ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఇటీవల ఢిల్లీలో రెండు రోజుల పాటు చేపట్టిన పర్యటన రాష్ట్ర రాజకీయాలు, అభివృద్ధి ప్రణాళికలకు మలుపు తిప్పేలా నిలిచింది. ముఖ్యంగా అమరావతిని ఏకైక రాజధానిగా చట్టబద్ధత కల్పించే విషయంలో ఆయన చూపిన పట్టుదల, కేంద్ర ప్రభుత్వాన్ని కోరిన తీరు రాజకీయ పరిశీలకులను ఆకట్టుకుంది. గత వైఎస్సార్ కాంగ్రెస్ ప్రభుత్వ హయాంలో తీసుకున్న మూడు రాజధానుల నిర్ణయాన్ని పూర్తిగా తిరస్కరిస్తూ, రాష్ట్ర ప్రజల సంకల్పానికి అనుగుణంగా అమరావతినే రాజధానిగా గుర్తించాలని కేంద్రానికి విజ్ఞప్తి చేశారు.
కేంద్ర హోం మంత్రి సమక్షంలో కీలక అంశాల ప్రస్తావన
శుక్రవారం ఢిల్లీ పర్యటనలో భాగంగా, కేంద్ర హోంమంత్రి అమిత్ షా 24 రాష్ట్రాలతో నిర్వహించిన శాంతిభద్రతల సమీక్షా సమావేశంలో చంద్రబాబు పాల్గొన్నారు. ఈ సందర్భంగా అమరావతికి చట్టబద్ధత కల్పించాల్సిన ఆవశ్యకతను ఆయన చెప్పారు. గత వైఎస్సార్ కాంగ్రెస్ ప్రభుత్వ హయాంలో తీసుకువచ్చిన మూడు రాజధానుల ప్రతిపాదన అనాలోచితమని, అది రాష్ట్ర ప్రజల భవిష్యత్తుతో చెలగాటమాడడమేనని ముఖ్యమంత్రి అన్నారు. స్థానిక రైతుల అభ్యర్థన మేరకు, అమరావతిని చట్టబద్ధంగా ఏకైక రాజధానిగా గుర్తించాలని మేము కేంద్రాన్ని కోరాం, అని ఆయన తెలిపారు.
అభివృద్ధి ప్రాజెక్టులపై స్పష్టత
ఢిల్లీ పర్యటనలో భాగంగా చంద్రబాబు పలువురు కీలక కేంద్ర మంత్రులతో సమావేశమయ్యారు. కేంద్ర పునరుత్పాదక ఇంధన శాఖ మంత్రి ప్రహ్లాద్ జోషీతో సమావేశమైన ముఖ్యమంత్రి, ఏపీ సమీకృత స్వచ్ఛ ఇంధన విధానాన్ని పరిచయం చేశారు. ఈ విధానం కింద రాష్ట్రంలో 72 గిగావాట్ల హరిత ఇంధనాన్ని ఉత్పత్తి చేయాలని లక్ష్యంగా పెట్టుకున్నాం. రూ.28,346 కోట్ల విలువైన గ్రీన్ ఎనర్జీ కారిడార్ ప్రాజెక్టును అభ్యర్థించగా, మంత్రి సానుకూలంగా స్పందించారు, అని చంద్రబాబు వివరించారు. సూర్య ఘర్ పథకానికి మద్దతు కోరుతూ, రాష్ట్రవ్యాప్తంగా 35 లక్షల గృహాలకు (నియోజకవర్గానికి 10,000 ఇళ్లు) సౌర విద్యుత్ రూఫ్టాప్ సౌకర్యాలు కల్పించాలని విజ్ఞప్తి చేశారు. కుసుమ్ పథకం కింద కేంద్రం ఇప్పటికే 2,000 మెగావాట్లకు ఆమోదం తెలిపిందని గుర్తుచేశారు. పునరుత్పాదక ఇంధనం ద్వారా 24×7 విద్యుత్ సరఫరా చేస్తూ ఆంధ్రప్రదేశ్ను గ్రీన్ ఎనర్జీ హబ్గా తీర్చిదిద్దుతామని ఆయన స్పష్టం చేశారు.
రక్షణ రంగ అభివృద్ధికి విస్తృత ప్రణాళిక
రక్షణ శాఖ మంత్రి రాజ్నాథ్ సింగ్తో జరిగిన భేటీలో రాష్ట్రంలోని అనేక ప్రాంతాలను రక్షణ పరిశ్రమలకు కేంద్రాలుగా అభివృద్ధి చేయాలన్న ప్రతిపాదనలను చంద్రబాబు సమర్పించారు. ఈ సమావేశంలో జగ్గయ్యపేట-డోలకొండ క్లస్టర్లోని 6,000 ఎకరాలను క్షిపణులు, ఆయుధాల పరిరక్షణ కేంద్రంగా మార్చాలని చంద్రబాబు ప్రతిపాదించారు. శ్రీహరికోట ప్రాంతంలో ప్రైవేటు శాటిలైట్ తయారీ, ప్రయోగ కేంద్రాల కోసం 2,000 ఎకరాల క్లస్టర్ను, లేపాక్షి-మడకశిర క్లస్టర్లో సైనిక, పౌర విమానాలు, ఎలక్ట్రానిక్స్ తయారీ కేంద్రాలను, విశాఖపట్నం-అనకాపల్లిలో నావికాదళ ప్రయోగ కేంద్రాలను, కర్నూలు-ఓర్వకల్లులో సైనిక డ్రోన్లు, రోబోటిక్స్, అధునాతన రక్షణ పరికరాల తయారీ కేంద్రాలను ప్రతిపాదించారు. ఐఐటీ తిరుపతిలో డీఆర్డీఓ సెంటర్ ఆఫ్ ఎక్సలెన్స్ ఏర్పాటు చేయాలని కూడా కోరారు.
పోలవరం ప్రాజెక్టు
పోలవరం ప్రాజెక్టు అంశం చర్చకు వచ్చినపుడు చంద్రబాబు భావోద్వేగంతో స్పందించారు. ఈ అంశంపై జలశక్తి మంత్రి సి.ఆర్. పాటిల్తో చర్చించారు. రూ.80,000 కోట్ల వ్యయంతో చేపట్టే పోలవరం-బనకచర్ల అనుసంధాన ప్రాజెక్టు ద్వారా ఇతర రాష్ట్రాలకు ఎలాంటి నష్టం లేకుండా 200 టీఎంసీల నీటిని మళ్లిస్తామని తెలిపారు. తెలంగాణ కూడా గోదావరిపై ప్రాజెక్టులు నిర్మిస్తోంది. గత వందేళ్లలో ఎన్నో టీఎంసీల నీరు సముద్రంలోకి వృథాగా పోయింది. ఈ మిగులు జలాల్లోంచి 200 టీఎంసీలను కరవు పీడిత ప్రాంతాలకు మళ్లించాలన్నది మా ప్రణాళిక. కేంద్రం ఆమోదం లభించగానే ఈ ప్రాజెక్టును ప్రారంభిస్తాం, అని ఆయన వివరించారు. కేంద్ర ఆర్థిక మంత్రి నిర్మలా సీతారామన్తో సమావేశమై రాష్ట్ర ఆర్థిక పరిస్థితిని చంద్రబాబు వివరించారు. పూర్వోదయ పథకం కింద అదనపు నిధులు, పోలవరం-బనకచర్ల ప్రాజెక్టుకు మద్దతు ఇవ్వాలని కోరారు. ఆర్థిక మంత్రి సానుకూలంగా స్పందించారని ఆయన పేర్కొన్నారు. మొత్తానికి, చంద్రబాబు ఢిల్లీ పర్యటన తన పాలన శైలికి ప్రతిరూపంగా నిలిచింది.
Read also: Kodali Nani : కొడాలి నాని అరెస్ట్ తప్పదా?
