Srisailam Accident: భక్తులపైకి దూసుకెళ్లిన వాహనం..10 మందికి పైగా తీవ్ర గాయాలు

Srisailam Accident: ప్రముఖ పుణ్యక్షేత్రమైన శ్రీశైలంలో శుక్రవారం ఉదయం భక్తులను ఉలిక్కిపడేలా చేసిన ఒక విషాద ఘటన చోటుచేసుకుంది. ఆలయ టోల్‌గేట్ సమీపంలో వేగంగా వచ్చిన ఒక వాహనం ఒక్కసారిగా నియంత్రణ కోల్పోయి, నడుచుకుంటూ వెళ్తున్న భక్తులపైకి దూసుకెళ్లింది. ఈ ఊహించని ప్రమాదంతో అక్కడ ఒక్కసారిగా హాహాకారాలు మిన్నంటాయి.

వాహనం అదుపు తప్పి బీభత్సం

ఈ దుర్ఘటనలో దాదాపు 10 మందికి పైగా భక్తులు గాయపడ్డారు. ప్రమాదం జరిగిన వెంటనే ఆలయ సిబ్బంది మరియు తోటి భక్తులు స్పందించి, క్షతగాత్రులను హుటాహుటిన సమీపంలోని వైద్యశాలకు తరలించారు. గాయపడిన వారిలో కొందరి పరిస్థితి విషమంగా ఉన్నట్లు వైద్య వర్గాల సమాచారం. పోలీసులు సంఘటనా స్థలానికి చేరుకుని సహాయక చర్యలను పర్యవేక్షించారు.

మరోవైపు, ప్రమాదానికి కారణమైన వాహన డ్రైవర్‌ను స్థానికులు మరియు భక్తులు వెంటాడి పట్టుకున్నారు. మితిమీరిన వేగమే ఈ ప్రమాదానికి ప్రధాన కారణమని ప్రాథమికంగా తెలుస్తోంది. నిత్యం భక్తుల రద్దీతో ఉండే టోల్‌గేట్ ప్రాంతంలో ఇలాంటి ప్రమాదం జరగడంపై భక్తులు ఆందోళన వ్యక్తం చేస్తున్నారు. పోలీసులు కేసు నమోదు చేసి దర్యాప్తు చేస్తున్నారు.