ఆంధ్రప్రదేశ్ (Andhra Pradesh) రాష్ట్ర ఉప ముఖ్యమంత్రి మరియు జనసేన అధినేత పవన్ కల్యాణ్ (Pawan Kalyan) పిఠాపురం నియోజకవర్గ యువతకు ఓ శుభవార్త అందించారు. నియోజకవర్గంలో ప్రతి మూడు నెలలకు ఒకసారి ఉద్యోగ మేళా నిర్వహించేలా చర్యలు చేపడుతున్నట్టు ఆయన తెలిపారు. ఇది స్థానిక స్థాయిలో యువతకు ఉపాధి అవకాశాలు కల్పించి, వారికి జీవనోపాధిని స్థిరంగా అందించడమే లక్ష్యంగా ఉన్నదని స్పష్టం చేశారు.
ఈ ప్రకటన మంగళగిరిలోని క్యాంపు కార్యాలయంలో జరిగిన ఓ ప్రత్యేక సమావేశంలో వెలువడింది. ఈ సమావేశానికి పిఠాపురం నియోజకవర్గానికి చెందిన 325 మంది ప్రైవేటు ఎలక్ట్రిషియన్లు హాజరయ్యారు. సమావేశంలో పవన్ కల్యాణ్ వారు వ్యక్తిగతంగా సేఫ్టీ కిట్లు అందజేశారు. ఈ సందర్భంగా ఆయన మాట్లాడుతూ, విద్యుత్ పనులు అత్యంత ప్రమాదకరమైనవని, ఎలక్ట్రిషియన్లు తప్పనిసరిగా రక్షణ పరికరాలు వాడాలని హితవు పలికారు.
మానవీయ విలువలకు పవన్ కళ్యాణ్ ప్రాధాన్యం
ఈ సందర్భంలో, మల్లం గ్రామానికి చెందిన పల్లపు సురేశ్ అనే ఎలక్ట్రిషియన్ విద్యుదాఘాతానికి గురై మృతి చెందడం తనను కలచివేసిందన్నారు. ఈ ఘటన గ్రామంలో స్పర్థలకు దారితీసిందని, రాజకీయ లబ్ధి కోసం ఆలోచించేవారు ఇలాంటి గొడవలను పెద్దవి చేస్తారన్నారు. తాము మాత్రం సమస్యలను ఎలా పరిష్కరించాలో ఆలోచిస్తామన్నారు.
కార్మిక సంక్షేమం పట్ల పవన్ అంకితభావం
గత ప్రభుత్వ హయాంలో భవన నిర్మాణ కార్మికుల సంక్షేమ నిధులను దారి మళ్లించారని ఆరోపించారు పవన్. భవన నిర్మాణ కార్మికుల సంక్షేమ బోర్డు ద్వారా అమలు చేసే కార్యక్రమాలను పునరుద్ధరిస్తామని ఉప ముఖ్యమంత్రి పవన్ తెలిపారు. ఈ కార్యక్రమంలో పంచాయతీరాజ్ కమిషనర్ కృష్ణతేజ, కాకినాడ జిల్లా కలెక్టర్ షాన్మోహన్ తదితరులు పాల్గొన్నారు.
Read also: Venkateswara Rao: జగన్ పై తీవ్ర విమర్శలు చేసిన మాజీ ఐపీఎస్ ఏబీవీ
