ఆంధ్రప్రదేశ్ రాజధాని అమరావతి నిర్మాణంలో అత్యంత కీలకమైన భూసమీకరణ రైతుల ప్లాట్ల కేటాయింపు మరియు అభివృద్ధి ప్రక్రియ ఇప్పుడు తుది దశకు చేరుకుంది. రాజధాని ప్రాంత అభివృద్ధిపై జరిగిన కమిటీ భేటీ అనంతరం మున్సిపల్ పరిపాలన శాఖ మంత్రి నారాయణ మీడియాతో మాట్లాడుతూ, రైతుల సమస్యల పరిష్కారం దాదాపు కొలిక్కి వచ్చిందని ప్రకటించారు. గత కొంతకాలంగా పెండింగ్లో ఉన్న ప్లాట్ల రిజిస్ట్రేషన్ ప్రక్రియను ప్రభుత్వం వేగవంతం చేసిందని, ఇప్పటికే అత్యధికులకు వారి భూములకు సంబంధించిన హక్కులను కల్పించామని ఆయన వివరించారు.
Telangana: కేసీఆర్ తో KTR భేటీ
మంత్రి వెల్లడించిన గణాంకాల ప్రకారం, అమరావతిలో భూములు ఇచ్చిన 29,233 మంది రైతులకు సంబంధించి మొత్తం 69,421 ప్లాట్ల రిజిస్ట్రేషన్ ప్రక్రియ విజయవంతంగా పూర్తయింది. ఇంకా మిగిలి ఉన్న 1,914 మందికి చెందిన 7,273 ప్లాట్ల రిజిస్ట్రేషన్ పనులను కూడా యుద్ధ ప్రాతిపదికన పూర్తి చేయాలని అధికారులను ఆదేశించారు. కేవలం కాగితాలకే పరిమితం కాకుండా, రైతులు తమ ప్లాట్లలో భవన నిర్మాణాలను ప్రారంభించుకునేలా అనుమతులను (Building Permissions) మంజూరు చేస్తున్నట్లు మంత్రి స్పష్టం చేశారు. దీనివల్ల రాజధాని ప్రాంతంలో త్వరలోనే నిర్మాణ రంగం ఊపందుకోనుంది.
ప్లాట్ల అభివృద్ధికి సంబంధించి రైతుల నుంచి వచ్చిన విన్నపాలను ప్రభుత్వం సానుకూలంగా పరిగణించింది. డ్రైన్లు నిర్మించకుండా సర్వే రాళ్లు వేయడం వల్ల ప్రయోజనం ఉండదని రైతులు కోరడంతో, ముందుగా మౌలిక సదుపాయాల కల్పనపై దృష్టి సారించారు. రాబోయే వర్షాకాలం నాటికి ప్లాట్ల వద్ద డ్రైనేజీ, రోడ్లు వంటి పూర్తిస్థాయి సదుపాయాలు కల్పించి, ఆపై సరిహద్దు రాళ్లు వేయాలని ప్రభుత్వం నిర్ణయించింది. ఈ చర్యల ద్వారా అమరావతి రైతుల్లో భరోసా కల్పించడంతో పాటు, రాజధాని నగరాన్ని అత్యాధునిక హంగులతో తీర్చిదిద్దేందుకు ప్రభుత్వం కట్టుబడి ఉందని మంత్రి నారాయణ పునరుద్ఘాటించారు.
Read hindi news: hindi.vaartha.com
Read Also Epaper : epaper.vaartha.com
