పల్నాడు జిల్లా సత్తెనపల్లి (Sattenapalli) నియోజకవర్గంలోని రెంటపాళ్ల గ్రామంలో వైఎస్ జగన్ మోహన్ రెడ్డి (Jagan ) రేపు పర్యటించనున్నారని మాజీ మంత్రి విడదల రజినీ (Vidadala Rajini) తెలిపారు. పర్యటనలో భాగంగా ఇటీవల ఆత్మహత్య చేసుకున్న లక్ష్మీనారాయణ కుటుంబాన్ని పరామర్శించేందుకు జగన్ వస్తున్నారని ఆమె చెప్పారు. ఈ విషయాన్ని ప్రజలకు తెలియజేస్తూ ఆమె మీడియాతో మాట్లాడుతూ, జగన్ పర్యటనను అడ్డుకునే ప్రయత్నాలు జరుగుతున్నాయంటూ తీవ్ర అసంతృప్తి వ్యక్తం చేశారు.
ఎమర్జెన్సీలా వ్యవహరిస్తున్న ప్రభుత్వం?
జగన్ పర్యటనపై ప్రభుత్వం విధిస్తున్న ఆంక్షలు పట్ల రజినీ విమర్శలు గుప్పించారు. “జగన్ వస్తున్నారని తెలిసి కూటమి నేతలు ఎందుకు భయపడుతున్నారు? ఇది ప్రజాస్వామ్య వ్యవస్థ. ఆయనను ఎవరు చూడొద్దంటారు? రాష్ట్రంలో ఎలాంటి అత్యవసర పరిస్థితి లేదు. అయినా పోలీసులు అనవసరంగా ఆంక్షలు విధిస్తున్నారు. ఇది ఎమర్జెన్సీ పరిస్థితికి నిదర్శనమే కాదా?” అంటూ ఆమె తీవ్రంగా ప్రశ్నించారు.
ఆటంకాలు ఎంతైనా పర్యటన తప్పదు
వైఎస్సార్ కాంగ్రెస్ పార్టీకి చెందిన నాయకుల అభిప్రాయం ప్రకారం, ఎన్ని ఆటంకాలు కలిగించినా జగన్ పర్యటన నిలిచే ప్రసక్తి లేదు. ఆయనకు ప్రజల మద్దతు ఉన్నందున ప్రజల సమస్యలు తెలుసుకునేందుకు ఆయన వెళ్లే పర్యటనను అడ్డుకోవడం సమంజసమేమీ కాదన్నారు. “ప్రజల పక్షాన నిలబడే నాయకుడిగా జగన్ వెళ్లి ఆ కుటుంబానికి ధైర్యం చెబుతారు. ఇది రాజకీయ పరంగా కాక, మానవతా పరంగా జరిగే కార్యక్రమం” అని విడదల రజినీ స్పష్టం చేశారు.
Read Also : Chandra Namaskar: రోజు చంద్ర నమస్కారం చేస్తే పలు లాభాలు
