉండాలంటే తగిన మోతాదులో ఆహారాన్ని తీసుకోవడమే ముఖ్యమైన విషయం.
