స్విట్జర్లాండ్లోని జ్యూరిచ్లో నిర్వహించిన మీట్ అండ్ గ్రీట్ కార్యక్రమంలో మంత్రి T.G. భరత్ చేసిన వ్యాఖ్యలు వివాదాస్పదమయ్యాయి. ఆంధ్రప్రదేశ్ ఐటీ, ఎలక్ట్రానిక్స్ మంత్రి నారా లోకేష్ భవిష్యత్ ముఖ్యమంత్రిగా అవుతారని భరత్ వ్యాఖ్యానించడం తో చర్చ మొదలైంది. ఇది అనివార్యమని, వ్యతిరేకతలు ఎంత ఉన్నప్పటికీ లోకేష్ భవిష్యత్ నాయకుడిగా ఎదగడం ఖాయమని ఆయన చెప్పారు.
అయితే, అదే వేదికపై పాల్గొన్న ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఈ వ్యాఖ్యలను అసహనంగా తీసుకున్నారు. బహిరంగ వేదికపై వ్యక్తిగత అభిప్రాయాలు చెప్పడంపై ఆయన భరత్ను కఠినంగా ప్రశ్నించారు. “మీరు ఇక్కడ ఎందుకు ఇలా మాట్లాడుతున్నారు?” అని ఆయన అభ్యంతరం వ్యక్తం చేసినట్లు సమాచారం. “మేము ఇక్కడికి ఎందుకు వచ్చాము, దాని ప్రాముఖ్యత ఏమిటి?” అంటూ చంద్రబాబు ఈ కార్యక్రమానికి సంబంధం లేని వ్యాఖ్యలు చేయడం వద్దని భరత్ను హెచ్చరించారు. ఈ తరహా ప్రకటనలు భవిష్యత్తులో పునరావృతం కాకుండా ఉండాలని ఆయన స్పష్టం చేశారు.
ఈ కార్యక్రమంలో నారా లోకేష్, కేంద్ర మంత్రి కె. రామ్మోహన్ నాయుడు కూడా హాజరైనప్పటికీ, వారు ఈ అంశంపై ఎటువంటి బహిరంగ వ్యాఖ్యలు చేయలేదు. ఈ సంఘటన, భవిష్యత్ నాయకత్వంపై టీడీపీలో విభిన్న అభిప్రాయాలను బయటపెడుతూ, రాజకీయ వర్గాల్లో చర్చకు కారణమైంది.
