Women’s Day 2026: అంతర్జాతీయ మహిళా దినోత్సవం సందర్భంగా ఆంధ్రప్రదేశ్ ఐటీ మరియు విద్యాశాఖ మంత్రి నారా లోకేశ్ రాష్ట్ర మహిళా లోకానికి హృదయపూర్వక శుభాకాంక్షలు తెలిపారు. ఆదివారం సోషల్ మీడియా వేదికగా ఆయన ఒక భావోద్వేగపూరితమైన సందేశాన్ని పంచుకున్నారు. “అమ్మా.. నీవు ఆకాశంలో సగం కాదు, నింగీ నేలా నీవే.. ఈ సృష్టి నీది, మా జన్మ నీది” అంటూ స్త్రీమూర్తుల ప్రాధాన్యతను ఆయన కొనియాడారు. తల్లిగా, భార్యగా, సోదరిగా, కుమార్తెగా ప్రతి రూపంలోనూ పురుషుడికి అండగా నిలిచే మహిళల త్యాగాలకు ఆయన పాదాభివందనం చేశారు.
Read Also: Women’s Day 2026: అంతర్జాతీయ మహిళా దినోత్సవం : స్త్రీ శక్తికి పాదాభివందనం!
‘స్త్రీ శక్తి’ ద్వారా మహిళలకు ప్రభుత్వ భరోసా
మహిళా సాధికారత కోసం తమ కుటుంబం మరియు పార్టీ చేసిన కృషిని ఈ సందర్భంగా లోకేశ్ గుర్తు చేసుకున్నారు. మహిళలను గౌరవించాలనే సంస్కారాన్ని తన తల్లి తనకు చిన్నప్పుడే నేర్పించారని ఆయన తెలిపారు. దివంగత ఎన్టీఆర్ మహిళలకు ఆస్తిహక్కు కల్పిస్తే, చంద్రబాబు నాయుడు డ్వాక్రా సంఘాల ద్వారా వారిని ఆర్థికంగా బలోపేతం చేశారని పేర్కొన్నారు. ప్రస్తుతం కూటమి ప్రభుత్వం ‘స్త్రీ శక్తి’, ‘తల్లికి వందనం‘ వంటి పథకాల ద్వారా మహిళలకు అండగా నిలుస్తోందని, ప్రతి ఇంటి నుంచి ఒక మహిళా పారిశ్రామికవేత్తను తయారు చేయడమే తమ ప్రభుత్వ లక్ష్యమని ఆయన స్పష్టం చేశారు.
విద్యావ్యవస్థలో నైతిక విలువలను పెంపొందించేందుకు తమ ప్రభుత్వం తీసుకున్న విప్లవాత్మక నిర్ణయాలను మంత్రి వివరించారు. ప్రముఖ ఆధ్యాత్మిక ప్రవచనకర్త బ్రహ్మశ్రీ చాగంటి కోటేశ్వరరావు సూచనలతో పాఠ్యాంశాల్లో మార్పులు చేశామని, పాఠ్యపుస్తకాల్లో స్త్రీ, పురుష సమానత్వాన్ని చాటిచెప్పే చిత్రాలనే ముద్రించామని వెల్లడించారు. సమాజంలో మహిళలను కించపరిచేలా మాట్లాడే పదజాలాన్ని ఆయన తీవ్రంగా ఖండించారు. “ఆడపిల్లలా ఏడవొద్దు” లేదా “గాజులు తొడుక్కోలేదు” వంటి వ్యాఖ్యలు ఎవరిని ఉద్దేశించి చేసినా తప్పేనని లోకేశ్ స్పష్టం చేశారు.
సినిమాలు మరియు వెబ్ సిరీస్లలో మహిళలను తక్కువ చేసి చూపే సన్నివేశాలు, అసభ్యకర భాష ఉండకూడదని తాను వ్యక్తిగతంగా పోరాడుతున్నట్లు లోకేశ్ తెలిపారు. అన్ని రంగాల్లో పురుషులతో సమానంగా రాణిస్తున్న మహిళామూర్తుల సహనానికి, శక్తికి లోకేశ్ మరోసారి వందనం సమర్పించారు. సమాజంలో మహిళలకు గౌరవం లభించినప్పుడే నిజమైన అభివృద్ధి సాధ్యమని ఆయన ఆకాంక్షించారు.
Read hindi news: hindi.vaartha.com
Epaper: epaper.vaartha.com
Read Also:
