హైదరాబాద్లో విషాదకర సంఘటన చోటుచేసుకుంది. సికింద్రాబాద్ పరిధిలోని బొల్లారం బజార్ రైల్వే స్టేషన్(Bollaram Railway Station) సమీపంలో రైలు ప్రమాదం సంభవించింది. పట్టాలు దాటుతున్న ముగ్గురు యువకులను రైలు ఢీకొట్టడంతో ఈ ప్రమాదం జరిగింది. ఒక్కసారిగా జరిగిన ఈ ఘటన స్థానికులను షాక్కు గురిచేసింది. రైళ్ల వేగాన్ని పట్టించుకోకుండా పట్టాలు దాటే అలవాటు మళ్లీ ఒకసారి ప్రాణాంతకమైందని ఈ సంఘటన చూపించింది.
ప్రమాదంలో కార్ఖాన ప్రాంతానికి చెందిన కొండగల కార్తీక్ (19), మచ్చ బొల్లారం ప్రాంతానికి చెందిన టంగుటూరి మల్లికార్జున్ (20) అనే ఇద్దరు యువకులు అక్కడికక్కడే మృతిచెందారు. వారితో పాటు ఉన్న మరో యువకుడు తీవ్రంగా గాయపడగా, స్థానికులు అప్రమత్తమై వెంటనే అతడిని పోలీసుల సహకారంతో గాంధీ ఆసుపత్రికి తరలించారు. ప్రస్తుతం అతని పరిస్థితి ఆందోళనకరంగా ఉన్నట్లు తెలుస్తోంది.
ఈ ఘటన తెలుగు రాష్ట్రాల్లో కలకలం రేపింది. తల్లిదండ్రులు, కుటుంబ సభ్యులు కన్నీరు మున్నీరై విలపిస్తున్నారు. రైలు పట్టాలు దాటేటప్పుడు జాగ్రత్తలు తీసుకోవాలని రైల్వే అధికారులు పలు మార్లు హెచ్చరించినప్పటికీ, నిర్లక్ష్యం వల్ల ఇలాంటి ప్రమాదాలు జరుగుతున్నాయని నిపుణులు పేర్కొంటున్నారు. భవిష్యత్తులో ఇలాంటి సంఘటనలు పునరావృతం కాకుండా కఠినమైన చర్యలు తీసుకోవాలని, అవగాహన కార్యక్రమాలను మరింత బలోపేతం చేయాలని స్థానికులు కోరుతున్నారు.
