తెలుగు రాష్ట్రాల్లో వాతావరణం మాత్రం భిన్నంగా కనిపిస్తోంది. ఒక వైపు తెలంగాణలోని కొన్ని జిల్లాల్లో వర్షాలు కురుస్తుండగా, మరోవైపు ఆంధ్రప్రదేశ్లో ఉష్ణోగ్రతలు పెరిగి ప్రజలను ఉక్కపోతతో కొట్టిపడేస్తున్నాయి. తూర్పు విదర్భ నుంచి కర్ణాటక వరకు విస్తరించిన ద్రోణి ప్రభావంతో వర్షాలు, తేలికపాటి చల్లదనాన్ని కొంతమేరకు అందిస్తున్నాయి. అయితే ఇది మొత్తం రాష్ట్రాలకు అందుబాటులో ఉండడం లేదు.
ఉక్కపోతతో అల్లాడుతున్న ఆంధ్రప్రదేశ్
ఆంధ్రప్రదేశ్లో మాత్రం ఎండలతో ప్రజలు ఉక్కపోతతో అల్లాడుతున్నారు. విశాఖపట్నం నుంచి నెల్లూరు వరకు గల కోస్తా జిల్లాల్లో ఉక్కపోత తారస్థాయికి చేరింది. భూమి నుంచి వెలువడుతున్న వేడి కారణంగా ప్రజలు ఇళ్లకు లోపలే ఉండే పరిస్థితి ఏర్పడింది. ఉదయం 10 గంటల తర్వాత సూర్యుడి ప్రతాపం అసహనాన్ని కలిగిస్తోంది.
అత్యధిక ఉష్ణోగ్రతలు నమోదు అయిన జిల్లాలు
జూన్ 10వ తేదీ (మంగళవారం) నాటికి విజయనగరం, పార్వతీపురం మన్యం, అల్లూరి సీతారామరాజు, కాకినాడ, కోనసీమ, తూర్పు గోదావరి, పశ్చిమ గోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, ప్రకాశం, నెల్లూరు జిల్లాల్లో అత్యధిక ఉష్ణోగ్రతలు నమోదయ్యాయి. ఈ ప్రాంతాల్లో 41°C నుంచి 42.5°C వరకు ఉష్ణోగ్రతలు రికార్డు అయ్యాయి. ఎండ తీవ్రతతో బయటకు వెళ్లడం ఇబ్బందికరంగా మారింది.
కొన్నిచోట్ల తేలికపాటి వర్షాలు
అల్లూరి, అన్నమయ్య, చిత్తూరు తిరుపతి జిల్లాల్లో కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉంది. ఇవాళ తూర్పుగోదావరి జిల్లా రంగంపేట,మన్యం జిల్లా గంగన్నదొరవలస, కృష్ణా జిల్లా పెనుమల్లి, ప్రకాశం జిల్లా మాలెపాడులో 40.9°C నమోదైంది. అయితే జూన్ 11 నుంచి ఏపీవ్యాప్తంగా కొన్ని ప్రాంతాల్లో వర్షాలు కురిసే అవకాశం ఉందని వాతావరణ శాఖ తెలిపింది.
జూన్ 11 నుంచి వర్షాలు కురిసే సూచనలు
వాతావరణ శాఖ తాజా అంచనాల ప్రకారం జూన్ 11వ తేదీ నుంచి ఆంధ్రప్రదేశ్లోని కొన్ని ప్రాంతాల్లో వర్షాలు కురిసే అవకాశం ఉంది. అయితే ఇవి తేలికపాటి వర్షాలుగా ఉండే అవకాశం ఉంది. అయినప్పటికీ, ఎండల తీవ్రత నుంచి కొంత మేర ఉపశమనం అందే సూచనలున్నాయి. రైతులు, పల్లెల్లో నివసించే ప్రజలు ఈ వానలను ఆశతో ఎదురుచూస్తున్నారు.
Read also: P. Krishnaiah: కొల్లేరు సరస్సును కాపాడుకుందాం..అదే మన నినాదం కావాలి
